04:58 pm
پیٹرولیم قیمتوں کے تعین کا اختیار یکم نومبر سے کمپنیوں کو دینے کی تجویز

پیٹرولیم قیمتوں کے تعین کا اختیار یکم نومبر سے کمپنیوں کو دینے کی تجویز

04:58 pm

اسلام آباد (پی پی آئی)وزارت توانائی نے ملک میں پیٹرولیم مصنوعات کی قیمتیں ڈی ریگولیٹ کرنے کی تجویز تیار کرلی، اوگرا کی مجوزہ سفارشات منظور ہونے کی صورت میں یکم نومبر سے پیٹرول اور ڈیزل کی قیمتوں کے تعین کا اختیار پیٹرولیم کمپنیوں کو مل جائے گا،
پیٹرولیم مصنوعات کی قیمتوں کے اْتار چڑھاؤ کے طریقہ کار میں بڑی تبدیلی متوقع ہے۔پی پی آئی کے مطابق وزارت توانائی پیٹرولیم ڈویڑن نے تیل کی قیمتوں کے تعین کا اختیار یکم نومبر سے پیٹرولیم کمپنیوں کے سپرد کرنے کی تجویز دے دی۔ اطلاعات کے مطابق پیٹرولیم کمپنیاں طلب اور رسد کی بنیاد پر تیل کی قیمتیں طے کریں گی، اوگرا قیمتوں کو ڈی ریگولیٹ کرنے کے ممکنہ اثرات کا تجزیہ کرکے رپورٹ پیش کریگی، اس مقصد کیلئے تمام متعلقہ اسٹیک ہولڈرز سے مشاورت کی جائے گی۔دستاویز کے مطابق فریٹ چارجز، ڈیلرز مارجن، سیلز ٹیکس ریونیو سمیت تمام پہلووں کا جائزہ لیا جائے گا۔پی پی آئی کے مطابق اوگرا کی سفارشات اقتصادی رابطہ کمیٹی میں 15 ستمبر تک پیش کی جائیں گی، اس کے بعد وفاقی کابینہ سے بھی منظوری لی جاسکتی ہے، منظوری کا عمل مکمل ہونے کے بعد یکم نومبر 2022سے عملدرآمد کا امکان ہے۔دستاویز کے مطابق آئل مارکیٹنگ کمپنیوں کے مارجن میں بھی اضافے کی تجویز ہے، پیٹرول اور ہائی اسپیڈ ڈیزل پر مارجن 3روپے 63پیسے سے بڑھ کر 6 روپے فی لیٹر ہوجائے گا۔