10:43 am
ایران خطے میں تخریب کاری بند کرے:برطانیہ فرانس جرمنی

ایران خطے میں تخریب کاری بند کرے:برطانیہ فرانس جرمنی

10:43 am

فرانس، جرمنی اور برطانیہ نے ایران پر زوردیا ہے کہ وہ خطے میں تخریبی سرگرمیوں اور دوسرے ممالک میں مداخلت سے باز رہے۔
 تینوں ممالک کا کہنا ہے کہ حالیہ ایام میں پیدا ہونے والی صورت حال نے ایران کے خطے میں تخریبی کردار کو مزید نمایاں کیا ہے۔
خبر  کے مطابق  گزشتہ  روز فرانس ،جرمن اور برطانیہ کی طرف سے جاری ایک مشترکہ بیان میں کہا گیا ہے کہ حالیہ پیش رفتوں نے ایران کے تخریبی اور عدم استحکام سے دوچار کرنے والے کردار کو مزید دنیا کے سامنے نمایاں کیا ہے۔
بیان میں مزید کہا گیا ہے کہ ایرانی پاسداران انقلاب اور القدس ملیشیا خطے کو غیر مستحکم کرنے میں پیش پیش ہیں۔
 
انہوں نے ایران پر اقوام متحدہ کی طرف سے عائد کردہ پابندیاں دوبارہ نافذ کرنے کا بھی عندیہ دیا۔ فرانس ، برطانیہ اور جرمنی نے ایران سے مطالبہ کیا ہے کہ وہ جوہری معاہدے کے تحت اپنی ذمہ داریوں کی مکمل تعمیل کرے اور جن شرائط سے ایران نے سبکدوشی اختیار کی ہے انہیں دوبارہ فعال کرے۔ تینوں ممالک نے تہران اور واشنگٹن کے مابین تناؤ کے تناظر میں ایک مشترکہ بیان میں کہا کہ ہمارا پیغام واضح ہے،ہم ایران کے ساتھ طے پائے جوہری معاہدے کے پابند اور اسے جاری رکھنے کے حامی ہیں۔ تینوں ملکوں نےامریکہ اور ایران کےدرمیان جاری کشیدگی کم کرنے کے لیے بات چیت شروع کرنے کی ضرورت پر زور دیا۔ یاد رہے کہ فرانس ، برطانیہ اور جرمنی نے جنہوں نے 2015 میں امریکہ ، چین اور روس کے ساتھ مل کر ایران کے ساتھ اس کے جوہری پروگرام پر ایک معاہدہ کیا مگر سن 2018 میں امریکی صدر ڈونلڈ ٹرمپ نے ایران کے ساتھ کیا گیا معاہدہ یک طرفہ طورپر ختم کردیا تھا۔