برطانوی وزیراعظم بورس جانسن کو شدید تنقید کا سامنا کرنا پڑ رہا ہے، یہی وجہ ہے کہ بورس جانسن سے مطالبہ کیا جا رہا ہے کہ وہ وزارت عظیٰ کے عہدے سے مستعفی ہو جائیں۔ لاک ڈاؤن کے دوران پارٹی میں شرکت کرنے کے اعتراف کے بعد اپوزیشن رہنما کیئر سٹارمر اور ان کی اپنی پارٹی کے ارکان نے بھی وزیراعظم بورس جانسن سے استعفیٰ دینے کا مطالبہ کیا تھا۔میڈیا رپورٹس کے مطابق پارٹی کی تصاویر مئی 2020ء کی ہیں جب برطانیہ میں کورونا وائرس کے پھیلاؤ کو روکنے کے لیے سخت ترین لاک ڈاؤن لگایا گیا تھا، اس دوران ان کے سرکاری گھر کیگارڈن میں پارٹی کا انعقاد ہوا جس میں 100 کے قریب عملے کے افراد شریک ہوئے۔برطانوی عوام اور اپوزیشن کی جانب سے سخت تنقید پر بورس جانسن نے برطانوی پارلیمنٹ سے اپنے خطاب میں لاک ڈاؤن کے دوران پارٹی میں شرکت کا اعتراف کرتے ہوئے معافی بھی مانگی تھی تاہم وزارت عظمیٰ کا عہدہ چھوڑنے سے انکار کر دیا تھا۔بورس جانسن نے وضاحت دیتے ہوئے کہا کہ وہ پارٹی ان کے دفتر کے عملے کے لیے تھی جس میں وہ صرف 25 منٹ کے لیے شریک ہوئے تھے تاکہ وبا کے دوران کام کرنے والے عملے کا شکریہ ادا کرسکیں۔ انہوں نے کہا کہ مجھے ایسا نہیں کرنا چاہئیے تھا اور شکریہ ادا کرنے کے لیے کوئی اور طریقہ اختیار کرنا چاہئیے تھا۔ برطانوی وزیراعظم کے بیان پر برطانوی ارکان پارلیمنٹ حکومت پر پھٹ پڑے، ایم پی افضل خان نے کہا کہ والدہ کا اسپتال میں انتقال ہو ا تو انہیں گاڑی میں بیٹھنا پڑا، ہم اپنے پیاروں کے جنازوں میں شرکت نہیں کرسکے اور وزیراعظم اوران کے عملے نے پارٹی کرلی۔رکن پارلیمنٹ ناز شاہ نے بھی بورس جانسن کو تنقید کا نشانہ بنایا جب کہ اپنی ساس کے انتقال کا ذکر کرتے ہوئے ایک اور رکن ایوان میں آبدیدہ بھی ہوئے۔اپوزیشن رہنماؤں نے کہا کہ بورس جانسن نے بجائے معافی مانگنے کے اپنے اقدام کا دفاع کیا جو انتہائی قابل افسوس بات ہے