05:33 pm
رورل سپورٹ پروگرام میں خلاف میرٹ بھرتیاں ہوئیں(پی ٹی آئی کے اداروں کو خطوط)

رورل سپورٹ پروگرام میں خلاف میرٹ بھرتیاں ہوئیں(پی ٹی آئی کے اداروں کو خطوط)

05:33 pm

گلگت( بیورورپورٹ) پاکستان تحریک انصاف خواتین ونگ نے وفاقی محتسب،گورنر گلگت بلتستان، سیکریٹری پلاننگ اینڈ ڈویلپمنٹ اور حساس اداروں کو تحریری خط لکھتے ہوئے کہا ہے کہ گلگت بلتستان رورل سپورٹ پروگرام میں وزیراعلیٰ نے اپنے قریبی دوستوں کو میرٹ کی دھجیاں اڑاتے ہوئے اعلیٰ عہدوں پر تعینات کیا ، جی بی رورل سپورٹ پروگرام میں بھاری بجٹ خرچ ہونے کے باوجود ادارے کی کارکردگی صفر ہے،تکنیکی عہدوں پر سیاسی بنیادوں پر تقرریاں عمل میں لائی گئی ہیں
، وزیراعلیٰ نے اپنے قریبی شخص کو پروگرام منیجر تعینات کیا ہے جبکہ چیف ایگزیکٹو آفیسر سمیت دیگر عہدوں کے لئے مزید اندرون خانہ تقرریوں اور تعیناتیوں کی تیاری کی جارہی ہے۔ صوبائی جنرل سیکریٹری پاکستان تحریک انصاف خواتین ونگ دلشاد بانوکے دستخطوں سے جاری تحریری خط میں کہا گیا ہے کہ گلگت بلتستان رورل سپورٹ پروگرام 2015میں قائم کیا گیا تھا اور اس کے اہداف میں دیہی علاقوں کی ترقی تھی لیکن نااہل جنرل منیجر اور سیاسی مداخلت،اقرباء پروری کی وجہ سے جی بی آر ایس پی اپنے اہداف سے دور ہوتاجارہا ہے ۔ ادارے کی سرکاری گاڑیوں کو جنرل منیجر اور اس کے قریبی دوست اپنے زاتی مفادات کے لئے استعمال کررہے ہیں جبکہ ادارے میں ایک روپیہ کا کام ابھی تک نہیں ہوسکا ہے۔ انہوں نے مزید کہا ہے کہ وزیراعلیٰ الیکشن سیل کے ایک رکن کو تمام قوانین اور میرٹ کو بالائے طاق رکھتے ہوئے مستقل ملازمت دی گئی ہے جو کہ ادارے کو ہائی جیک کرنے کے مترادف ہے۔ انہوں نے تجویز دی ہے کہ چیف ایگزیکٹو آفیسر کی تقرری میں میرٹ کو مدنظر رکھا جائے، نااہل جنرل منیجر کو فوری طور پر عہدے سے ہٹایا جائے ، کرپشن اور بدعنوانی پر نیب کے زریعے شفاف تحقیقات عمل میں لایا جائے جن میں وسائل کا بے دریغ استعمال بھی شامل ہے۔ ادارے کو جاری ہونے والے بجٹ کو ادارے کی کارکردگی سے مشروط کیا جائے تاکہ یہ ادارہ علاقہ کے ضروریات کو پورا کرسکے اور اپنے اہداف حاصل کرسکے۔

تازہ ترین خبریں