اس موقع پر اے ایس پی ٹریفک غیوراحمدخان نے کہا کہ گلگت شہرمیں ٹریفک کا کوئی موثر نظام نہ ہونے کے سبب نہ صرف مین شاہراہوں اور سڑکوں پر ٹریفک کا رش معمول بن چکا ہے بلکہ نوعمراور غیرتربیت یافتہ افراد کی ڈرائیونگ سے ٹریفک حادثات میں بھی آئے روز اضافہ ہورہا ہے جو عوام کے لئے ایک بڑا مسئلہ بنتا جارہا ہے۔ انہوں نے کہا کہ اس بے ہنگم ٹریفک کے مسئلے پر قابو پانے کے لئے ٹریفک پولیس کی جانب سے عوام الناس میں شعور ی مہم شروع کرنے کا فیصلہ کیا گیا ہے جس کے کامیاب انعقاد کے لئے ادارے کو ہلال احمرگلگت بلتستان کا خصوصی تعاون درکار ہوگا۔ انہوں نے کہا کہ ٹریفک قوانین سے متعلق شعوری مہم کے دوران شہر کے مختلف چوک چوراہوں پر شعوری بینرز آویزاں کئے جائیں گے، عوام الناس میں پمفلٹ بھی تقسیم کئے جائیں گے اور عوامی مقامات پر ٹریفک قوانین سے اگاہی کے حوالے سے خصوصی لیکچرز اور گفتگو کا بھی اہتمام کیا جائیگا۔ انہوں نے کہا کہ اس مہم کی کامیابی کے لئے ادارے کو خاصی تعداد میں افراد قوت یعنی رضاکاروں کی ضرورت ہوگی جس کے لئے ہلال احمرکے رضاکاروں کی خدمات حاصل کی جاسکتی ہیں تاکہ اس مسئلے پر ہرممکن حدتک قابو پایا جاسکے۔ اس موقع پر گفتگو میں ہلال احمرگلگت بلتستان کی صوبائی سکریٹری نورالعین نے کہا کہ گلگت شہرمیں بے ہنگم ٹریفک ہر شہری کے لئے مسئلے کا سبب بن رہا ہے جس پر قابو پانے کے لئے سب کو مل کراپنا کردار ادا کرنے کی ضرورت ہے۔ انہوں نے کہا کہ ہلال احمرپاکستان روزاول سے قدرتی آفات کے متاثرین اور مصائب کے شکار افراد کی دادرسی کے لئے حکومت کے معاون کے طورپر اپنا بھرپورکردار ادا کرتی رہی ہے اور آئندہ بھی انسانی فلاح وبہبوداور معاشرتی مسائل کے حل کے لئے حکومت اور ریاستی اداروں کے شانہ بشانہ کھڑی رہے گی۔ انہوں نے یقین دلایا کہ کہ ہلال احمرپاکستان کے رضاکار ٹریفک قوانین سے متعلق اگاہی مہم میں متعلقہ ادارے اور اہلکاروں کی بھرپور معاونت کریگی ۔انہوں نے کہا کہ ہلال احمرپاکستان پورے ملک میں ٹریفک قوانین کی پاسداری اور شاہراہوں پر ٹریفک کے رش یا ٹریفک جام ہونے کی صورت میںایمبولینسز کوہنگامی راستہ دینے سے متعلق مہمات چلارہی ہے جس کے انتہائی مثبت نتائج برآمد ہورہے ہیں، ہماری کوشش ہے کہ اس سلسلے کو گلگت بلتستان تک بھی وسعت دی جائے تاکہ عوام الناس کو فائدہ حاصل ہوسکے۔ اس موقع پر ہلال احمرپاکستان کی جانب سے ٹریفک پولیس کو مختلف موسمی حالات سے بچنے کے لئے چھتریاں اور سٹرک پر دوران ڈیوٹی حادثات کے دوران زخمی ہونے والوں کو ابتدائی طبی امداد دینے کے لئے فرسٹ ایڈ پاوچز کے تحائف تقسیم کئے گئے جس پر اے ایس پی ٹریفک غیوراحمدخان نے ہلال احمرپاکستان گلگت بلتستان کا شکریہ ادا کیا۔