ایک ایسا بگ (Bug) موجود ہے جس سے صارفین اپنے اکاؤنٹ میں بلیو ٹِک کا مفت اضافہ کر سکتے ہیں۔ مگر یہ اسی صورت میں ممکن ہوگا جب ماضی میں آپ کے اکاؤنٹ میں بلیو ٹِک موجود رہا ہو۔ اس مقصد کے لیے پروفائل بائیو میں کسی قسم کے ٹیکسٹ کا اضافہ کر کے اپ ڈیٹ کر دیں۔ درحقیقت کچھ مخصوص لکھنے کی ضرورت نہیں، بس چند کی بورڈ اسپیس کلک کرنے سے بھی بلیو ٹِک واپس آ جاتا ہے۔ مگر یہ بلیو ٹِک بہت کم وقت کے لیے برقرار رہتا ہے اور جب آپ پیج ریفریش کرتے ہیں تو وہ غائب ہو جاتا ہے۔ اس طرح کے بلیو ٹِک پر لکھا آئے گا کہ آپ حکومتی، میڈیا، انٹرٹینمنٹ یا دیگر شعبوں سے تعلق رکھنے والی ایک نمایاں شخصیت ہیں۔ خیال رہے کہ ٹوئٹر نے اس طرح کے مفت بلیو ٹِک کے کوڈ کو برقرار رکھا ہوا ہے۔ تو یہ بگ ٹوئٹر بلیو اور پرانے کوڈ کے درمیان کسی تعلق کا نتیجہ ہے مگر کچھ بھی کہنا ممکن نہیں کیونکہ کمپنی کی جانب سے اس حوالے سے کچھ نہیں بتایا گیا۔ خیال رہے کہ ایلون مسک نے اکتوبر 2022 میں ٹوئٹر کو خریدنے کے بعد مفت بلیو ٹِک پروگرام کو کرپٹ قرار دیتے ہوئے اکاؤنٹ کو ویریفائیڈ کرانے کا عمل ماہانہ فیس سے مشروط کر دیا تھا۔ ایلون مسک نے نومبر 2022 کے شروع میں ٹوئٹر بلیو سروس کو متعارف کرایا تھا مگر سبسکرپشن پلان متعارف کرانے کے بعد معروف شخصیات اور اداروں کے ناموں کے جعلی مصدقہ اکاؤنٹس کی بھرمار ہوگئی تھی جس کے بعد اسے معطل کردیا گیا۔ بعد ازاں 12 دسمبر 2022 کو اسے کچھ تبدیلیوں کے ساتھ دوبارہ پیش کیا گیا۔ ٹوئٹر کی جانب سے سبسکرپشن سروس ٹوئٹر بلیو کو دنیا بھر میں متعارف کرانے کے بعد اعلان کیا گیا تھا کہ 20 اپریل سے دنیا بھر سے صارفین کے اکاؤنٹس سے legacy بلیو ٹِک کو ہٹانے کا سلسلہ شروع ہو جائے گا اور بلیو ٹِک کو برقرار رکھنے کے لیے ٹوئٹر بلیو پر سائن اپ ہونا ہوگا۔