پلان میں کچھ تبدیلی کی گئی ہے۔بتایا گیا ہے ولی عہد محمد بن سلمان 4 طیاروں میں پاکستان آئیں گے۔ پاکستان کے جے ایف 17 تھنڈر جنگی طیاروں پاکستان کی فضائی حدود میں داخل ہوتے ہی محمد بن سلمان کے طیاروں کو حفاظتی گھیرے میں لے لیں گے۔ جے ایف 17 تھنڈر جنگی طیارے اپنی نگرانی میں سعودی ولی عہد کے فلیٹ کو نور خان ائیربیس تک پہنچائیں گے۔ائیرپورٹ پہنچنے پر وزیراعظم اپنی کابینہ کے ہمراہ سعودی ولی عہد کا استقبال کریں گے۔سعودی ولی عہد محمد بن سلمان کو نور خان ائیربیس سے بذریعہ ہیلی کاپٹر وزیراعظم ہاوس لے جایا جائے گا۔ وزیراعظم کی جانب سے گاڑی خود ڈرائیو کرنے سے متعلق فی الحال کوئی حتمی فیصلہ نہ کیا جا سکا۔ دوسری جانب دفتر خارجہ نے سعودی ولی عہد کے دورہ پاکستان کا باضابطہ اعلان کر دیا ہے جس کے مطابق سعودی ولی عہد محمد بن سلمان 16 فروری کو 2 روزہ سرکاری دورے پر پاکستان آئیں گے،ان کے ساتھ اعلیٰ سطح کا وفد بھی پاکستان پہنچے گا جس میں سعودی شاہی خاندان کے افراد،وزراء اور بڑی کاروباری شخصیات شامل ہوں گی۔دفتر خارجہ نے سعودی ولی عہد کیدورہ پاکستان کی تفصیلات جاری کردی ہیں جن کے مطابق ولی عہد بننے کے بعد محمد بن سلمان کا یہ پہلا سرکاری دورہ پاکستان ہوگا۔ سعودی ولی عہد صدر مملکت عارف علوی،وزیراعظم عمران خان اورآرمی چیف قمر جاوید باجوہ سے ملاقاتیں کریں گے۔ جاری کردہ تفصیلات کے مطابق پاکستانی سینیٹ کا وفد بھی شہزادہ محمد بن سلمان سے ملاقات کریگاجس کے بعد سعودی وزراء دو طرفہ تعاون بڑھانے کے لیے پاکستانی ہم منصب وزیروں سے ملاقاتیں کریں گے۔ دفتر خارجہ کے مطابق دونوں ممالک کی کاروباری شخصیات کے مابین نجی شعبے میں تعاون بڑھانے کے لیے ملاقاتیں بھی شیڈول ہیں۔