استعفے سے متعلق تمام خبریں بے بنیاد ہیں۔ فواد چودھری نے کہا کہ وزیراعظم سے میرا سیاسی نہیں ذاتی تعلق ہے۔ میرا کل سے وزیراعظم سے رابطہ نہیں ہوسکا۔ میں اپنے بھتیجے کی شادی میں مصروف ہوں۔ انہوں نے واضح کیا کہ ایم ڈی پی ٹی وی کے حوالے سے میرے اختلافات ابھی بھی موجود ہیں۔ کل وزیراعظم سے ملاقات کروں گا۔ وزیراعظم جو بھی مجھے حکم دیں گے میں وہی کروں گا۔ ٹیم بنانا وزیراعظم کا کام ہے۔ دوسری جانب پاکستان ٹیلی وڑن (پی ٹی وی) بورڈ آف ڈائریکٹرز نے فواد چودھری کو جوابی خط کہا کہ بورڈ آف ڈائریکٹرز کو آپ کی جانب سے ادارے اور انتظامیہ پر مسلسل تنقید پر تشویش ہے۔ آپ کی وجہ سے سرکاری ٹی وی کے تنازعات روزانہ نجی ٹی وی پر زیر بحث آتے ہیں۔ پی ٹی وی سرکاری ادارہ یا آپ کی وزارت اطلاعات کا ماتحت حصہ نہیں ہی ۔انتظامیہ کے خط میں لکھا گیا کہ پی ٹی وی کے بارے میں آپ کے خط سے غیر یقینی صورتحال پیدا ہوئی۔ غیر یقینی کی صورتحال کے باعث کاروبار دینے والے بڑے ادارے ساتھ چھوڑنا شروع ہو گئے ہیں۔ پی ٹی وی انتظامیہ کی جانب سے کہا گیا کہ ادارے کی کارکردگی بہتر بنانا حکومت، انتظامیہ اور بورڈ کی مشترکہ ذمہ داری ہے۔پی ٹی وی کی کارکردگی گزشتہ دس سال کے عرصے کے دوران بتدریج خراب ہوئی۔ مجرمانہ غفلت برتنے سے پی ٹی وی کی بد انتظامی اور کرپشن وقت کے ساتھ بڑھتی رہی۔ لاپرواہی ، بد انتظامی اور کرپشن کی وجہ سے ادارہ تباہی کے دہانے پر ہے۔ نجی ٹی و ی سے گفتگو کرتے ہوئے نعیم الحق نے کہا کہ وزیر اعظم کوپی ٹی وی بورڈ پرمکمل اعتماد ہے۔ انہوں نے کہا کہ وزیر اعظم چاہتے ہیں کہ پی ٹی وی بی بی سی جیسا خودمختار ادارہ بنے۔