بھارتی الزام تراشیوں اور دھمکیوں کے پیش نظر پاک فوج نے بیوروکریسی کے ساتھ مل کر پنجاب کی بھر کے لیے سکیورٹی پلان فائنل کر لیا ہے۔قومی اخبار میں شائع ایک رپورٹ کے مطابق پاک فوج کی معاونت سے کمشنرز کی زیر نگرانی، ڈپٹی کمشنرز نے وار بک (War Book )اپ ڈیٹ کرنے کے علاوہ پنجاب کے بھارت سے متصل 9 مختلف سرحدی مقامات پرداخلی سیکورٹی کو اپ گریڈ کر لیا ہے۔ اس ضمن میں ذرائع نے بتایا کہ بھارتی دھمکیوں کے بعد پاک فوج کے ذمہ داروں نے پنجاب کے عوام کو محفوظ رکھنے کے لئے سول بیوروکریسی کو ساتھ لے کر چلنے کا فیصلہ کیا اور قواعد کے مطابق صوبائی حکومت کو آگاہ کیا۔ملٹری بیوروکریسی کی جانب سے معاملات سامنے آنے کے بعد ایڈیشنل چیف سیکرٹری پنجاب کیپٹن (ر) اعجاز اصغر نے تمام کمشنرز اور ڈپٹی کمشنرز کو ہدایات بھی جاری کر دیں۔ ڈپٹی کمشنرز کو اس بات کا پابند بنایا گیا کہ وہ اپنے اپنے دفتر میں موجود ’’ وار بک‘‘ کو نہ صرف اپ گریڈ کریں تاکہ بوقت ضرورت اس سے استفادہ کیا جا سکے بلکہ پاک فوج کے ذمہ داروں کی جانب سے کال کئے جانے پر فوری رسپانس بھی کریں۔ واضح رہے کہ وار بُک جنگ کے ایام میں سویلین حکومتی معاملات بہتر انداز میں چلانے اور عوام کے جان و مال کے تحفظ کو یقینی بنانے والی حکمت عملی پر مشتمل کتاب ہے۔ پاک فوج کے ذمہ داران کی ہدایت پر سٹیشن کمانڈرز اور ماتحت فوجی افسروں نے کمشنرز اور ڈپٹی کمشنرزسے ایک سے زائد میٹنگز کرکے ممکنہ بھارتی جارحیت کے پیش نظر سول آبادی کے جان و مال کی حفاظت یقینی بنانے کے لئے نہ صرف پلان تشکیل دے دئے ہیں بلکہ سرحدی علاقوں میں موجود ڈیفنس لائن کے گردونواح میں موجود آبادیوں کے مکینوں کو بھی مختلف حوالوں سے گائیڈ لائنز جاری کر دیں۔ ذرائع نے بتایا کہ بھارتی سرحدی علاقوں سے متصل سیالکوٹ، گجرات، نارووال ، بھمبر(منگلا)، گنڈا سنگھ ( قصور)،واہگہ لاہور، اوکاڑہ، بہاولنگر اور رحیم یار خان سیکٹرزمیں رات کے اوقات میں گشت بہتر بنانے ، انٹیلی جنس نظام کو اپ گریڈ کرنے اور بوقت ضرورت سویلین آبادی کے انخلا کے انتظامات مکمل کر لئے گئے ہیں۔