سبزیوں کے ساتھ پھلوں کی قیمتیں آسمان سے باتیں کررہی ہیں عوام تو صرف قیمت معلوم کرکے خالی ہاتھوں گھر جانے پر مجبور ہوچکے ہیں، ضلع انتظامیہ کی جانب سے رمضان المبارک میں منافع خوروں کے خلاف کوئی کاروائی نہیں کی جارہی اس لیے منافع خور اپنی من مانی کے نرخ وصول کررہے ہیں، جیکب آباد میں ضلع انتظامیہ کی جانب سے سبزیوں اور پھل فروشوں کے لیے جاری کردہ ریٹ لسٹ بھی کام نہیں آرہی دوکاندار اپنی مرضی سے اپنے ریٹ لگائے بیٹھے ہیں، مارکیٹ میں آنے والا آم تو عام آدمی کی پہنچ سے دور ہوگیا ہے اور آم 300روپے کلو فروخت کیا جارہا ہے تو انگور 800روپے کلو فروخت کئے جارہے ہیں اس لیے شہری انگور خریدنے کے بجائے انگور کھٹے ہیں کہہ کر چلے جاتے ہیں، لیموں 400 روپے کلو کا سن کر عوام کا منہ ہی کھٹا ہوگیا ہے، جبکہ کیلے 120سے 150روپے درجن ، چیکو 200روپے کلو، سیب 300روپے کلو، تربوز 80روپے کلو، خربوزہ 50روپے کلو ، فالسے 400روپے کلو، آڑھو 500روپے کلو، چیری پیکٹ 300سے 400روپے، اچھی کوالٹی کی کھجور 300سے 400روپے، جبکہ سستی کھجور بھی 200سے 300 روپے کلو کی فروخت کی جارہی ہے، اسی طرح سبزیوں کے ریٹ بھی آسمان سے باتیں کررہے ہیں، آلو30روپے کلو، پیاز40روپے کلو، بھنڈی 60روپے کلو، کریلے50روپے کلو، بینگن30روپے کلو، لوکی40روپے کلو، ٹینڈے 60روپے کلو، مرچ 50روپے کلو، کھیرے 50روپے کلو فروخت کئے جارہے ہیں، جیکب آباد میں ماہ مبارک میں ہونے والی مہنگائی کی وجہ سے عوام شدید پریشان ہے، شہریوں کا کہنا ہے کہ اشیاء خورد ونوش کی قیمتوں کو کنٹرول کرنے کے لیے انتظامیہ کو چاہیے کہ وہ منافع خوروں کے خلاف کارروائی کرے اور عوام کو اس مہنگائی سے نجات دلائی جائے، دوسری جانب دوکانداروں کا کہنا ہے کہ ملک بھر میں مہنگائی ہے پیٹرول اور ڈیزل کی قیمتوں میں اضافے کے باعث مہنگائی عروج پر ہے ہمیں جو چیز مہنگی ملے گی تو ہم مجبوراً مہنگی فروخت کریں گے