اس جھنڈے کو دنیا کو سب سے بڑا جھنڈا ہونے کا اعزاز حاصل ہے جسے پاکستان کے قومی پرچم کی مناسبت سے سبز اور سفید غباروں سے خصوصی طور پر تیار کیا گیا۔اس جھنڈے کی تیاری میں کم و بیش 60 ہزار غبارے استعمال ہوئے جبکہ اس کی تیاری اور اسے قومی اسمبلی میں پیش کرنے کے لیے اسمبلی سیکرٹریٹ کے تین درجن سے زائد اسٹاف کی مدد حاصل کی گئی۔ذرائع کا کہنا ہے کہ کسی بھی ملک کی تاریخ میں ایسا پہلی مرتبہ ہوا ہے کہ اتنا بڑا جھنڈا قومی اسمبلی میں تیار کیا گیا ہو۔ ذرائع نے مزید بتایا کہ یہ جھنڈا اپنے سائز کے اعتبار سے اپنی مثال آپ ہے اسی لیے اسے گنیز بُک آف ورلڈ ریکارڈ میں بھی شامل کیا جائے گا۔ ذرائع نے مزید بتایا کہ اس جھنڈے کو اسمبلی ہال کے مرکزی دروازے کے ساتھ لگایا گیا، جہاں یہ جھنڈا چھت سے زمین تک کا ایریا کور کرتا ہے۔اس جھنڈے کی رونمائی پارلیمنٹ کے مشترکہ اجلاس شروع ہونے سے قبل کی گئی۔ قومی اسمبلی کو ہندو کونسل کی جانب سے پیش کیا جانے والا یہ خاص اور منفرد تحفہ ہندو کمیونٹی کی پاکستان کے لیے محبت کا عکاس ہے جس نے پارلیمنٹیرینز اور عوام کی پذیرائی حاصل کی۔ پارلیمنٹ کے باہر میڈیا سے بات کرتے ہوئے اقلیتی رہنما ڈاکٹر رمیش کُمار نے کہا کہ پاکستان کا قیام ایک پُر امن جدوجہد کا نتیجہ ہے۔یہاں رہنے والی ہندو برادری نے محمد علی جناح کے ساتھ اظہار یکجہتی کیا اور پاکستان کو اپنا وطن تسلیم کیا۔ انہوں نے کہا کہ یہاں بسنے والے ہندو مشکلات کے باوجود پاکستان سے بے پناہ محبت کرتے ہیں۔ مقبوضہ کشمیر کی صورتحال سے متعلق بات کرتے ہوئے انہوں نے کہا کہ پاکستان کی جغرافیائی حیثیت نہایت اہمیت کی حامل ہے، پاکستان کی ہندو کمیونٹی اپنے ملک کے دفاع کے لیے ہر سطح پر لڑنے کو تیار ہے۔