اسلام آباد (ویب ڈیسک) ناقص انتظامات کے باعث پاکستانی عازمین حج کو شدید مشکلات پیش آرہی ہیں۔وفاقی حکومت کی ناقص منصوبہ بندی کے باعث پاکستانی عازمین حج رل گئے۔میڈیا رپورٹس میں بتایا گیا ہے کہ پاکستانی حاجیوں کو ٹرانسپورٹ اور کھانے کے مناسب انتظامات نہ ہونے کی وجہ سے شدید مشکلات کا سامنا کرنا پڑا۔مکتب 108 میں ہزاروں حاجیوں کو خراب کھانا فراہم کیا گیا جو انہوں نے احتجاجاً کچرے میں ڈال دیا۔مکتب 108 میں حاجیوں کو معلومات فراہم کرنے والا یا مدد کرنے والا بھی کوئی پاکستانی وزارت حج کا ذمہ دار موجود نہیں تھا۔دو ہفتے قبل حج کے لئے سعودی عرب گئے 17 پاکستانی طبی وجوہات کی بنا پر انتقال کر گئے تھے جن میں سے 16 کو مکہ مکرمہ اور مدینہ منورہ میں سپرد خاک کیا گیا۔اسی حوالے سے اب ایک ویڈیو بھی سوشل میڈیا پر وائرل ہو رہی ہے جس میں پاکستانی عازمین حج کو شدید مشکلات میں پایا گیا ہے۔ویڈیو بنانے والے شخص نے حج کے دوران پاکستانیوں کو پیش آنے والی مشکلات کی نشاندہی کی اور ناقص حکومتی اقدامات کی بھی نشاندہی کی۔ویڈیو بتایا گیا ہے کہ پاکستانی حاجیوں کے سونے کے لئے کوئی انتظامات نہیں کیے گئے۔یہی وجہ ہے کہ ان حاجیوں کے درمیان لڑائیاں بھی ہوچکی ہیں۔یہاں پر مذہبی امور سے متعلقہ کوئی شخص موجود نہیں ہے۔وہاں پر موجود حاجی وزیراعظم عمران خان اور وزیر مذہبی امور کو بددعائیں دے رہے ہیں۔کچھ حاجی تو ایسے ہیں جو رات بھر سے سوئے نہیں ہیں۔ویڈیو بنانے والے شخص کا کہنا ہے کہ میں نے بہت شوق سے وزیراعظم عمران خان کو ووٹ دیا تھا لیکن آپ نے قسم کھاتا ہوں کہ میں انہیں کبھی ووٹ نہیں دوں گا۔جب کہ دوسری جانب ترجمان وزارت مذہبی امور نے سوشل میڈیا پر چلنے والی ویڈیوز کی تردید کرتے ہوئے کہا ہے کہ رواں سال حج کے انتظامات مثالی ہیں ۔ترجمان نے ایک بیان میں کہاکہ سوشل میڈیا پر چلنے والی ویڈیوز انکا حقیقت سے کوئی تعلق نہیں۔ ترجمان وزارت مذہبی امور نے کہاکہ اس سال حج کے انتظامات مثالی انتظامات ہیں۔ترجمان کیمطابق جو شکایات موصول ہوئی انکا ازالہ فوری کردیا گیا ہے، ترجمان وزارت مذہبی امور کے مطابق کچھ مخصوص سیاسی عناصر اپنے مذموم مقاصدکے کئے پروپیگنڈہ کررہے ہیں۔وزارت مذہبی امور کے مطابق جو عناصر ویڈیوز بنا کر پھیلا رہے ہیں جنکا مقصد سیاسی مفاد کا حصول ہے۔