04:44 pm
کشمیر کی خاطر خون کے آخری قطرے تک لڑیں گے، شیخ رشید

کشمیر کی خاطر خون کے آخری قطرے تک لڑیں گے، شیخ رشید

04:44 pm

لندن (آئی این پی)وفاقی وزیر ریلوے شیخ رشید احمد نے کہاہے کہ وزیر اعظم عمران خان اور پاک فوج کا پیغام واضح ہے کہ ہم کشمیر کی خاطر خون کے آخری قطرے تک لڑیں گے ، افغانستان سے امریکیوں کو نکلنے کی جلدی ہے ، طالبان کو نہیں۔ہفتہ کولندن میں پریس کانفرنس کرتے ہوئے وفاقی وزیر ریلوے شیخ رشید احمد نے کہا کہ وزیر اعظم عمران خان اور پاک فوج کا پیغام واضح ہے ، ہم کشمیر کی خاطر خون کے آخری قطرے تک لڑیں گے ۔ شیخ رشید نے کہا ہے کہ وقت ثابت کرے گا کہ مودی نے تاریخ کی سب سے بڑی غلطی کی۔ شیخ رشید کا کہنا تھا
کہ آج نہیں توکل کشمیر کا مسئلہ حل ہو کر رہے گا۔شیخ رشید نے کہا ہے کہ کوئی اس بھول میں نہ رہے کہ مسئلہ کشمیرکچھ دن میں سرد خانے میں چلا جائے گا، اہم عالمی ممالک کو کامیاب ڈپلومیسی سے اپنا ہم نوا بنایا ہے۔شیخ رشید نے کہا کہ اقوام عالم کو چاہیے کہ برصغیرکو آگ وخون کی ہولی سے بچائے، کشمیر کے لئے خون کے آخری قطرے اور آخری گولی تک لڑیں گے۔وزیر ریلوے نے کہا کہ بھارت میں مودی نے ایک مسلمان سے بھی ووٹ نہیں مانگا، بھارت میں آج مسلمان خوفزدہ ہیں، مودی نے لوک سبھا میں ایک بھی مسلمان کو منتخب نہیں ہونے دیا۔ان کا مزید کہنا تھا کہ پاکستانی ہرمحاذ پر اپنے کشمیریوں بھائیوں کے ساتھ کھڑے ہیں۔ یاد رہے کہ بھارت نے غیر قانونی اقدام کرتے ہوئے کشمیر کی خصوصی اہمیت ختم کر دی ہے، آرٹیکل 370 کے خاتمے کو مقبوضہ کشمیر کے عوام نے رد کر دیا. ہزاروں افراد سڑکوں پر نکل آئے۔گزشتہ تیرہ روز سے مقبوضہ کشمیر میں کرفیو نافذ ہے، جس کی وجہ سے روز مرہ سرگرمیاں معطل ہوگئی ہیں۔اس موضوع پر گزشتہ روز پچاس سال کے طویل انتظار کے بعد سلامتی کونسل کا اجلاس ہوا، جس میں ارکان کو اس مسئلے پر بریفنگ دی گئی۔ انہوںنے کہاکہ افغانستان سے امریکیوں کو نکلنے کی جلدی ہے ، طالبان کو نہیں ۔ جہاں بھی مسلمان بس رہے ہیں انہیں نشانہ بنایا جا رہا ہے ۔ امت مسلمہ خاص ابتلاءاور امتحان سے گزرے ہیں۔ پاکستان دنیا کی بڑی اسلامی ریاست ہے ۔ ہمارا بڑا امتحان ہے کہ ہم نے تمام اختلاف کو بھلا کر یک زبان ہونا ہے ۔ آج بھارت میں رہنے والے مسلمان بھی خوف زدہ ہیں ۔ پاکستانی عوام کشمیریوں کے ساتھ کھڑے ہیں ۔ انہوں نے ریلوے کے حوالے سے کہاکہ کانٹے والا اور سگنل کا مسئلہ ہے ایم ایل ون سائن ہو جائے گا ہمارے پاس پٹڑی ٹھیک کرنے کے پیسے نہیں ہیں ہمارے پاس 1860 ریلوے ٹریک لگا ہوا ہے ۔