06:47 am
پاک-بھارت وزرائے اعظم سے بات چیت مثبت رہی، ٹرمپ

پاک-بھارت وزرائے اعظم سے بات چیت مثبت رہی، ٹرمپ

06:47 am

اسلام آباد (نیوز ڈیسک )امریکی صدر ڈونلڈ ٹرمپ نے وزیر اعظم عمران خان اور پھر بھارتی وزیر اعظم نریندر مودی سے ٹیلی فونک رابطہ قائم کرنے کے بعد سماجی رابطے کی ویب سائٹ پر ٹویٹ کرتے ہوئے دونوں رہنماؤں سے بات چیت کے عمل کو مثبت قرار دے دیا۔ڈونلڈ ٹرمپ کا کہنا ہے کہ 'کشمیر کے معاملے پر پاکستانی اور بھارتی وزیراعظم سے بات چیت مثبت رہی'۔امریکی صدر نے اپنے ٹویٹ میں عمران خان اور نریندر مودی کو اپنا بہترین دوست قرار دیا۔ان کا کہنا تھا کہ 'میں نے اپنے اچھے دوستوں سے بات چیت میں تجارت،
اسٹریٹیجک شراکت داری اور سب سے بڑھ کر کشمیر میں کشیدگی میں کمی کے لئے اقدامات پر تبادلہ خیال کیا'۔انہوں نے کہا کہ 'خطے میں صورت حال کشیدہ ہے مگر یہ بات چیت مثبت رہی'۔خیال رہے کہ گزشتہ روز وائٹ ہاؤس کے ترجمان ہوگان گڈلے کی جانب سے جاری ایک بیان میں کہا گیا تھا کہ 'صدر ٹرمپ نے بھارت اور پاکستان کے درمیان پائی جانے والی کشیدگی کو کم کرنے اور خطے میں امن کو برقرار رکھنے کی اہمیت سے آگاہ کیا ہے’۔ٹرمپ اور مودی کے درمیان ہونے والے ٹیلی فونک رابطے کے حوالے سے آگاہ کرتے ہوئے انہوں نے کہا تھا کہ ‘دونوں رہنماؤں نے گفتگو کی کہ تجارت میں توسیع کے ذریعے امریکا اور بھارت کے معاشی تعلقات کو کیسے آگے بڑھایا جائے گا’۔ترجمان نے کہا کہ ‘دونوں ممالک کے رہنما جلد ہی دوبارہ ملاقات کے لیے بھی پرعزم ہیں’۔دوسری جانب اسلام آباد میں پریس کانفرنس کرتے ہوئے وزیر خارجہ شاہ محمود قریشی نے کہا تھا کہ وزیراعظم عمران خان اور امریکی صدر ڈونلڈ ٹرمپ کے درمیان ایک مرتبہ پھر رابطہ ہوا، جس میں مقبوضہ کشمیر کی صورتحال پر تبادلہ خیال ہوا اور ہمیں امید ہے کہ امریکا اس موجودہ کشیدگی اور تنازع کو حل کرنے میں اپنا کردار ادا کرے گا۔ان کا کہنا تھا کہ 'وزیراعظم عمران خان کی ڈونلڈ ٹرمپ سے 16 اگست کو بھی گفتگو ہوئی تھی، جس میں وزیراعظم نے پاکستان کے موقف سے آگاہ کیا تھا، اس دوران ڈونلڈ ٹرمپ نے کہا تھا کہ وہ کشمیر کے معاملے پر نریندر مودی سے بات کریں گے اور آج ٹرمپ اور مودی کی خطے میں کشیدگی کم کرنے پر گفتگو ہوئی'۔ان کا کہنا تھا کہ وزیراعظم عمران خان اور صدر ڈونلڈ ٹرمپ میں دوبارہ ٹیلی فونک رابطہ ہوا، صدر ڈونلڈ ٹرمپ نے خطے میں کشیدگی پر تشویش کا اظہار کیا اور کہا کہ اسے فوری طور پر ختم ہونا چاہیے اور خطے میں امن کو ہرصورت برقرار رہنا چاہیے۔شاہ محمود قریشی نے بتایا کہ وزیراعظم عمران خان نے آج ڈونلڈ ٹرمپ کو پاکستان کا موقف وضاحت اور تفصیل کے ساتھ بیان کیا جبکہ بھارتی حکومت کے اقدامات کی وجہ سے خطے کی صورتحال کے بارے میں بھی آگاہ کیا۔

تازہ ترین خبریں