04:15 pm
پی ٹی آئی وفد کی ایم کیو ایم مرکز آمد،شاہ محمود کی متحدہ کے تحفظات دور کرنے کی یقین دہانی

پی ٹی آئی وفد کی ایم کیو ایم مرکز آمد،شاہ محمود کی متحدہ کے تحفظات دور کرنے کی یقین دہانی

04:15 pm

کراچی(آن لائن) وزیر خارجہ اور گورنر سندھ نے ایم کیو ایم کے وفد سے ملاقات کرکے تحفظات دور کرنے کی یقین دہانی کرائی ہے۔حکمران جماعت تحریک انصاف کا وفد کراچی میں ایم کیو ایم کے مرکز پہنچا اور پارٹی رہنمائوں سے ملاقات کی، پی ٹی آئی وفد میں وزیرخارجہ شاہ محمود قریشی اور گورنر سندھ عمران اسماعیل سمیت پی ٹی آئی سندھ کے رہنما بھی شریک تھے۔ایم کیو ایم کی جانب سے فروغ نسیم، وسیم اختر،
امین الحق اور دیگر نے وفد کا استقبال کیا، ، ذرائع کے مطابق پی ٹی آئی اور ایم کیو ایم ملاقات میں صوبے کی سیاسی صورتحال، گورننس کے امور، تحریری معاہدے پر عمل درآمد اور بلدیاتی اختیارات سمیت آرٹیکل 140 اے کے نفاذ پر بات چیت ہوئی۔ذرائع کا کہنا ہے کہ وزیر خارجہ شاہ محمود قریشی کے ہمراہ ایک وفد چند دنوں بعد ایک بار پھر ایم کیو ایم کے رہنمائوں سے ملاقات کرے گا جب کہ شاہ محمود قریشی کا کہنا ہے کہ ایم کیو ایم کے تحفظات کو جلد دور کیا جائے گا۔ملاقات کے بعد میڈیا سے گفتگو میں وزیر خارجہ شاہ محمود قریشی نے کہا کہ ہم نے سندھ کی صورت حال پر تبادلہ خیال کیا اور لوکل گورنمنٹ کی جو صورتحال تھی، جو نہیں ہونا چاہیے تھی اس کے بارے میں بھی نتیجہ نکالا ہے۔ ان کا کہنا تھا کہ مشکل حالات میں متحدہ نے ہماراساتھ دیا اور مشکل حالات میں ہی عمران خان نے حکومت سنبھالی، آج ہم معاشی استحکام کی طرف لوٹ چکے ہیں۔عالمی ادارے اعتراف کررہے ہیں ہمارے ملک کی معیشت بہترہوگئی ہے،معیشت میں استحکام آگیاہے،ملک بڑے معاشی بحران سے نکل گیا۔خالد مقبول صدیقی نے کہا کہ سندھ کے شہری علاقے اپنے حصے کی قربانیاں دے چکے ہیں، کراچی چلتا ہے تو ملک بھی چلتا ہے اور یہی معیشت کا انجن ہے، ہم اپنے تعاون کی رفتار کو اور تیز کریں گے، سندھ کے لیے جامع حکمت عملی کے ساتھ آگے بڑھناہے۔ایم کیوایم کے رہنما خالد مقبول صدیقی نے کہاہے کہ شاہ محمودقریشی کاشکریہ جوانھوں نے ہمارے مسائل سنے، سندھ کے شہری علاقوں کوفوری مددکی ضرورت ہے،ہم اپنے حصے کی تمام ذمے داریاں نبھا رہے ہیں۔ خالد مقبول صدیقی کا کہناتھا کہ سندھ کے شہری علاقوں پرتوجہ دی جائے،معیشت سنبھلناشروع ہوگئی ہے،ملک مسائل سے نکل چکا ہے،پی ٹی آئی کی غیرمشروط حمایت کی۔