اس کے علاوہ دیگر کئی شہروں میں کرونا وائرس کے مشتبہ کیسز رپورٹ ہوئے تاہم ان کی تصدیق نہیں کی جا سکی۔اگرچہ وزیراعظم کے معاون خصوصی برائے صحت ڈاکٹر ظفر مرزا کا کہنا ہے کہ پاکستان میں کرونا وائرس کے دونوں مریضوں کی حالت خطرے سے باہر ہیں تاہم اس کے باوجود بھی پاکستان میں کرونا وائرس کا خوف طاری ہو گیا ہے۔عام صورتحال میں بھی جن لوگوں کو نزلہ زکام یا کھانسی ہے وہ خود کو کرونا وائرس کا شکار سمجھ بیٹھتے ہیں۔ایسے میں سوال پیدا ہوتا ہے کہ اِن مریضوں میں کرونا وائرس کی تشخیص کیسے ہو گی؟۔پاکستان میں کرونا وائرس کے ٹیسٹ کی فیس سے متعلق مختلف قسم کی خبریں زیر گردش ہیں۔بتایا گیا ہے کہ کرونا وائرس کے پھیلاؤ کے پیش نظر ماسک مہنگے ہونے کے بعد کرونا وائرس کے ٹیسٹ کی فیس کمائی کا ایک نیا ذریعہ بن سکتا ہے۔اطلاعات کے مطابق کچھ پرائیویٹ لیبز کرونا وائرس کی تشخیص کے لیے 8ہزار روپے وصول کر رہی ہیں۔یہاں تک کہ کچھ لیبز کرونا وائرس کی تشخیص کے لیے (ریئل ٹائم پی سی آر) ٹیسٹ استعمال کررہی ہیں لیکن اس کے بدلے مریضوں سے بھاری رقم وصول کررہی ہیں۔کرونا وائرس کا ٹیسٹ گلے اور ناک کے ذریعے کیا جاتا ہے جس کی رپورٹ ایک دن بعد مریض کو دی جاتی ہے۔چونکہ کرونا وائرس کی علامات سب کو پتہ ہیں تو ایسی علامات کا شکار ہونے کے بعد مریض ڈاکٹرز کے پاس دوڑے چلے جاتے ہیں لیکن یہاں پر سوال ان لوگوں کا ہے جو پرائیویٹ لیبز کو کرونا وائرس کی تشخیص کے لیے ہزاروں روپے ادا کرنے سے قاصر ہیں۔اگرچہ حکومت یہ ٹیسٹ مفت میں کر رہی ہے لیکن صرف ان مریضوں کا ٹیسٹ مفت میں کیا جاتا ہے جنہیں خود ریفر کیا جاتا ہے (جن میں واقعی کرونا وائرس کا شبہ ظاہر ہو)۔پنجاب میں حکومت صرف ان مریضوں کے لئے ٹیسٹ کی سفارش کرتی ہے جن کے بارے میں اُن کا خیال ہے کہ اُس میں کرونا وائرس موجود ہو سکتا ہے۔حکومت پاکستان نے کرونا وائرس سے نمٹنے کے لیے اقدامات کیے ہیں لیکن ایسے میں حکومت کو ان لیبز کے حوالے سے بھی کوئی حکمت عملی بنانا ہو گی جو مریضوں سے کرونا وائرس کی تشخیص کے لئے ہزاروں روپے وصول کر رہی ہیں۔کرونا وائرس کا کیس سامنے آنے کے بعد عوامی آگہی اور معلومات کے لیے ہیلپ لائن قائم کردی گئی ہے۔وہ لوگ جو ایسے ممالک سے سفر کر کے آئے ہیں جہاں کرونا وائرس موجود ہے اور وہ لوگ جنہیں کرونا وائر س کا شکار ہونے کا شبہ ہے وہ اس ہیلپ لائن پر رابطہ کر کے مدد حاصل کر سکتے ہیں۔۔کمشنرکراچی کی جانب سے جاری اعلامیے کے مطابق کمشنر کے آفس میں ایمرجنسی کنٹرول روم قائم کردیا گیا جو 24 گھنٹے کام کرے گا۔ترجمان کمشنر کراچی کا کہنا ہے کہ عوام کنٹرول روم کے فون نمبر 02199206565 ،02199203443 پر رابطہ کر سکتے ہیں اور وائرس سے متعلق تمام معلومات حاصل کر سکتے ہیں۔