شیخ رشید احمد نے کہا کہ فارن فنڈنگ کیس اہمیت اختیار کرجائے گا اور پانامہ ٹو بنے گا اور لوگ اس کو خاص طور پر میں نے کل بھی کہا تھا کہ مریم نواز اس کیس کو پڑھ لیں کیونکہ ان کی مزید جائیدادیں نکلنے جارہی ہیں ۔ انہوں نے کہاکہ الیکشن کمیشن کے سامنے احتجاج کا رسک لیا تاہم اپوزیشن نے بھی ہمیں تعاون کیا اور اگر اپوزیشن اسی طرح لانگ مارچ میں تعاون کرے گی تو ہم بھی اسی طرح کا تعاون جاری رکھیں گے ۔انہوں نے کہاکہ ریلوے آسا ن محکمہ تھا تاہم وزارت داخلہ بہت مشکل محکمہ ہے ، میں ایف سی اور رینجرز کے دیگر دفاتر کا بھی دورہ کروں گا اور سکیورٹی صورتحال کو مزید بہتر بنائیں گے ۔ایک سوال کے جواب میں انہوں نے کہاکہ مولانا صاحب میرے پیر بھائی ہیں وہ ویسے ہی مجھ سے ناراض ہوئے ہیں ،وہ سیاسی طور پر آج کل بالکل ختم ہو چکے ہیں تاہم دینی حیثیت سے وہ کافی تگڑے ہیں اور ان کی دینی حیثیت کا میں آج بھی احترام کرتا ہوں اور میں نے پی ٹی آئی کے جلسوں میں بھی ان کا نام احترام کیساتھ لیا اگر وہ میرا نام بگاڑتے ہیں تو پھر بھی میں ان کو برا بھلا نہیں کہوں گا ۔شیخ رشید احمد نے کہاکہ میں مولانا فضل الرحمن کو بتانا چاہتا ہوں کہ پہلے بھی دو بڑی اپوزیشن جماعتوں نے آپ کے ساتھ ہاتھ کیا اور اس بار بھی آپ کے ساتھ یہ لوگ ہاتھ کرجائیں گے ۔انہوں نے کہاکہ مولانا فضل الرحمن اسرائیل کیخلاف ریلیاں کرنے جارہے ہیں لیکن میں مولانا کو بتانا چاہتا ہوں کہ ملک میں کسی کی اتنی جرات نہیں کہ وہ اسرائیل کو تسلیم کرے اور پاکستان کبھی اسرائیل کو تسلیم نہیں کرے گا ۔انہوں نے کہاکہ ختم نبوت کا سب سے بڑا میں سپورٹرہوں یہ عوام جانتی ہے اور میری موجودگی میں کوئی بھی پاکستان میں ختم نبوت کیخلاف قانون نہیں بتا سکتا اور نہ کوئی اس قانون کو چھیڑ سکتا ہے اور جو قانون پہلے بن رہا تھا وہ مسلم لیگ (ن) لا رہی تھی اور مولانا فضل الرحمن نے اس قانون کے حق میں ووٹ دیا تھا۔ایک اور سوال کے جواب میں انہوں نے کہاکہ مجھے عمران خان نے وزارت داخلہ کی ذمہ داری سونپی ہے اور اس کے اندر میں کسی کو مداخلت نہیں کرنے دوں گا باقی جہاں تک نیب کی بات ہے وہ میرے ماتحت نہیں ہے نیب جانے اور مراد علی شاہ جانے ۔میں مراد علی شاہ کو پیغام بھیجنا چاہتا ہوں کہ ہم پورے کراچی کو سیف سٹی بنانا چاہتے ہیں اور پورے کراچی میں کیمرے لگنے چاہیے تاہم یہ ایک دو سال کے اندر لگ جائیں گے ۔انہوں نے کہاکہ وزارت داخلہ میں بیس سال سے کنٹرول روم بنا ہوا تھا مگر کسی نے آج تک اسے ہاتھ نہیں لگایا اور سارے کیمرے بند ا ور خراب پڑے تھے تاہم جب میں آیا تو میں نے کنٹرول روم کو اپ ڈیٹ کیا اور اس کی حالت زار کو بدلا۔انہوں نے کہاکہ ایم کیو ایم ہماری بھائی تنظیم ہے اور اس کے ساتھ میرا اچھا تعلق ہے اس بار میرے پاس ٹائم نہیں اگلی بار دورہ کیا تو ضرور ایم کیو ایم رہنمائوں سے ملنے جائوں گا۔انہوں نے کہا کہ ہم نے نادرا کو عوام کا خادم بنانا ہے اور کارڈ صرف پاکستانی شہری کو ہی ملے گا کسی دوسرے ملک کے شہری کو اب کارڈ جاری نہیں ہوسکتا۔قبل ازیںوفاقی وزیر داخلہ نے جمعرات کو رینجرز ہیڈ کوارٹرز سندھ کا دورہ کیا جہاں انہوں نے یادگار شہدا پر پھول چڑھائے اور فاتحہ خوانی ،وفاقی وزیر داخلہ کو ڈی جی رینجرز سندھ سمیت اعلیٰ حکام کی جانب سے سندھ بالخصوص کراچی میں امن وامان کی صورتحال،مشرقی سرحد پر آپریشنل تیاریوں سمیت مجموعی سکیورٹی امور پر تفصیلی بریفنگ دی گئی ۔وفاقی وزیر داخلہ نے سندھ رینجرز کے سکیورٹی انتظامات اور امن وامان کے قیام میں کی جانیوالی کوششوں کی تعریف کی ۔انہوں نے کہاکہ انسداد دہشت گردی کیلئے کیے جانیوالے اقدامات قابل ستائش ہیں اور ہم کراچی میں امن و امان کی صورتحال برقرار رکھنے کے لئے سکیورٹی اداروں کیساتھ ہر ممکن تعاون جاری رکھیں گے ۔