۔پشاور میں میڈیا سے گفتگو کرتے ہوئے مولانا فضل الرحمن نے کہاکہ سینیٹ انتخابات کے لیے ہمیں حکمت عملی طے کرنی ہوگی،ہمارے تمام جلسے کامیا ب ہوئے ہیں،پی ڈی ایم متحدہے،اختلاف اور اختلاف رائے ہوتاہے ،موجودہ حکمران بےوقوف تھے اور ایسے ہی احمق رہیں گے،5فروری کو مظفر آباد میں یوم یکجہتی کشمیر منائیں گے، 9فروری کو حیدرآبادمیں کامیاب جلسہ کریں گے،اگر اس ملک کو بچانا ہے تو اس حکومت سے نجات دلانا اہم ہے،ملک میں ہر شعبہ زندگی حکومت کی ناہلی سے متاثر ہے،ملک کو مالی نقصان کس نے پہنچایا،ذمہ دار یہی حکومت ہے،براڈ شیٹ نے حکومت کی کارکردگی کا پول کھولاہے، ملک میں کرپشن میں اضافہ ہواہے،ملک میں دوبارہ انتخابات کرائے جائیں ۔انہوں نے کہاکہ اختلاف رائے پر بغلیں نہیں بجانی چاہئیں ، ہم متحد ہیں اور بہترین طریقے سے اپنے کارڈ کھیل رہے ہیں اور انشا اللہ پانچ فروری کو مظفرآباد میں کشمیریوں کیساتھ اظہاریکجہتی کرنے کے لئے وہاں جلسہ ہوگا ۔انہوں نے کہاکہ ملک میں کرپشن میں اضافہ ہوا ہے اور ملک میں حکومت نام کی کوئی چیز نہیں ہے ، حکمران حماقتوں کے دریامیں ڈوبے ہوئے ہیں ۔انہوں نے کہاکہ ہم اچھی حکمت عملی کے تحت آگے بڑھ رہے ہیں اور حکمران جیسے بے وقوف تھے اور اب بھی ویسے ہی خود کو بے وقوف بنا رہے ہیں کیونکہ ان کو ہماری سمجھ نہیں آرہی ہے وہ سمجھ رہے ہیں کہ ہمارے درمیان اختلافات ہیں مگر ہم بہترین طریقے سے اپنے سیاسی کارڈز کھیلے رہے ہیں ۔ پیپلزپارٹی ، ن لیگ اور جے یو آئی سمیت کسی بھی پی ڈی ایم میں شامل سیاسی جماعت میں اختلاف نہیں ہے ۔انہوں نے کہاکہ ہم نے قوم بن کر ملک کو بچانا ہے ،آئینی ماہرین نے ہمیں متفق رائے دی کہ ایک اسمبلی کی تحلیل سے الیکٹورل کالج تبدیل نہیں ہوا کرتا اس لئے ہمیں استعفوں پر فوری حکمت عملی تبدیل کرنا پڑی جس کے بعد ہم نے سینیٹ اور ضمنی الیکشن میں حصہ لینے کا فیصلہ کیا اگر ہم ایسا نہ کرتے تو موجودہ نااہل حکمران سینیٹ میں آجائیں گے اور نااہل لوگوں سے سینیٹ بھر جائے گا ۔انہوں نے کہاکہ ضمنی انتخابات میں ہم صرف اس بار نہیں بلکہ ہر حصہ لیا ہے کیونکہ ضمنی انتخابات میں حصہ لینا ضروری ہوتا ہے اس سے عوام کا فائدہ ہوتا ہے اورضمنی الیکشن کے بعد ہی عوام کے مسائل حل ہوتے ہیں ۔انہوں نے کہاکہ پیپلزپارٹی کی ایک تجویز تحریک عدم اعتماد کی بھی ہے جس پر پی ڈی ایم سربراہی اجلاس میں غور کیا جائے گا اور اس حوالے سے کوئی بھی فیصلہ پی ڈی ایم میں شامل تمام جماعتیں ملکر کریں گی ۔