میڈیا سے گفتگو کرتے ہوئے خواجہ سعد رفیق نے کہاکہ تحریک انصاف کی مقبولیت تیزی کیساتھ کم ہورہی ہے اور آپ نے دیکھا کہ ضمنی الیکشن میں عوام نے ان کو مستردکردیا،جتنے بھی ضمنی الیکشن ہوئے ہیں پی ٹی آئی ہاری ہے ایک کرم ایجنسی کا الیکشن یہ جیتے ہیں اور وہاں بھی جے یو آئی کے امیدوار کے ساتھ جو بدسلوکی کی گئی ہے وہ بھی سب کے سامنے ہے ۔انہوں نے کہاکہ عمران خان نے دنیا جہان کی باتیں کی تھیں کہ میں تارے توڑ کر لائوں گا مگر قوم کو آپ نے بھوک سے مار دیا ہے ، پی ٹی آئی حکومت عادی ووٹ چور حکومت ہے یہ ووٹ چوروں کی حکومت ہے ۔آٹا چوروں اور ووٹ چوروں کی حکمرانی ہے ۔تیسرا سال ختم ہونے کو ہے ان کی پرفارمنس بالکل زیرو ہے ،مہنگائی بڑھا دیں گے ،ملک پر قرضوں کا بوجھ چڑھا دیں گے ،کھانے پینے کی اشیا مہنگی ترین کردیں گے تو لوگ آپ کو کیوں ووٹ دیں گے ؟انہوں نے کہاکہ لنگر خانے کھولنے ، گوبر سے بجلی بنانے ،مرغیوں اور انڈوں کی باتیں کرکے پاکستان کو آگے لے جائیں گے تو ایسا نہیں چلے گا ،یہ بچہ جمہورے کی حکومت ہے جس نے پاکستان کو بہت نقصان پہنچایا ۔مسلم لیگ(ن) کے رہنما خرم دستگیر نے کہا کہ ڈسکہ حلقہ این اے 75 کے ووٹرزپاکستانی شہری ہیں اور وہ میرے بھائی اور بہنیں ہیں ان کا جو ووٹ ڈالنے کا حق تھا وہ اس فاسشٹ حکومت نے پولنگ اسٹیشنز،ڈسکہ کی گلیوں اور سڑکوں پر ہوائی فائرنگ ،پولنگ کا عمل سست کرکے ،جعلی ووٹ ڈال کے ، پولیس کے ذریعے الیکشن کمیشن کے عملے کواغوا کراکے چھینا ۔انہوں نے کہاکہ بیک وقت ڈی سی او سیالکوٹ ،کمشنر گوجرانوالہ ، چیف سیکرٹر ی پنجاب کے فون بند ہیں ،ڈی پی او سیالکوٹ اور ریجن افسر کے فون بند ہیں چھ ذمہ دار ترین افسران کے فون اسی وقت بند تھے جب پریذائیڈنگ افسرز کے فون بند تھے ۔ہمارا مطالبہ ہے کہ پورے حلقے میں ووٹروں کو ہراساں کرکے ان کو ڈرا کر اور ان کے ووٹ جعلی پوسٹ کرکے اس حکومت نے ووٹرز کا حق چھینا ہے لہذا یہ حق الیکشن کمیشن اس حلقے کے عوام کو واپس کیا جائے اور دوبارہ الیکشن کرائے جائیں تاکہ عوام اپنے ووٹ کا حق استعمال کرکے اپنے نمائندے کو منتخب کرسکیں۔