کی طرف سے جاری کردہ اعداد و شمار سے معلوم ہوا ہے کہ گزشتہ چوبیس گھنٹوں کے دوران ملک بھر میں 49 ہزار 595 ٹیسٹ کیے گئے جن میں سے 6 ہزار 357 افراد میں کورونا کی تصدیق ہوئی اور کورونا ٹیسٹ مثبت آنے کی شرح 12.81 رہی ، اس دوران مزید 17 افراد کورونا وباء کی وجہ سے انتقال کرگئے اور اس وقت بھی کورونا کے 1200 مریضوں کی حالت تشویشناک بتائی گئی ہے۔ملک میں کورونا کیسز میں اضافے کے پیش نظر این سی او سی نے مساجد اور عبادت گاہوں میں کورونا ایس او پیز پر عملدرآمد یقینی بنانے کے لیے مراسلہ جاری کردیا ، جس میں کہا گیا ہے کہ ملک میں کورونا کی موجودہ لہر کا مسلسل جائزہ لیا جا رہا ہے ، ایسے میں صورتحال کو مدنظر رکھتے ہوئے مناسب وقت پر عبادت گاہوں سے متعلق ایس او پیزپر نظر ثانی ہوگی ، وزارت مذہبی امور مساجد میں کورونا ایس او پیز پر عملدرآمد یقینی بنائے اور علمائے کرام مساجد میں کورونا ایس او پیز پر عملدرآمد میں تعاون کریں ، اس کے علاوہ وزارت مذہبی امور ویکسی نیشن سے متعلق آگاہی کیلئے بھی علماء کی خدمات حاصل کرے۔ادھر اسلام آباد انتظامیہ اور وزارت تعلیم نے کورونا کے بڑھتے کیسز کے پیشِ نظر مشترکہ فیصلہ کیا ہے ، ڈپٹی کمشنر اسلام آباد حمزہ شفقات کا کہنا تھا کہ کورونا کیسز آنے پر اسکول بند کرنے کی بجائے صرف کلاس کو چھٹی دی جائے گی ، فیصلہ بچوں کی تعلیم کے حرج کو روکنے کے لیے کیا گیا ، نئی پالیسی پر انتظامیہ نے شہر بھر میں صرف کلاس روم بند کرنے کی ہدایات جاری کر دیں۔ڈسٹرکٹ ہیلتھ آفس کو بھی ڈپٹی کنشنر آفس کی جانب سے ہدایات جاری کر دی گئیں جب کہ سسٹنٹ کمشنر سیکرٹریٹ انیل سعید نے اسلام آباد کے مختلف علاقوں میں کورونا کے مثبت کیسز کی وجہ سے 4 سکولوں کو سربمہر کر دیا ، پیر کو اسسٹنٹ کمشنر سیکرٹریٹ اسلام آباد نے چھتر پارک، کری روڈ، کرنل امان اللہ روڈ اور پنڈ بیگوال میں کوویڈ 19 کے مثبت کیسز کی وجہ سے 4 سکولوں کو سیل کر دیا ۔