ایس درانی، وفاقی سیکرٹری تعلیم نے کہا "ہماری خواہش ہے کہ ایک لاکھ اسکولوں کے بچے اور پانچ ہزار اساتذہ اس شراکت داری کے پہلے سال کے اندر براہ راست استفادہ حاصل کریں۔" اسکولوں کے طلباء تک رسائی حاصل کرنے کے لیے متعدد پاکستانی یونیورسٹیاں اپنے آؤٹ ریچ پروگرام چلاتی ہیں۔تاہم، یونیورسٹی-اسکول تعاون کو رسمی شکل دینے کے لیے کوئی فریم ورک موجود نہیں ہے۔ ایڈیشنل سیکرٹری، محی الدین احمد وانی نے وضاحت کرتے ہوئے کہا، "پاکستان میں یہ پہلی بار ہونے جا رہا ہے کہ یونیورسٹی-اسکول تعاون کا ایک فریم ورک تیار کیا گیا ہے جس کا مقصد اسٹیم کی تعلیم کو اسکول کی سطح پر فروغ دینا ہے۔یہ فریم ورک اس بات کو یقینی بنانے کے لیے بنایا گیا ہے کہ لڑکوں کے ساتھ لڑکیاں بھی جدید تعلیم کے حصول میں پیچھے نہ رہیں،" انہوں نے مزید کہا۔ اس فریم ورک کے نفاذ کے لیے پہلے قدم کے طور پر، آٹھ اعلیٰ تعلیمی اداروں نے وزارتِ تعلیم کے ساتھ مفاہمت کی یادداشتوں پر دستخط کیے ہیں۔ ان میں نیشنل ٹیکسٹائل یونیورسٹی۔ فیصل آباد، این۔ایف۔سی انسٹی ٹیوٹ آف انجینئرنگ اینڈ فرٹیلائزرز ریسرچ۔ فیصل آباد، این۔ایف۔سی انسٹی ٹیوٹ آف انجینئرنگ اینڈ ٹیکنالوجی۔ ملتان، پاکستان انسٹی ٹیوٹ آف فیشن ڈیزائن۔ لاہور، فیڈرل کالج آف ایجوکیشن۔ اسلام آباد، علامہ اقبال اوپن یونیورسٹی۔ اسلام آباد، قائداعظم یونیورسٹی۔ اسلام آباد، اور نیشنل سکلز یونیورسٹی۔ اسلام آباد شامل ہیں۔ پارٹنر یونیورسٹیوں کے وائس چانسلرز نے ان اقدام کا خیرمقدم کیا ہے کیونکہ ان کے مطابق یہ اسکول کے طلباء کو یونیورسٹی کے لیے تیار ہونے کا موقع فراہم کرے گا۔ یہ قدم اسٹیم پاکستان کے پراجیکٹ کا حصہ ہے جس کے لیے ملالہ فنڈ وفاقی وزارت تعلیم اور پیشہ ورانہ تربیت کو مدد فراہم کر رہا ہے۔ اس سلسلے میں وزارت میں پاک الائنس فار سائنس اینڈ میتھ کی قیادت میں ایک پالیسی یونٹ بھی قائم کیا گیا ہے۔ ملالہ فنڈ کے پاکستان کے ڈائریکٹر جاوید احمد ملک نے اس موقع پر ہائی اسکولوں میں صنعتی رہنماؤں، یونیورسٹیوں، سائنس کے فروغ دینے والے اداروں، میڈیا اور سول سوسائٹی کے ارکان کے ساتھ شراکتداری پرزور دیا تاکہ معاشرے میں سائنس کی تعلیم کو فروغ دینے میں مدد مل سکے۔ انہوں نے مزید کہا، "اگر ہائی اسکولوں میں مؤثر لیبارٹری کا استعمال، آرٹ، اور کھیلوں کی تعلیم پر بھی توجہ دی جائے تو طلباء، خاص طور پر لڑکیوں کے سیکھنے کے عمل میں نمایاں بہتری لائی جا سکتی ہے۔"