میڈیا رپورٹس کے مطابق رکن پنجاب اسمبلی جلیل شرقپوری نے کہا ہے کہ عمران خان کی حکومت کو بیرونی حکم پر گرایا گیا لیکن اکیلاعمران خان ساری پی ڈی ایم پر بھاری ہے،قائداعظم کے بعد ہمیں عظیم لیڈرعمران خان کی صورت ملا جس کا ساتھ ہم کسی صورت نہیں چھوڑیں گے۔سٹی فوٹی ٹو کے مطابق مسلم لیگ ن کے منحرف ایم پی اے جلیل شرقپوری نےامریکی سازش کے حوالے سےکہا کہ نواز شریف ،زرداری کا اتحادامریکاکےحکم کےبغیرناممکن تھا، عمران خان کی حکومت کو بیرونی حکم پر گرایاگیا لیکن اکیلاعمران خان ساری پی ڈی ایم پر بھاری ہے۔دوسری جانب سابق گورنر پنجاب اور پی ٹی آئی کے رہنما چوہدری سرور کے ن لیگ سے معاملات طے پا گئے۔جنگ اخبار کی رپورٹ کے مطابق چوہدری سرور بہت جلد ن لیگ میں شمولیت کا اعلان کریں گے۔وہ ن لیگ کے ٹکٹ پر قومی اسمبلی کا انتخاب بھی لڑیں گے۔رپورٹ کے مطابق سابق گورنر چوہدری سرور لاہور کے علاقہ شاہدرہ کے حلقہ سے انتخاب لڑیں گے۔وہ عمرہ ادائیگی کے بعد آج صبح ہی پاکستان پہنچے ہیں۔سعودی عرب جانے سے قبل چوہدری سرور کی لیگی قیادت میں ملاقات ہوئی،ملاقات میں چوہدری سرور کو گورنر پنجاب بنانے کی پیشکش کی گئی تھی۔چوہدری سرور کی طرف سے لاہور سے انتخاب لڑنے کی خواہش پر لیگی قیادت نے کچھ وقت مانگا تھا۔چوہدری سرور کے بیٹے انس سرور اور نوازشریف کے درمیان ہوئی تھی ، نوازشریف سے ملاقات کے دوران معاملات طے پائے۔ تاہم چوہدری سرور کے ترجمان کا کہنا ہے کہ سابق گورنر نے سیاسی مستقبل کے حوالے سے ابھی کوئی فیصلہ نہیں کیا گیا۔ نجی چینلز بغیر تصدیق اور موقف لیے بغیر خبر دینے گریز کریں۔انہوں نے کہا کہ چوہدری سرور ساتھیوں سے مشاورت کے بعد کوئی بھی سیاسی فیصلہ کریں گے۔ سیاسی مستقبل کا جو بھی فیصلہ ہوگا خود میڈیا کو آگاہ کریں گے۔قبل ازیں بتایا گیا تھا کہ سابق گورنر پنجاب چوہدری محمد سرور رواں ماہ میں اپنے سیاسی مستقبل کا اعلان کریں گے ۔ ذرائع کے مطابق چوہدری محمد سرور گورنر پنجاب کے عہدے سے ہٹائے جانے کے بعد سے آئندہ کی سیاست کے حوالے سے اپنے قریبی رفقاء سے مشاورت کا عمل جاری رکھے ہوئے ہیں ۔ذرائع کے مطابق چوہدری سرور نے نہ صرف اندرون ملک بلکہ بیرون ممالک بھی اپنے قریبی دوستوں سے اس پر بھرپور مشاورت کے بعد حتمی فیصلہ کر لیا ہے جس کا اعلان رواں ماہ باقاعدہ پریس کانفرنس کر کے کیا جائے گا۔ سیاسی حلقوں میں چوہدری سرور کے آئندہ کے سیاسی مستقبل کے حوالے سے تجزیے کئے جارہے ہیں ۔ کچھ حلقوں کا کہنا ہے کہ چوہدری سرور کسی سیاسی جماعت میں شمولیت اختیار کریں گے جبکہ کچھ یہ تجزیہ کر رہے ہیں کہ چوہدری سرور اپنا الگ گروپ سامنے لائیں گے جو بھرپور انتخابی سیاست کرے گا اور عام انتخابات میں کامیابی کے بعد گروپ کی صورت میںہی کسی جماعت سے اتحاد کا فیصلہ کیا جائے گا۔