کمرے خالی کرانے کیلئےسی ڈی اے کا آپریشن پی ٹی آئی کے سابق رکن اسمبلی فرخ حبیب، ظہور احمد قریشی، شاندانہ گلزار، شاہد احمد خٹک، گل داد خان اور ارباب عامر ایوب سے پارلیمنٹ لاجز کے کمرے خالی کروالئے۔سی ڈی اے ذرائع نے بتایا کہ سابق وفاقی وزیر تعلیم شفقت محمود، علی حیدر زیدی، علی امین خان گنڈا پور، ملیکہ علی بخاری اور فہیم خان نے رضاکارانہ طور پر اپنے کمرے خالی کردیئے تھے۔ پی ٹی آئی کے دیگر اراکن اسمبلی نے کمرے خالی کرنے کیلئے مزید کچھ روز کی مہلت مانگ لی کیونکہ انہیں مختلف یوٹیلیٹی سروس فراہم کرنے والی کمپنیوں سے نو آبجیکشن سرٹیفکیٹ (این او سی) حاصل کرنا ہے۔حکام کا کہنا ہے کہ چند ماہ قبل پی ٹی آئی کے ارکان اسمبلی کے استعفے منظور کئے جانے پر سی ڈی اے نے کچھ ارکان اسمبلی سے پارلیمنٹ لاجز میں کمرے خالی کروائے تھے۔ان کا کہنا تھا کہ حال ہی میں مزید استعفوں کی منظوری کے بعد سی ڈی اے نے 24 جنوری کو تقریباً 80 ارکان اسمبلی کو نوٹس جاری کیے اور انہیں سرکاری رہائش گاہیں خالی کرنے کے لیے ایک ہفتے کا وقت دیا گیا۔پی ٹی آئی کے 131 ارکان اسمبلی نے گزشتہ برس اپریل میں سابق وزیراعظم عمران خان کے خلاف تحریک عدم اعتماد کامیاب ہونے کے بعد اجتماعی طور پر استعفیٰ دے دیئے تھے۔پی ٹی آئی نے پارلیمنٹ کا حصہ نہ بننے کا فیصلہ کیا تھا کیونکہ ان کا دعویٰ تھا کہ پی ٹی آئی حکومت کو عالمی سازش کے ذریعے ہٹایا گیا تھا۔