عوامی مسائل کا حل ہماری ترجیح ہے جاری منصوبوں میں کسی قسم کی تاخیر برداشت نہیں کی جائیگی، عوام کی سہولت کیلئے بنائے گئے منصوبوں میں کام کے معیار پر کوئی سمجھوتہ نہیں کیا جائے گا۔تفصیلات کے مطابق وزیر اعلیٰ گلگت بلتستان خالد خورشید نے رٹو میں 5 کلو میٹر طویل لنک روڑ کا افتتاح کر دیا۔ اس موقع پر وزیر اعلیٰ گلگت بلتستان خالد خورشید کو سیکریٹری تعمیرات صفدر خان نے بریفنگ دیتے ہوئے کہا کہ رٹو لنک روڑ کی تعمیر علاقے کی عوام کا دیرینہ مطالبہ تھا ،اس روڑ کی تعمیر سے مواصلاتی رابطے بہتر ہونگے ،بنجر زمینوں سے سٹرک منسلک ہونے سے اس زمین کو بھی قابل کاشت بنانے میں مدد ملے گی ،زرعی اجناس کو بروقت منڈی پہنچا کر کسان اچھا منافع حاصل کر سکیں گے۔ وزیر اعلیٰ گلگت بلتستان خالد خورشید نے بعد ازاں ناصر آباد واٹر سپلائی سکیم کا بھی افتتاح کردیا۔ اس سکیم سے سینکڑوں گھرانے مستفید ہونگے۔ اس موقع پر وزیر اعلیٰ گلگت بلتستان خالد خورشید نے اس موقع پر گفتگو کرتے ہوئے کہا کہ ناصر آباد واٹر سپلائی سکیم کی تکمیل سے علاقے کے عوام کا صاف پانی کی فراہمی کا دیرینہ مطالبہ مستقل طور پر حل ہوگا۔ انہوں نے محکمہ تعمیرات کے حکام کو ہدایت کی کہ اس منصوبے کی مقررہ مدت میں تکمیل یقینی بنائی جائے ،کام کے معیار پر کوئی سمجھوتہ نہیں کیا جائے، ہم عوام کے ووٹ سے منتخب ہو کر آئے ہیں ، عوامی مسائل حل کرنا ہماری ترجیح ہے ۔