ذرائع کے مطابق ناگا چیتنیا نے دوسری شادی کی افواہوں کی تردید کی ہے تاہم کئی میڈیا رپورٹس میں دعویٰ کیا گیا کہ وہ ایک بزنس مین کی صاحبزادی سے شادی پر غور کررہے ہیں۔ ناگا چیتنیا اور سوبھیتا ڈھولیپالا کے قریبی ذرائع نے ان تمام خبروں کی تردید کی اور کہا کہ اداکار کی غیر فلمی شخصیت سے شادی کی افواہوں میں کوئی صداقت نہیں۔ ذرائع کے مطابق جوڑا تاحال ڈیٹ کررہا ہے اور ان کا تعلق مضبوط ہورہا ہے بلکہ وہ تو اپنے رشتے کو عوام کے سامنے لانے پر غور کررہے ہیں، دونوں ہی اپنی محبت کا اعتراف کرتے ہیں۔ ناگا چیتنا اور سوبھیتا ڈھولیپالا کے تعلق کی خبریں گزشتہ برس سے سامنے آنا شروع ہوئیں اور وقتاً فوقتاً دونوں کی تصویر بھی انٹرنیٹ پر وائرل ہوتی رہی ہیں۔ گزشتہ برس اگست میں ایک انٹرویو کے دوران ناگا چیتنیا سے سوبھیتا سے متعلق موقف جاننے کی کوشش کی گئی تو انہوں نے جواب میں کہا کہ میں صرف مسکرا دیتا ہوں۔ اس کے بعد نومبر میں دونوں کی تصاویر سوشل میڈیا پر وائرل ہونے لگیں اور بڑا ٹرینڈ بن گئیں۔ میڈیا سے گفتگو میں سوبھیتا ڈھولیپالا نے کہا تھا کہ جو لوگ کم علمی میں باتیں بناتے ہیں، انہیں جواب دینے کی کوئی ضرورت نہیں۔ انہوں نے مزید کہا کہ جب میں نے کچھ غلط نہیں کیا تو میرا کام نہیں کہ میں آدھی معلومات کے حامل لوگوں کو وضاحت دوں۔ سوبھیتا ڈھولیپالا نے یہ بھی کہا کہ مجھے کسی بھی بات کی وضاحت دینے کے بجائے اپنی زندگی اور پرسکون بنانے پر توجہ دینی چاہیے اور ایک اچھا انسان بننا چاہیے۔ ناگا چیتنا کی پہلی شادی سمانتھا پرابھو کے ساتھ ہوئی تھی جو 4 سال چلی، جس کے بعد دنوں نے سوشل میڈیا بیان کے ذریعے راہیں جدا کرنے کا اعلان کیا تھا۔