10:06 am
بلند حوصلہ قومی ٹیم دوسری آزمائش کیلئے تیار

بلند حوصلہ قومی ٹیم دوسری آزمائش کیلئے تیار

10:06 am

اسلام آباد(نیو زڈیسک)پاکستان اور نارتھمپٹن شائر کے درمیان ٹور میچ پیر کو کھیلا جارہا ہے، بلند حوصلہ شاہینوں نے دوسری آزمائش کیلیے پرتول لیے، کھلاڑی اہم ترین دورے میں فتوحات کا سلسلہ جاری رکھنے کیلیے پراعتماد ہیں، بیٹسمینوں کو کنڈیشنز سے ہم آہنگ ہونے کیلیے مزید وقت ملے گا، بولرز بھی ردھم میں آنے کیلیے کوشاں ہیں، مزید کھلاڑیوں کو اہم معرکوں کیلیے تیار ہونے کا موقع فراہم کیا جاسکتا ہے، فاسٹ بولر محمد حسنین کو بھی آزمائے جانے کا امکان ہے، گذشتہ میچ میں ناکام رہنے
والے اہم بیٹسمین بھی اپنے ہاتھ کھولنے کو بیتاب ہیں۔تفصیلات کے مطابق پاکستان اپنے اہم ترین دورہ انگلینڈ کا اپراعتماد آغاز کرچکا ہے، پہلے ٹور میچ میں گرین شرٹس نے کینٹ کو100 رنز کے بھاری مارجن سے زیر کیا، جس میں خاص طور پر بیٹسمینوں نے عمدہ پرفارم کرتے ہوئے ٹیم کو 7 وکٹ پر 358 رنز کا مجموعہ دلایا، خاص طور پر کیریئر کا 101 واں لسٹ اے میچ کھیلنے والے عماد وسیم نے جارحانہ بیٹنگ کرتے ہوئے 78 بالز پر 117 رنز کی ناقابل شکست اننگز کھیلی جس میں 4 چھکے اور 13 چوکے شامل تھے۔ جواب میں کینٹ کی ٹیم 45 ویں اوور میں 258 رنز پر آؤٹ ہوگئی تھی۔ اگرچہ یاسر شاہ نے 3 وکٹیں لی تھیں تاہم وہ 90 رنز دینے کی وجہ سے کافی مہنگے ثابت ہوئے تھے، فہیم اشرف، حسن علی اور فخر زمان بھی 2، 2 وکٹیں لینے میں کامیاب رہے تھے۔اس میچ میں کامیابی کے بعد اب گرین شرٹس اپنی دوسری آزمائش میں نارتھمپٹن شائر کے مدمقابل ہوں گے۔ پہلے میچ میں کامیابی کی بدولت پاکستان ٹیم کے حوصلے کافی بلند اور وہ اس دورے کے دوران فتوحات کا سلسلہ برقرار رکھنے کیلیے کوشاں ہیں، کھلاڑیوں کو کنڈیشنزسے ہم آہنگ ہونے کا مزید موقع ملے گا، خاص طو رپر بابر اعظم، سرفراز احمد اور شعیب ملک ہاتھ نہیں کھول پائے تھے، وہ اس بار تلافی کیلیے پراعتماد ہوں گے۔ ٹیم مینجمنٹ کی جانب سے دیگر کھلاڑیوں کو بھی پریکٹس کا موقع فراہم کیے جانے کا امکان ہے، خاص طور پر بولنگ میں محمد حسنین کوانگلش کنڈیشنز میں آزمائے جانے کی امید ہے۔اس دوران میزبان سائیڈ کے خلاف ایک روزہ سیریز اور اس کے بعد شیڈول ورلڈ کپ کیلیے موزوں کمبی نیشن کی تشکیل کے لیے بیٹنگ آرڈر میں ردوبدل کا بھی امکان ہے۔ماضی میں 2003 کے ٹور میں بھی پاکستان نے نارتھمپٹن شائر کے خلاف ایک میچ کھیلا تھا جس میں اسے 54 رنز سے کامیابی حاصل ہوئی تھی۔ یکم م ئی کو پاکستان نے لیسٹر شائر کے خلاف بھی ایک ٹورمیچ کھیلنا ہے، جس کے بعد 5 تاریخ کو انگلینڈ سے واحد ٹوئنٹی 20 میچ شیڈول ہے۔ میزبان سائیڈ کے خلاف 5 ایک روزہ میچز کی سیریز کا آغاز 8 مئی سے ہوگا، اس سیریز کے بعد بھی پاکستان کو میگا ایونٹ سے قبل افغانستان اوربنگلہ دیش کے خلاف دو وارم اپ میچز بھی کھیلنے کا موقع میسر آئے گا۔

تازہ ترین خبریں