اس وقت کشمیر کے حوالے سے کچھ ایشوز ہیں جن پر بات کرنی ہے۔آپ کے علم میں ہے کہ کشمیر کے علاقے پلوامہ میں بھارتی ریزرو پولیس فورس کے قافلے پر کار بم حملہ ہوا جس میں اخباری اطلاعات کے مطابق 40پولیس اہلکار ہلاک ہوئے اور 20کے قریب زخمی ہوئے۔کشمیر ی ایک طویل عرصے سے مزاحمت کی تحریک چلارہے تھے۔وہ خود کسی کو نہیں مارتے تھے۔البتہ بڑے بڑے جلوس نکالتے تھے ۔ان پر بھارتی فوج کی جانب سے پیلٹ گنز چلائی جارہی تھیں  اوران پر لاٹھی چارج کیا جاتا رہاہے اور طرح طرح کے مظالم روا رکھے جاتے ہیں ۔ان کی کوشش یہ ہے کہ کشمیر ی جوابی طور پر ہتھیار اٹھالیں۔لیکن الحمد للہ کشمیریوں نے استقامت کے ساتھ سب کچھ جھیلتے رہے۔ پلوامہ میں جو کچھ ہوا اس سے ظاہر ہوتا ہے کہ یہ سب کچھ کسی سازش کے تحت کیا گیا ہے۔بھارتی حکومت کا منصوبہ یہ تھا کہ اس کا الزام پاکستان پر ڈالا جائے گا۔لہٰذا اس کے فوری بعد بھارتی میڈیا نے اس سانحے کا الزام پاکستان پر لگانا شروع کردیا ہے ۔جبکہ دوسری طرف صورت یہ ہے کہ علاقائی اور بین الاقوامی حلقے اس بات سے واقف ہیں کہ خطے میں بھارت کی اہمیت کم ہوتی چلی جارہی ہے۔ جبکہ پاکستان جیوپولیٹکس کے حوالے سے ایسی کیفیت میں ہے کہ اس کی اہمیت بڑھ رہی ہے۔
امریکہ اور طالبان کا اگلا دور بھی پاکستان میںمتوقع ہے۔متحدہ عرب امارات کے بعد اب سعودی عرب کے ولی عہد کا بھی پاکستان میں شروع ہوچکا ہے۔سی پیک میں تیزی سے پیشرفت ہورہی ہے۔یہاں تک کہ روس بھی پاکستان کے ساتھ دفاع اور دیگر معاہدے کررہا ہے۔اس سے اندازہ ہوتا ہے کہ علاقے میں پاکستان کی اہمیت میں اضافہ ہورہا ہے۔اس سے اندازہ ہوتا ہے کہ بھارتی حکومت آئند ہ الیکشن  اور علاقائی سطح پر اپنی ساکھ بحال کرنے کے لئے  مظلومیت کا کارڈ استعمال کرنا چاہتی ہے ۔لہٰذا خود ہی ایک حملہ کرواکر اور اس کا الزام پاکستان پر دھر کر دنیا کی ہمدردیاں حاصل کرنا اس کا مقصد ہے۔
بہرحال حقیقت یہ ہے کہ اگر پاکستان میں صحیح معنوں میں ایک اسلامی فلاحی ریاست قائم ہوچکی ہوتی تو بھارت کو کبھی اس قسم کی حرکتوںکی ہمت نہ ہوتی کہ وہ کشمیریوں پر ظلم کے پہاڑ توڑے اور بھارتی مسلمانوں پر جابرانہ ہتھکنڈے استعمال کرنے کی جراء ت نہ ہوتی اور نہ اس قسم کے حملے خود کرواکر پاکستان پر الزام دھرسکتا۔ہم خود کمزور ہیں جس کی وجہ سے بھارت کو یہ مواقع مل رہے ہیں ۔ہم کمزور اس لئے ہیں کہ ہم نے اللہ اور اس کے دین کے ساتھ بیوفائی کررکھی ہے لہٰذا اس کی نصرت و تائید ہمارے ساتھ نہیں بلکہ اللہ ہی کی بتائی ہوئی سنت کے مطابق آج ہم ذلت و رسوائی کے عذاب میں مبتلا کردئیے گئے ہیں۔
دوسرا ایشو سعودی عرب کے ولی عہد محمد بن سلمان کا دو روزہ دورہ دونوں برادر ممالک کے مضبوط تعلقات کا ثبوت ہے۔یہ اس بات کی دلیل بھی ہے کہ مختلف امور میں دونوں ممالک میں تعاون میں اضافہ ہورہا ہے۔ درحقیقت وقت کی ضرورت یہ ہے کہ روئے ارضی پر موجود تمام 58مسلم ممالک ایک پلیٹ فارم پر اکٹھے ہوں دنیا پرستی اور تعیش کی روش چھوڑکر امت واحدہ کی صورت اختیار کریں تاکہ دشمنان اسلام کی مسلمانوں کے خلاف ہم منہ توڑ جواب دے سکیں۔اللہ تعالیٰ ہمیں اس کی توفیق عطا فرمائے۔آمین یا رب العالمین۔