ابو نصر الصیاد نامی ایک شخص، اپنی بیوی اور ایک بچے کے ساتھ غربت و افلاس کی زندگی بسر کر رہا تھا۔ ایک دن وہ اپنی بیوی اور بچے کو بھوک سے نڈھال اور بلکتا روتا گھر میں چھوڑ کر خود غموں سے چُور کہیں جا رہا تھا کہ راہ چلتے اس کا سامنا ایک عالم دین احمد بن مسکین سے ہوا، جسے دیکھتے ہی ابو نصر نے کہا؛ اے شیخ میں دکھوں کا مارا ہوں اور غموں سے تھک گیا ہوں۔شیخ نے کہا میرے پیچھے چلے آئو، ہم دونوں سمندر پر چلتے ہیں۔ سمندر پر پہنچ کر شیخ صاحب نے اسے دو رکعت نفل نماز پڑھنے کو کہا، نماز پڑھ چکا تو اسے ایک جال دیتے ہوئے کہا اسے بسم اللہ پڑھ کر سمندر میں پھینکو۔جال میں پہلی بار ہی ایک بڑی ساری عظیم الشان مچھلی پھنس کر باہر آ گئی۔ شیخ صاحب نے ابو نصر سے کہا، اس مچھلی کو جا کر فروخت کرو اور حاصل ہونے والے پیسوں سے اپنے اہل خانہ کیلئے کچھ کھانے پینے کا سامان خرید لینا۔ابو نصر نے شہر جا کر مچھلی فروخت کی، حاصل ہونے والے پیسوں سے ایک قیمے والا اور ایک میٹھا پراٹھا خریدا اور سیدھا شیخ احمد بن مسکین کے پاس گیا اور اسے کہا کہ حضرت ان پراٹھوں میں سے کچھ لینا قبول کیجئے۔ شیخ صاحب نے کہا اگر تم نے اپنے کھانے کیلئے جال پھینکا ہوتا تو کسی مچھلی نے نہیں پھنسنا تھا، میں نے تمہارے ساتھ نیکی گویا اپنی بھلائی کیلئے کی تھی نہ کہ کسی اجرت کیلئے۔ تم یہ پراٹھے لے کر جائو اور اپنے اہل خانہ کو کھلائو۔ابو نصر پراٹھے لئے خوشی خوشی اپنے گھر کی طرف جا رہا تھا کہ اس نے راستے میں بھوکوں ماری ایک عورت کو روتے دیکھا جس کے پاس ہی اس کا بے حال بیٹا بھی بیٹھا تھا۔ ابو نصر نے اپنے ہاتھوں میں پکڑے ہوئے پراٹھوں کو دیکھا اور اپنے آپ سے کہا کہ اس عورت اور اس کے بچے اور اس کے اپنے بچے اور بیوی میں کیا فرق ہے؟ معاملہ تو ایک جیسا ہی ہے، وہ بھی بھوکے ہیں اور یہ بھی بھوکے ہیں۔ پراٹھے کن کو دے؟ عورت کی آنکھوں کی طرف دیکھا تو اس کے بہتے آنسو نا دیکھ سکا اور اپنا سر جھکا لیا۔ پراٹھے عوررت کی طرف بڑھاتے ہوئے کہا یہ لو؛ خود بھی کھائو اور اپنے بیٹے کو بھی بھی کھلائو۔ عورت کے چہرے پر خوشی اور اس کے بیٹے کے چہرے پر مسکراہٹ پھیل گئی۔ابو نصر غمگین دل لئے واپس اپنے گھر کی طرف یہ سوچتے ہوئے چل دیا کہ اپنے بھوکے بیوی بیٹے کا کیسے سامنا کرے گا؟گھر جاتے ہوئے راستے میں اس نے ایک منادی والا دیکھا جو کہہ رہا تھا؛ ہے کوئی جو اسے ابو نصر سے ملا دے؟ لوگوں نے منادی والے سے کہا یہ دیکھو تو، یہی تو ہے ابو نصر۔ اس نے ابو نصر سے کہا؛ تیرے باپ نے میرے پاس آج سے بیس سال پہلے تیس ہزار درہم امانت رکھے تھے مگر یہ نہیں بتایا تھا کہ ان پیسوں کا کرنا کیا ہے۔ جب سے تیرا والد فوت ہوا ہے میں ڈھونڈتا پھر رہا ہوں کہ کوئی میری ملاقات تجھ سے کرا دے۔ آج میں نے تمہیں پا ہی لیا ہے تو یہ لو تیس ہزار درہم، یہ تیرے باپ کا مال ہے۔ابو نصر کہتا ہے؛ میں بیٹھے بٹھائے امیر ہو گیا۔ میرے کئی کئی گھر بنے اور میری تجارت پھیلتی چلی گئی۔ میں نے کبھی بھی اللہ کے نام پر دینے میں کنجوسی نہ کی، ایک ہی بار میں شکرانے کے طور پر ہزار ہزار درہم صدقہ دے دیا کرتا تھا۔ مجھے اپنے آپ پر رشک آتا تھا کہ کیسے فراخدلی سے صدقہ خیرات کرنے والا بن گیا ہوں۔ایک بار میں نے خواب دیکھا کہ حساب کتاب کا دن آن پہنچا ہے اور میدان میں ترازو نصب کر دیا گیاہے۔ منادی کرنے والے نے آواز دی ابو نصر کو لایا جائے اور اس کے گناہ و ثواب تولے جائیں۔کہتا ہے؛ پلڑے میں ایک طرف میری نیکیاں اور دوسری طرف میرے گناہ رکھے گئے تو گناہوں کا پلڑا بھاری تھا۔میں نے پوچھا آخر کہاں گئے ہیں میرے صدقات جو میں اللہ کی راہ میں دیتا رہا تھا؟تولنے والوں نے میرے صدقات نیکیوں کے پلڑے میں رکھ دیئے۔ ہر ہزار ہزار درہم کے صدقہ کے نیچے نفس کی شہوت، میری خود نمائی کی خواہش اور ریا کاری کا ملمع چڑھا ہوا تھا جس نے ان صدقات کو روئی سے بھی زیادہ ہلکا بنا دیا تھا۔ میرے گناہوں کا پلڑا ابھی بھی بھاری تھا۔ میں رو پڑا اور کہا، ہائے رے میری نجات کیسے ہوگی؟منادی والے نے میری بات کو سنا تو پھر پوچھا؛ ہے کوئی باقی اس کا عمل تو لے آئو۔میں نے سنا ایک فرشہ کہہ رہا تھا ہاں اس کے دیئے ہوئے دو پراٹھے ہیں جو ابھی تک میزان میں نہیں رکھے گئے۔ وہ دو پراٹھے ترازو پر رکھے گئے تو نیکیوں کا پلڑا اٹھا ضرور مگر ابھی نا تو برابر تھا اور نا ہی زیادہ۔منادی کرنے والے نے پھر پوچھا؛ ہے کچھ اس کا اور کوئی عمل؟ فرشتے نے جواب دیا ہاں اس کیلئے ابھی کچھ باقی ہے۔ منادی نے پوچھا وہ کیاہے؟ کہا اس عورت کے آنسو جسے اس نے اپنے دو پراٹھے دیئے تھے۔عورت کے آنسو نیکیوں کے پلڑے میں ڈالے گئے جن کے پہاڑ جیسے وزن نے ترازو کے نیکیوں والے پلڑے کو گناہوں کے پلڑے کے برابر لا کر کھڑا کر دیا۔ ابو نصر کہتا ہے میرا دل خوش ہوا کہ اب نجات ہو جائے گی۔منادی نے پوچھا ہے کوئی کچھ اور باقی عمل اس کا؟فرشتے نے کہا؛ ہاں، ابھی اس بچے کی مسکراہٹ کو پلڑے میں رکھنا باقی ہے جو پراٹھے لیتے ہوئے اس کے چہرے پر آئی تھی۔ مسکراہٹ کیا پلڑے میں رکھی گئی نیکیوں والا پلڑا بھاری سے بھاری ہوتا چلا گیا۔ منادی کرنے ولا بول اٹھا یہ شخص نجات پا گیا ہے۔ابو نصر کہتا ہے؛ میری نیند سے آنکھ کھل گئی اور میں نے اپنے آپ سے کہا؛ اے ابو نصر آج تجھے تیرے بڑے بڑے صدقوں نہیں بلکہ ’’آج تجھے تیری 2 روٹیوں نے بچا لیا۔‘‘میں نے یہ واقعہ تاریخ کی کتاب میں پڑھا تو میں لرز اُٹھا۔ اور میں یہ سوچنے پر مجبور ہو گیا کہ بسا اوقات اِنسان چھوٹی چھوٹی نیکیوں پر توجہ نہیں دیتا۔ امرِواقعہ تو یہی ہے کہ اللہ تعالیٰ اِس بات کو زیادہ پسند کرتا ہے کہ اُس کی مخلوق کی خدمت کی جائے۔ دنیا میں بڑے بڑے مخیرحضرات ہیں۔ جو قومی اور بین الاقوامی سطح پر عالمی مسائل کے حل کے لئے خیرات کرتے ہیں۔ مگر یہ لوگ بسا اوقات نجی اور انفرادی سطح کے مسائل حل کرنا اپنی توہین سمجھتے ہیں یا پھر ایسے مسائل قبول کرنے سے انکار کر دیتے ہیں۔ ایسے لوگوں کو چاہئے کہ وہ ابونصر کے اِس واقعہ سے ضرور سبق حاصل کریں۔ کیونکہ انسان نہیں جانتا کہ اللہ تعالیٰ کی بارگاہ میں اُس کا کون سا عمل کس قدر اہمیت کا حامل ہے؟ روزِ حساب کے وقت اِنسان ایک ایک نیکی کے لئے ترس رہا ہو گا۔ پس اِس زندگی میں اِنسان کو چھوٹی سے چھوٹی نیکی کا موقع بھی ہاتھ سے نہیں جانے دینا چاہئے، جسے اِنسان ایک چھوٹی سی نیکی سمجھ رہا ہوتا ہے خدا کے حضور اُس نیکی کا کیا اجر ہے اِس کے بارے میں اندازہ ہی نہیں لگایا جا سکتا، میری دُعا ہے کہ اللہ تعالیٰ ہمیں حقیقی عبادت اور صدقہ و خیرات کی توفیق عطا فرمائے ۔آمین ثم آمین۔