حرمین شریفین عظیم ترین نعمتیں ہیں اہل اسلام اور اہل ایمان کے لئے‘ ویسے تو حرمین شریفین سے شدید محبت کا عہد ماضی بعید میں بھی واضح طور پر ملتا ہے عبداللہ بن زبیرؓ نے جب مکہ مکرمہ کا اقتدار سنبھالا جس کی مدت نو سال تھی تو انہوں نے بیت اللہ کی قدیمی عمارت کو منہدم کرکے نئی عمارت تعمیر کی جس میں حطیم کی جگہ بھی شامل کی تھی انہوں نے اپنی خالہ عائشہؓ سے سن رکھا تھا کہ آپؐ نے فرمایا‘ عائشہؓ  اگر تمہاری قوم کی گمراہی اور تعصب کا ڈر نہ ہوتا تو میں بیت اللہ کی نئی تعمیر کرتا اور حطیم کو بھی اسی طرح بیت اللہ کا حصہ بناتا جس طرح حضرت ابراہیمؒ و اسماعیلؒ نے بنایا تھا۔ مگر جب اموی دمشقی خلافت نے مکہ مکرمہ کا اقتدار‘ عبداللہ بن زبیرؓ کو شہید کرکے حاصل کیا‘ گورنر حجاج بن  یوسف نے عبداللہ بن زبیرؓ کے تعمیر کردہ نئے بیت اللہ کی عمارت کو زمین بوس کیا‘ پھر سے حطیم کو الگ کیا اور پرانی بنیادوں پر بیت اللہ بنا دیا۔ مگر جب خلیفہ عبدالملک بن مروان کو عائشہؓ سے نبویؐ گفتگو کی حقیقت معلوم ہوئی تو اس نے بہت تاسف کیا‘ کاش حجاج بن یوسف عبداللہؓ بن زبیر کی بنائی ہوئی عمارت کو باقی رکھتے تاکہ نبویؐ خواہش عملاً موجود رہتی ۔ حجاج بن یوسف بہت ظالم‘ جابر اموی گورنر تھے۔ اکثر وہ دمشقی اموی خلافت کے وفادار تھے۔ اور حجاز مقدس میں فکری بغاوتوں کو کچلنے کے لئے صحابہ کرامؓ‘ تابعین کرام کو بھی قتل کرواتے رہے۔ وہ ہیرو کم ولن زیادہ نظر آتے ہیں۔ مگر قرآن پاک پر اعراب لگوانا بھی انہی کا کارنامہ ہے کیونکہ عجمی مفتوحہ علاقوں کے مسلمان اکثر قرآن پاک کی تلاوت کرتے ہوئے غلط ادائیگی الفاظ و حروف کرتے ۔ یہی ظالم و جار موت کی دہلیز پر کھڑا ہے۔ حجاج بن یوسف ‘ تو بہت ہی عاجز ہوگیا تھا ۔ موت کی دہلیز پر کون کون کیا ہوگیا؟ یہ پڑھنا ہو تو ابوالکلام آزاد کی ’’انسانیت موت کے دروازے پر‘‘ کا مطالعہ کریں۔ سندھ کی فتح کا سہرا اسی حجاج بن یوسف کے نام ہے۔ محمد بن قاسم اس کا بھیجتا تھا جس نے راجہ داہر کو شکست دے کر سندھ کو باب  اسلام بنا دیا تھا۔
بات حرمین شریفین کی ہو رہی تھی۔ ترکوں نے یعنی خلافت عثمانیہ نے حرمین شریفین سے شدید محبت کی تھی۔ حرمین  شریفین کی تعمیرات نئے انداز میں توسیع کے ساتھ مکمل کیں۔ جب جب اللہ تعالیٰ  نے حرمین شریفین کی زیارت کی نعمت سے نوازا۔ تو میں نے ترک تعمیرات کا خاص طورپر جائزہ لیا۔ یوں ترکوں سے محبت ان کی حرمین شریفین سے شدید محبت کے سبب پیدا ہوئی۔ مجھے اعتراف ہے کہ میں ترک مسلمانوں کو بہت پسند کرتا ہوں۔ ان کی عثمانی خلافت نے یورپ تک کو اسلام اور مسلمانوں کے لئے مفتوح بنایا تھا مگر میں ترکوں سے کہیں زیادہ آل سعود کی حکومتوں اور سعودی عوام کی زیادہ عزت کرتا ہوں۔ بلکہ ان سے زیادہ محبت کرتا ہوں۔ اس کا سبب بھی آل سعود کا حرمین شریفین کی عظم ترین وسعت  تجدیدات اورحجاج کی مسلسل خدمت کا وہ دائمی معاملہ ہے جس کا آغاز شاہ عبدالعزیز نے خود کیا۔ نکاسی آب کے لئے بیت اللہ کے اردگرد بہت بڑے زمین دوز نالے تعمیر کئے ورنہ بارشوں  میں بیت اللہ‘ نشینی علاقہ ہونے کے سبب اور پہاڑوں سے اترنے والے  پانی کے سبب اکثر سیلاب سے دوچار ہوتا۔ شاہ عبدالعزیز نے بہت مال خرچ کرکے بارش کے سیلابی پانی کو باہر نکالنے کا نظام وضع کیا۔ پھر شاہ سعود بن عبدالعزیز نے کچھ کام بیت اللہ کی تزئین و آرائش کا کیا۔ شاہ فہد نے تو مسجد نبویؐ کی توسیع کے لئے پورے قدیمی مدینہ منورہ کو خرید کر توسیع کر دی۔ بیت اللہ شریف میں بھی بہت عمدہ توسیع کی۔ جدید توسیع کو ٹھنڈا رکھا گیا۔ پھر شاہ عبداللہ  نے بیت اللہ میں عظیم ترین توسیع کے لئے ملحقہ علاقہ جات کو خریدا‘ اس پر بن لادن کمپنی جو سعودیہ کی قدیم تعمیراتی کمپنی ہے کے ذریعے تعمیرات شروع کیں۔ شاہ سعود  سے پہلے طواف کرنے والے‘ سعی کرنے والے کنکروں کے اوپر چلتے تو پائوں زخمی ہوجاتے تھے مگر آج ایسا نہیں ہے۔
یوں سعودیوں نے یعنی آل سعود کی بادشاہتوں نے حرمین شریفین کی خدمت اور توسیع میں تاریخ ساز  اور منفرد خدمات سرانجام دیں۔  یہ حرمین شریفین کی خدمت ہی تھی جس کے سبب دنیا بھر کے  مسلمانوں  نے شاہ عبدالعزیز‘ شاہ فیصل‘ شاہ خالد‘ شاہ عبداللہ کو غیر متنازعہ مسلمان قائد کے طور پر قبول کیا تھا۔ ان سب کا مرکز سیاست ’’عرب قوم پرستی‘‘ نہیں بلکہ ’’اسلامیت‘‘ تھا جو شائد آج کل زیادہ ہونا چاہیے۔
حرمین شریفین میں جو سیوریج کا سعودی تعمیر شدہ نظام ہے وہ کس قدر توسیع اور پائیدار ہے خدنخواستہ اگر سیوریج کا  یہ نظام حرمین شریفین خراب ہو جائے تو کس قدر تعفن اور بدبو  پیدا ہوگی؟ یہ بات مجھے مدینہ منورہ میں مسجد نبویؐ کی انتظامیہ کے ایک فرد نے بتائی تھی حرمین کو گرمیوں میں ٹھنڈا رکھنے کا جو نظام ہے وہ عظيم سعودی خدمت ہے۔ اللہ آل سعود کی خدمات کو قبول فرمائے۔ آمین
آج صبح جب میں مکہ مکرمہ سے نشر ہونے والے چینل پر تلاوت قرآن پاک سن رہا تھا تو اچانک حرمین  شریفین کی یادنے بے تاب کر دیا۔ یہ سطور اسی شوق کا اظہار ہے۔ شاہ سلمان کا عہد ایسا منفرد ہے کہ  میں حرمین شریفین کی زیارت‘ حج و عمرہ سے مسلسل محروم ہوں۔ میدان احد میں جا کر شہداء سے ملاقات کی نیت کئے ہوئے کئی سال بیت گئے ہیں انشاء اللہ وہ دن بھی آئیں گے جب پھر ہم حرمین جائیں گے۔