12:36 pm
اپوزیشن!استعفے، انتخابات کا بائیکاٹ ختم!!

اپوزیشن!استعفے، انتخابات کا بائیکاٹ ختم!!

12:36 pm

٭تبدیلی، اپوزیشن استعفے نہیں دے گی، ضمنی اور سینٹ کے انتخابات میں حصہ لے گی، البتہ لانگ مارچ ضرور ہو گاO نوازشریف نے اسمبلیوں کے حلف کی غلطی مان لی:فضل الرحمانO بے نظیر بھٹو کی برسی پر مریم نواز کی خوشی، تالیاںO بھارتی فوج نے سرحدپر 35 بنگلہ دیشی ہلاک، 25 زخمی کر دیئےO دہلی: کسانوں کا محاصرہ جاری، بھوک ہڑتالO نوازشریف کی دوسری بیٹی اسما نواز بھی نیب کی زد میں، غیر قانونی اثاثوں کی تحقیقاتO فوج کے مخالف بیانات، کارروائی شروع، جے یو آئی کے مفتی کفائت اللہ پہلے ملزم!O گڑھی خدا بخش، اپوزیشن اتحاد کو بلاول زرداری کا کھانا: سندھ کی مشہور کڑاہی، دم پخت مچھلی، سندھی بریانی، تِکے، شیش کباب، بھنا قیمہ، چھوٹا گوشت، سجی، روغنی نان، کھیر، گجریلاO وفاقی وزیراسد عمر کا بھنگڑاO بُشریٰ انصاری، 36 سال بعد طلاق O پنجاب اسمبلی، نئی عمارت 15 برسوں میں بھی نامکمل! اربوں خرچ ہو چکے ہیںO مولانا شیرانی، اسلام آباد میں اجلاسO استعفے نہ دیئے جائیں، سید خورشید شاہ۔
٭اپوزیشن اتحاد ’پی ڈی ایم‘ نے بالآخر راستہ بدل لیا۔ استعفے دینے اور ضمنی و سینٹ کے انتخابات نہ لڑنے کا فیصلہ واپس لے لیا۔ اب صرف لانگ مارچ ہو گا جسے شیخ رشید نے ’لونگ گواچا‘ مارچ کا نام دیا ہے۔ یوں مولانا کے استعفوں اور انتخابات کے بائیکاٹ کے گرم مطالبے ختم ہو گئے اور صرف لانگ مارچ باقی رہ گیا ہے، اس کا فیصلہ بھی یکم فروری کو پی ڈی ایم کے اجلاس میں کیا جائے گا۔ اس سے مولانا کی مایوسی اور بددلی کا اندازہ لگایا جا سکتا ہے۔ گزشتہ برس مولانا نے اسلام آباد میں آل پارٹیز کانفرنس بلائی۔ اس میں بلاول زرداری اور شہباز شریف نے عمران خاں کے خلاف زوردار تقریریں کیں مگر جلسے میں آخر تک نہیں ٹھہرے، تقریریں کیں اور چلے گئے۔ دو ہفتے پہلے، 13 دسمبر کو بلاول زرداری جلسہ میں دیر سے آئے۔ تقریر کی اور مولانا کی تقریر شروع ہوتے ہی جلسہ سے چلے گئے، ان کے ساتھ ہی پیپلزپارٹی کے سارے ارکان بھی چلے گئے۔ مریم نواز کی تقریر کے بعد بھی ن لیگ کے لوگ چلے گئے۔ مولانا کے سامنے دو تہائی کرسیاں خالی ہو چکی تھیں۔ مولانا سخت ناراضی کے عالم میں بے نظیر بھٹو کی برسی میں نہیں آئے۔ اس دوران پیپلزپارٹی کے اصل قائدآصف زرداری نے پارٹی کو استعفے دینے اور انتخابات کا بائیکاٹ کرنے سے روک دیا۔ سید خورشید شاہ (سخت بیمار ہیں) نے بھی مشورہ دے دیا ہے کہ استعفوں کی حماقت نہ کرنا، تحریک انصاف خالی نشستوں پر قبضہ کر لے گی۔ ویسے استعفوں کا معاملہ اس لئے مضحکہ خیز رہا کہ جس اسمبلی کو جعلی کہا جا رہا ہے اس کا سپیکر بھی جعلی قرار پائے گا! اس ’جعلی‘ سپیکر کو استعفوں کی قانونی حیثیت کیا ہو گی؟ پھر یہ کہ اسی جعلی اسمبلی کے ذریعے مولانا فضل الرحمان نے صدارتی الیکشن لڑا! جیت جاتے تو جعلی اسمبلی کو درست مان لیتے! اور پھر بیٹا اور اس کے ساتھی بدستور اسی ’جعلی‘ اسمبلی سے روزی روٹی کما رہے ہیں۔ یعنی غلط ہو یا درست، ہر حالت میں اپنا فائدہ! پروین شاکر کا شعر یاد آگیا کہ ’’اس شرط پر کھیلوں گی میں پیا پیار کی بازی! جیتوں تو میں تجھ کو پائوں، ہاری تو تمہاری!‘‘ آیئے دوسری باتیں کریں، مولانا کو تو اس وقت اپنی پارٹی میں ٹوٹ پھوٹ پریشان کر رہی ہے۔  بوقت تحریر جے یو آئی کے چار سینئر باقی ارکان مولانا شیرانی، حافظ حسین احمد، مولانا گل نصیب اور مولانا شجاع الملک کی زیر قیادت پارٹی کے باغی ارکان کا اجلاس ہونے والا تھا اب تک کوئی فیصلہ آ گیا ہو گا!
٭اہم سنجیدہ باتیں چھوڑ کر اچانک ایک ہلکی پھلکی بات! میرا ایک سال پہلے کا 28 دسمبر 2019ء کا کالم راوی نامہ! لکھا ہے کہ ’’گزشتہ روز وفاقی وزیر اسد عمر نے بیٹے آصف عمر کی شادی کی تقریب میں زوردار بھنگڑا ڈالا‘‘ پتہ نہیں اب بھی بھنگڑا ڈالتے ہیں یا نہیں، ویسے تو سرکاری بھان متی کا کنبہ ڈھائی سال سے مسلسل بھنگڑا ہی ڈال رہا ہے، (ادرک 1000 روپے، لہسن 400 روپے کلو، انڈے 300 روپے درجن!) اسی کالم میں بھنگڑے کی ایک دلچسپ روداد بھی ہے۔ بہت عرصہ پہلے ایک بھارتی پنجابی فلم ’بھنگڑا‘ آئی تھی اس کی ہیروئن نے مسلسل 40، 45 منٹ تک زبردست بھنگڑا ڈالا۔ اس نے ساتھ بھنگڑا ڈالنے والے ہیرو کو مخاطب ہو کر کہا، ’’وے میں پندرہ مربعیاں والی، کچہری وِچ ملے کرسی!‘‘ اور ہیرو جواب میں کہتا ہے کہ ’’نِی! مینوں بِن تنخْواہوں کُڑیے! مربعیاں تے رکھ مُنشی!!‘‘ اسی کالم میں وفاقی معاون خصوصی، فردوس عاشق اعوان، کا ایک ’فرمان‘ بھی درج ہے۔ کہ عمران خاں نے دنیا کو پاکستان کا ’’روشن درخشاں‘‘ چہرہ دکھا دیا ہے (موصوف ایسی تعریف پر جھومنے لگتے ہیں) کالم میں خاتون کو مشورہ دیا گیا کہ بی بی ’درخشاں‘ کے معنی بھی ’روشن‘ کے ہی ہیں۔ اس رائے کا اثر یہ ہوا کہ اس سال فرمایا کہ ’’ماں رمضان کا مہینہ‘‘ بہت متبرک ہے۔ میں نے مزید رائے دینی چھوڑ دی!
٭ایک اور اہم بات بلکہ بھرپور معذرت! گزشتہ کالم میں لکھا کہ تحریک انصاف میں دو فردوس جمع ہو گئی ہیں، فردوس عاشق اعوان اور فردوس شمیم نقوی!! معذرت، معذرت! فردوس شمیم نقوی خاتون نہیں اچھے خاصے زبردست قسم کے مرد ہیں، سندھ اسمبلی میں اپوزیشن لیڈر ہیں۔ بس بے خیالی میں انہیں خاتون بنا دیا۔ یہ معاملہ میرے ساتھ بھی پیش آتا رہا ہے۔ بعض خواتین کا نام سرفراز بھی ہوتا ہے۔ بچپن میں نارووال میں ہمارے ہمسایہ میں ایک لڑکی کا نام سرفراز تھا۔ وہ صبح دیر سے سو کر اٹھتی تھی تو اس کی ماں اونچی اونچی اس کا نام لے کر گالیاں دیا کرتی تھی! میں بہت جلا کرتا تھا۔ مجھے اسلام آباد کی مرحومہ سرفراز اقبال یادآ گئیں! کیا عظیم خاتون تھی! اسلام آباد میں اپنے شاندار گھر کو ملک بھر سے آنے والے ادیبوں شاعروں کے لئے مہمان خانہ بنا دیا۔ (فریدہ حفیظ کی پکی سہیلی تھیں) مجھے بھی اس مہمان خانے میں احمد فراز کے ساتھ قیام کا شرف حاصل ہوا! کیسے کیسے لوگ چلے گئے! اب ڈھونڈ انہیں چراغ رُخِ زیبا لے کر!
٭قارئین کرام! بات کہیں کی کہیں نکل گئی۔ ایک کسان کھیت میں ہل چلا رہا تھا۔ اس کے ہم سایہ نے کہا کہ ہوش کر! کیسا ٹیڑھا ہل چلا رہا ہے! کسان بولا کہ ’تم نے کون سا بیٹی کی شادی پر مجھے بلایا تھا؟‘ وہ شخص بولا کہ سوال کچھ تھا، یہ کیا جواب ہوا؟ کسان بولا کہ اسی طرح بات میں سے بات نکلا کرتی ہے!
٭پھر بوجھل سیاسی باتیں! کسی کی برسی کی فضا بہت سوگوار ہوتی ہے۔ اس میں صرف مرحومین کے لئے قرآن خوانی، نعت خوانی، مغفرت کی دعائیں اور مرحومین کی صفات بیان کی جاتی ہیں۔ پنجاب کی ہر وقت ہر موقع پر بولتے رہنے والی اطلاعات کی معاون خصوصی محترمہ فردوس عاشق اعوان نے اعلان کیا کہ گڑھی خدا بخش میں بے نظیر بھٹو کی برسی پر سیاسی تھیٹر لگایا جا رہا ہے۔ میں نے ان الفاظ پر سخت گرفت کی مگر…مگر! برسی کی تقریب تو واقعی ’سیاسی تھیٹر‘ نکلی! مریم نواز نے تقریر کا آغاز ان الفاظ سے کیا کہ ’’مجھے برسی کی تقریب میں آ کر بہت خوشی ہوئی ہے‘‘ برسی پر خوشی اور پرجوش تالیاں! خدا پناہ!! کیا لوگ تھے نوابزادہ نصراللہ خاں، ولی خاں، غوث بخش بزنجو! شاہ احمد نورانی اور مفتی محمود! ذومعنی شعروں میں بہت کچھ کہہ جاتے! نواب زادہ نصراللہ خاں جلسے میں کلیم عاجز کا ایک شعر ضرور پڑھا کرتے کہ ’’دامن پہ کوئی چھینٹ، نہ خنجر پہ کوئی داغ! تم قتل کرو ہو کہ کرامات کرو ہو!‘‘ اس شعر کی سنسنی خیز تاریخ بھی ہے۔ 1975ء میں بھارت کی وزیراعظم نے ایمرجنسی لگا دی۔ 21 ماہ کے دوران اپوزیشن کے سارے رہنما جیلوں میںٹھونس دیئے۔ پریس پر سخت پابندیاں لگا دیں۔ بہت سے اخبارات بند کر دیئے۔ اسی دوران 15 اگست کو یوم آزادی کا مشاعرہ ہوا۔ اندرا گاندھی مہمان خصوصی تھیں۔ مشاعرہ میں بزرگ شاعر کلیم عاجز نے غزل پڑھ دی کہ:
میرے ہی لہو پر گزر اوقات کرو ہو!
مجھ سے ہی امیروں کی طرح بات کرو ہو
دن ایک ستم، ایک ستم رات کرو ہو
وہ دوست ہو، دشمن کو بھی تم مات کرو ہو
یوں تو کبھی منہ پھیر کے دیکھو بھی نہیں ہو
جب وقت پڑے ہے تو مدارات کرو ہو!
کلیم عاجز نے اچانک اندراگاندھی کی طرف اشارہ کر کے پڑھا کہ:
دامن پر کوئی چھینٹ نہ خنجر پر کوئی داغ
تم قتل کرو ہو کہ کرامات کرو ہو!
اس پر زبردست تالیوں سے مشاعرہ کی چھت اڑ گئی۔  منتظمین کا خون خشک ہو گیا۔ آئندہ کے لئے مشاعروں پر پابندی لگ گئی۔
 

تازہ ترین خبریں

بھارت کو ایک ماہ کے لیے اقوام متحدہ کی سلامتی کونسل کی صدارت کی ذمہ داری۔۔۔دفتر خارجہ کا ردعمل سامنے آگیا

بھارت کو ایک ماہ کے لیے اقوام متحدہ کی سلامتی کونسل کی صدارت کی ذمہ داری۔۔۔دفتر خارجہ کا ردعمل سامنے آگیا

بلاول بھٹو زرداری اور ایمل ولی خان کی ملاقات۔۔۔۔۔سیاسی صورت حال پر تبادلہ خیال

بلاول بھٹو زرداری اور ایمل ولی خان کی ملاقات۔۔۔۔۔سیاسی صورت حال پر تبادلہ خیال

 پاکستان نے ویسٹ انڈیز کو جیت کیلئے 158 رنز کا ہدف دیدیا۔

پاکستان نے ویسٹ انڈیز کو جیت کیلئے 158 رنز کا ہدف دیدیا۔

وزیراعظم عمران خان کل عوام سے براہ راست مخاطب ہونگے 

وزیراعظم عمران خان کل عوام سے براہ راست مخاطب ہونگے 

موت تعاقب میں تھی ، پاکستان کے اہم شہر میں امتحان دینے نکلی نویں جماعت کی طالبہ کی افسوسناک موت

موت تعاقب میں تھی ، پاکستان کے اہم شہر میں امتحان دینے نکلی نویں جماعت کی طالبہ کی افسوسناک موت

پاکستان کے اس شہر کے عوام سپر احتیاط کریں، ہفتے کے روز ہونے والی موسلادھار بارش صرف شروعات تھی

پاکستان کے اس شہر کے عوام سپر احتیاط کریں، ہفتے کے روز ہونے والی موسلادھار بارش صرف شروعات تھی

مسٹر زرداری آپ کیا چاہتے ہیں لاک ڈاؤن، لاک ڈاؤن، لاک ڈاؤن۔اسد عمر کا بلاول کو جواب

مسٹر زرداری آپ کیا چاہتے ہیں لاک ڈاؤن، لاک ڈاؤن، لاک ڈاؤن۔اسد عمر کا بلاول کو جواب

پاکستان ٹیم کے نام ایک اور عزاز ۔۔۔۔محمد رضوان نے ٹی ٹوئنٹی میں ورلڈ ریکارڈ بنادیا

پاکستان ٹیم کے نام ایک اور عزاز ۔۔۔۔محمد رضوان نے ٹی ٹوئنٹی میں ورلڈ ریکارڈ بنادیا

 تحریک انصاف کے رکن اسمبلی نذیرچوہان کے پروڈکشن آرڈرز۔۔۔ ن لیگ نے بھی سپیکر اسمبلی پرویزالٰہی کی حمایت کافیصلہ کرلیا

 تحریک انصاف کے رکن اسمبلی نذیرچوہان کے پروڈکشن آرڈرز۔۔۔ ن لیگ نے بھی سپیکر اسمبلی پرویزالٰہی کی حمایت کافیصلہ کرلیا

افغانستان سے علاج کیلئے آنے والی خاتون کی ٹانگ سے ایسی چیز برآمد کہ بارڈر پر موجود سیکیورٹی اہلکار بھی ہکا بکا رہ گئے

افغانستان سے علاج کیلئے آنے والی خاتون کی ٹانگ سے ایسی چیز برآمد کہ بارڈر پر موجود سیکیورٹی اہلکار بھی ہکا بکا رہ گئے

پٹرولیم مصنوعات کی قیمتوں اضافہ ۔۔۔ وزارت خزانہ کی جانب سے نوٹیفیکشن جاری

پٹرولیم مصنوعات کی قیمتوں اضافہ ۔۔۔ وزارت خزانہ کی جانب سے نوٹیفیکشن جاری

 کراچی میں بھارت جیسی صورتحال ہوئی تو وزیراعظم اور ان کے وزرا ذمہ دار ہوں گے۔بلاول بھٹو 

 کراچی میں بھارت جیسی صورتحال ہوئی تو وزیراعظم اور ان کے وزرا ذمہ دار ہوں گے۔بلاول بھٹو 

اوگرانے اگست کیلئے ایل پی جی کی قیمت میں اضافہ کر دیا۔

اوگرانے اگست کیلئے ایل پی جی کی قیمت میں اضافہ کر دیا۔

بھارت میں مون سون بارشوں نے تباہی مچادی، 230 سے زائد افراد ہلاک ہوگئے 

بھارت میں مون سون بارشوں نے تباہی مچادی، 230 سے زائد افراد ہلاک ہوگئے