٭شہباز شریف ن لیگ کے صدر ہیں، جیل سے ضمانت پر رہا ہو چکے ہیں۔ مریم نواز ن لیگ کے 16 نائب صدور میں شامل ہیں مگر ن لیگ کی امارت و صدارت نہیں چھوڑی۔ شہباز شریف کی رہائی کے بعد کچھ عرصہ خاموش رہیں۔ اب اچانک پھر نمودار ہو گئیں۔ ن لیگ کے شیخوپورہ کے ایک رکن اسمبلی جاوید لطیف نے بی بی کی وفاداری کے جوش میں اعلان کیا کہ مریم نواز کو کچھ ہوا تو پھر پاکستان زندہ باد کا نعرہ نہیں لگے گا اور اسے دوسرا بنگلہ دیش بننے سے کوئی نہیں روک سکے گا۔ اس اعلان کی ن لیگ کے سینئر رہنما شاہد خاقان عباسی اور اب ملک احد نے مذمت کی ہے۔ مگر ایک طرف شہباز شریف نے جاوید لطیف کو پارٹی (ن لیگ) کا سچا مخلص وفادار (پاکستان کا وفادار نہیں) قرار دیا، دوسری طرف مریم نواز نے اپنے جاں نثار وفادار جاوید لطیف کے پاکستان کے خلاف بیان کو ’’حقیقت افروز سچ‘‘ قرار دیا اب شہباز شریف کے مختصر بیان کو ناکافی سمجھ کر لشکر سمیت شیخوپورہ میں جاوید لطیف کے گھر جا پہنچیں اور اس کی ’غداری‘ کے جرم میں گرفتاری پر شدید غصے کا اظہار کرتی ہوئی پھر بلند اعلان کیا کہ جاوید لطیف نے سچ بولا ہے، اگر سچ بولنا غداری ہے تو ہم یہ غداری بار بار کریں گے!! اس پر کیا کہا جائے، یہی بات شیخ مجیب الرحمان، الطاف حسین، حسین حقانی وغیرہ نے کہی اور اب جاوید لطیف اور ن لیگ کی خود بخود پردھان مریم نواز ببانگ دہل کہہ رہی ہے!! استغفراللہ! جس مسلم لیگ نے پاکستان بنایا، وُہی اب جعلی نام پر اس کی جڑوں پر وار کر رہی ہے!!
٭وزیرداخلہ کے سات روز پہلے اعلان کے مطابق بالآخر شہباز شریف کا نام ای سی ایل (باہر جانے پر پابندی) میں ڈال دیا گیا اور ان کی ضمانت پر رہائی کے خلاف سپریم کورٹ سے رجوع کرنے کا اعلان بھی آ گیا ہے۔ شہباز شریف کی جانب سے جوابی عدالتی کارروائی بھی شروع کر دی گئی ہے۔ قارئین کرام! شہباز شریف دوبارہ گرفتار ہو جائیں تو ان کی اپنی پارٹی میں کون بہت خوش ہو گا؟
٭پتہ نہیں انسانیت کہاں چلی گئی!؟ لودھراں کے ایک دکاندار نے اپنے ہی چھ سالہ بھانجے حمزہ اور سات سالہ کزن عدنان کو دکان میں چوری کے الزام میں ہاتھ باندھ کر سخت گرم دھوپ میں بٹھا دیا، بچے روتے رہے مگر ظالم شخص نے ان کی اس حالت میں تصویریں بنا کر ویب سائٹ پر وائرل بھی کر دیں۔ انہیں دیکھ کر پولیس حرکت میں آ گئی اور ملزم کو گرفتار کر لیا۔ ملزم کا کہنا تھا کہ یہ بچے اسے بہت تنگ کرتے تھے، اس لئے انہیں سزا دی ہے!؟ خدایا! تیری دنیا میں کیا ہو رہا ہے!!
٭سندھ کے ولی عہد بلاول نے پنجاب پر الزام لگایا کہ اس نے سندھ کے حصے کا دریائی پانی چوری کیا ہے اور پانی کی تقسیم کے ادارے ’اِرسا‘ نے سندھ کے حصے کا 20 فیصد پانی پنجاب کو دے دیا ہے! ’اِرسا‘ کے ترجمان نے بلاول کے اس بیان کو سراسرغلط قرار دیتے ہوئے کہا کہ دریائوں میں پانی کم ہونے کی بنا پر چاروں صوبوں کے پانی میں کمی ناگزیر ہو گئی تھی مگر سندھ کی صرف چار فیصد اور پنجاب کی 16 فیصد کمی کی گئی ہے (بلاول 20 فیصد کہہ رہا ہے!!) قارئین کی اطلاع کے لئے ارسا کا ادارہ 1991ء میں وزیراعظم نوازشریف کے دور میں ترتیب پایا،اس کا مکمل نوٹیفکیشن 1992ء میں ایکٹ نمبر xxII (22) کے ذریعے ہوا۔ اس ادارے کا ایک چیئرمین اور چاروں صوبوں سے ایک ایک رکن لیا جاتا ہے۔ قانون کے مطابق اس ادارے کا ہر صوبے کا رکن باری باری چیئرمین بنتا ہے۔ اس وقت پنجاب کے رائو ارشاد علی خاں چیئرمین ہیں جب کہ سندھ کے زاہد حسین جونیجو، بلوچستان سے عبدالحمید مینگل، پختونخوا سے انجینئر زاہد عباس اور وفاق سے اسد امتیاز علی اِرسا کے ارکان میں شامل ہیں! یہ بات بھی کہ قانون کے مطابق ارسا کے تمام فیصلے اتفاق رائے سے ہوتے ہیں۔ اس طرح سندھ کے پانی کی 4 فیصد کمی کا فیصلہ ارسا میں سندھ کے رکن کی رضا مندی اور اتفاق رائے سے ہی کیا گیا، مگر پنجاب کے خلاف نفرت پھیلانا ہی مقصود ہو تو کیا کہا جا سکتا ہے؟ اور پھر پنجاب میں حکومت بنانے کے دعوے بھی!!