( 1512ء تا 1520) کے عہد سے لے کر 1922ء تک قریباً چار سو سال ترکوں کے پاس رہی۔یہاں تک کہ 1922ء میں موجودہ ترکی کے بانی مصطفیٰ کمال اتاترک نے خلافت کا خاتمہ کر دیا۔ترک بڑے فخر سے دعویٰ کرتے ہیں کہ انہوں نے میدان جنگ میں شکستیں کھائی ہیں، مفتوحہ علاقے کھوئے ہیں، لیکن بحیثیت قوم دنیا کی کوئی طاقت انہیں مغلوب نہیں کر سکی۔پہلی جنگِ عظیم میں انہوں نے جرمنی کے اتحادی کی صورت میں حصہ لیا۔
1918ء میں جرمنی کو شکست ہوگئی تو ترکوں کو بھی ہزیمت کا سامنا کرنا پڑا۔مغرب کی اتحادی و استعماری طاقتوں نے استنبول پر قبضہ کر لیا اور سلطان محمد فاتح کی نقل کرتے ہوئے فرانسیسی جرنیل سفید گھوڑے پر سوار ہو کر شہر کے کو چہ و بازار سے یہ کہتے ہوئے گزرا کہ ’’میں ہی وہ موعودہ فرشتہ ہوں جس کے متعلق 1453ء میں بازنطینی سلطنت کی امداد کے لئے آنے کی بشارت دی گئی تھی لیکن میں کچھ لیٹ ہو گیا اور اب آیا ہوں ‘‘۔ مصطفیٰ کمال اتاترک نے یہ توہین آمیز منظر نم آلود نگاہوں کے ساتھ دیکھا۔انہوں نے اپنے چند رفقاء کے ساتھ استنبول سے بھاگ چلنے اور آزادی کی جنگ شروع کرنے کا فیصلہ کر لیا۔وہ ایک جہاز میں سوار ہوئے اور جہاز رانی کرتے ہوئے ترکی کے شمالی ساحل پر واقع سامسن کی بندرگاہ پر پہنچے۔کچھ عرصے بعد ان لوگوں نے سیوائے (sivas) کے مقام پر عبوری حکومت قائم کر لی۔مصطفی کمال کو اس کا چیئرمین بنایا گیا۔اس کے ساتھ ہی آزادی کے لئے ایک طویل اور جان گسل جدوجہد شروع ہو گئی۔دشمن کے جم غفیر کے مقابلہ میں بہت تھوڑے مجاہدین آزادی نے متعدد جارحانہ اور مدافعانہ جنگیں لڑیں، جن میں عورتوں نے بھی مردوں کے دوش بدوش حصہ لیا۔سپلائی وغیرہ کے زیادہ تر فرائض خواتین،بچوں اور بوڑھوں کے سپرد تھے جو جسمانی لحاظ سے لڑنے کے قابل نہیں تھے۔صحیح معنوں میں پوری قوم جنگ میں شریک تھی۔بھاری جانی نقصان اٹھانے کے بعد دشمن کی ہمت جواب دے گئی تو مصطفی کمال نے ترک قوم کے نام تاریخی فرمان جا ری کیا ،  جس میں کہا گیا تھا کہ: ’’ترک افواج تمہارا پہلا ہدف بحیرہ ٔ روم ہے‘‘۔ یہ بات بڑی حد تک درست تھی کیونکہ اسلام کے دوراولین کے نامور جرنیل حضرت عقبہ کی طرف جنہوں نے ساحل مراکش کے آخری کنارے پر پہنچنے کے بعد ہوا میں ہاتھ بلند کر کے رب ذوالجلال کے حضور میں فریاد کی تھی۔’’اے اللہ میں وہاں تک آ گیا ہوں،جہاں تک میرا گھوڑا مجھے لا سکتا تھا،اس سے آگے نہیں جا سکتا‘‘۔ 
ترک فوجوں نے بھی جو ویسے ہی جذبہ سے سرشار تھیں، اپنی پیش قدمی جاری رکھی جب تک کہ دشمن کے آخری سپاہی کو ترکی کی سرزمین سے مار بھگا کر بحیرہ ٔ روم پر قبضہ کر لیا۔جنگ آزادی میں ترکوں کی واضح کامیابی نے اتحادی طاقتوں کو مجبور کر دیا کہ ان کے ساتھ مستقل سمجھوتہ کے لئے مذاکرات کریں۔ ترکی کی موجودہ سرحدوں کا تعین اسی سمجھوتہ کا نتیجہ ہے۔ حقیقت یہ ہے کہ انہیں اس سے زیادہ مل گیا جتنا کہ وہ چاہتے تھے۔اتحادی طاقتیں استنبول خالی کرنے اور عثمانی سلطنت کے یورپی صوبہ تھریس سے نکل جانے پر بھی آمادہ ہو گئیں ۔ترکوں کے ساتھ مفاہمت کرنے اور ان کے ساتھ پرامن معاہدہ کرنے کی غرض سے روس کی کیمونسٹ حکومت نے ترکی کے صوبے کارز  اور  اردہان واپس کر دئیے جو روسی فوجیوں نے سابقہ لڑائیوں میں چھینے تھے۔ اپنی سرحدوں کو محفوظ کرنے کے بعد نئی حکومت نے قوم کی تعمیرنو کا بیڑا اٹھایا۔ترک صدیوں سے اسلامی نصب العین کے چیمپئن اور علمبردار چلے آ رہے ہیں۔عثمانی خلافت کے زمانہ میں یہ تاثر عام پایا جاتا تھاکہ سلطان کو اپنی رعایا پر لامحدود اختیارات حاصل ہیں جبکہ عملی طور پروہ شرعی احکام کی حدود سے باہر نہیں نکل سکتا تھا۔اصل اقتدار علماء کی ایک کونسل کے ہاتھ میں تھا۔ہر فرمان پر شیخ الاسلام کی مہر کا ثبت ہونا لازمی تھاجس پر ترکی کے الفاظ ‘‘OLUR OR OLMAZ‘‘ کندہ تھے۔ا س کے معنی ہیں ’’کوئی کام ہو سکتا ہے یا نہیں ہو سکتا‘‘۔ دفتری زبان میں اس کا مفہوم ’’منظور ہے یا منظور نہیں ہے‘‘بنتا ہے۔حقیقت میں ان کی روزمرہ زندگی پر اسلامی قوانین کا گہرا اثرتھا۔مصطفی کمال اور ان کے رفقاء نے اس عمل کو الٹنے کا فیصلہ کیا۔ دوسرے تمام آمروں کی طرح اتاترک کی خواہش تھی کہ اس کے الفاظ کوقانون کا درجہ حاصل ہو جائے۔وہ کسی ایجنسی کو اپنے احکام میں کوئی تبدیلی کرنے کی اجازت نہیں دیتے تھے۔ابتدائی قدم کے طور پر انہوں نے خلافت کا خاتمہ کر دیا۔آہستہ آہستہ بہت سی سیاسی اور معاشرتی اصلاحات نافذ کیں۔انہوں نے اس ’’چوغے‘‘ کو اتار کر پھینک دیا جو جنگ آزادی کے دوران اسلام کے چیمپئین کی حیثیت سے پہنے رکھاتھا۔ماضی و حال کے بہت سے حکمرانوں کی طرح اتاترک نے اسلام کو محض سیاسی اغراض کے لئے استعمال کیا۔جن دنوں وہ ترکی کو آزاد کرانے کے لئے اتحادیوں کے خلاف شجاعت کے جوہر دکھا رہے تھے برصغیر کے مسلمانوں نے چار لاکھ پائونڈ کی خطیر رقم چندہ کے طور پر جمع کرکے بھیجی تھی۔اس زمانہ میں یہ بہت بڑی رقم تھی اور ترک آج بھی شکریہ کے ساتھ اس کا ذکر کرتے ہیں ۔