ترک طبیبوں نے تحقیق کی تو پتا چلا کہ گائے کو بھی ایک مخصوص قسم کی چیچک لاحق ہوتی ہے جس میں ان کے جسم پر پھنسی نما دانے نکل آتے ہیں جن میں پیپ بھری ہوتی ہے۔ گائیوں کی دیکھ بھال کے دوران اکثر اوقات گوالے کا ہاتھ یا جسم کا کوئی حصہ گائے کو چھو جاتا ہے۔ اگر وہاں چیچک کا کوئی دانہ ہو تو اس کا مواد گوالے کے جسم پر لگ جاتا ہے۔ اور اگر اس جگہ کوئی خراش یا کٹ وغیرہ ہو تو جراثیم انسانی جسم میں داخل ہو جاتے ہیں۔ترک طبیبوں کو معلوم ہوا کہ کٹ یا خراش کے راستے متاثرہ گائے کی پیپ انسانی جسم میں داخل ہونے سے چیچک سے تحفظ مل جاتا ہے۔ انہوں نے اس مشاہدے کو اپنے علاج کا حصہ بنایا اور تندرست لوگوں کے جسم پر نشتر سے چھوٹا سا چیرہ لگا کر اس پر گائے کا چیچک زدہ مواد لگانے لگے۔ یہ ویکسین کی ابتدائی شکل تھی۔ یہ کہاوت تو آپ نے سنی ہی ہو گی کہ زہر کو زہر مارتا ہے۔ ہزاروں برس پہلے کا انسان بھی اس حقیقت سے آگاہ تھا۔ ایسے شواہد ملتے ہیں کہ تقریباً ہزار سال پہلے چین کے بعض حصوں میں لوگ سانپ کے زہر کے چند قطرے اپنے حلق میں ٹپکا لیتے تھے جس سے وہ سانپ کے کاٹنے سے ہلاک ہونے سے محفوظ ہو جاتے تھے۔ اسی طرح چیچک سے بچنے کے لیے گائے کا چیچک زدہ مواد بھی اس مرض کے خلاف تریاق کا کام کرتا تھا۔ہمارے جسمانی مدافعتی نظام میں یہ صلاحیت موجود ہے کہ جب کسی مرض کے جراثیم یا وائرس کا حملہ ہوتا ہے تو ہمارا مدافعتی نظام اس کے خلاف لڑنے کے لیے ایک فوج تیار کرتا ہے جسے طب کی زبان میں اینٹی باڈیز کہا جاتا ہے۔ ویکسین بھی اسی اصول پر کام کرتی ہے۔ وہ کسی خاص وباء کے خطرے سے ہمارے قدرتی مدافعتی نظام کو آگاہ کرتی ہے جس سے مقابلے کے لیے وہ تیار ہو جاتا ہے۔1796ء میں چیچک کی ویکسین بننے کے بعد دوسری وباؤں کی ویکسینز بنانے کا راستہ کھل گیا اور آنے والے برسوں میں اسی طریقہ کار کے تحت کئی وبائی امراض کی ویکسینز بنائی گئیں جن میں بطور خاص بچوں کے امراض بشمول خسرہ، خناق، کالی کھانسی، پولیو اور تشنج شامل ہیں۔ ان ویکسینز سے ہر سال لاکھوں زندگیاں بچانے میں مدد مل رہی ہے۔امراض کی روک تھام اور بچاؤ کے امریکی ادارے سی ڈی سی کی ایک رپورٹ میں بتایا گیا ہے کہ اس وقت امریکہ میں دو درجن سے زیادہ وبائی امراض سے پچاؤ کی ویکسینز استعمال کی جا رہی ہیں۔1950ء کے عشرے تک ویکسین بنانے کے لیے وباء کے وائرس یا جراثیم استعمال کیے جاتے تھے۔ اس مقصد کے لیے ان کی لیبارٹری میں افزائش کی جاتی تھی اور کمزور یا مردہ وائرس یا اس کا کوئی حصہ ویکسین میں استعمال کیا جاتا تھا۔ پھر سائنس کی ترقی نے ویکسین بنانے کے لیے نئی راہیں کھول دیں۔اب جینیاتی طریقے سے بھی ویکسین بنائی جا رہی ہے جس کی تازہ ترین مثال کووڈ-19 کی ویکسین ہے۔ تیزی سے پھیلنے والی اس موذی وباء کے خلاف اس وقت تین اقسام کی ویکسینز استعمال کی جا رہی ہیں، جو روایتی، ڈی این اے اور جینیاتی کوڈ کے طریقوں سے تیار کی گئی ہیں۔جینیاتی کوڈ کی ویکسین ایم آر این اے کہلاتی ہے۔ اس میں انسان کے مدافعتی نظام کو یہ پیغام دیا جاتا ہے کہ ایک خاص بیرونی دشمن جسم میں داخل ہو گیا ہے۔ 
مدافعتی نظام اس کے خلاف نہ صرف اینٹی باڈیز تیار کرتا ہے بلکہ اپنی یاداشت میں اسے محفوظ کر لیتا ہے تاکہ مستقبل میں جب کبھی کورونا وائرس حملہ کرے تو وہ اسے شناخت کر کے فوری مقابلہ شروع کر دے۔ اگرچہ نئی ٹیکنیک کے تحت تیار ہونے والی ویکسینز کا استعمال شروع کر دیا گیا ہے، تاہم ابھی ان پر تحقیق و تجربات جاری ہیں۔ کسی ویکیسن کی تیاری کے بعد اس کا استعمال شروع ہونے میں دس سال یا اس سے بھی زیادہ عرصہ لگ جاتا ہے۔ اس دوران یہ جائزہ لیا جاتا ہے کہ وہ انسانی استعمال کے لیے کتنی محفوظ، مؤثر اور دیرپا ہے۔ویکسین کی تیاری کے تین اہم مراحل ہیں ۔لیبارٹری میں تیاری اور ابتدائی تجزیوں اور تجربات سے گزرنے کے بعد ویکسین کو تین مرحلوں میں انسانوں پر آزمایا جاتا ہے۔ پہلا مرحلہ رضاکاروں کے ایک چھوٹے گروپ پر مشتمل ہوتا ہے جس میں ویکسین کے انسانوں کے لیے محفوظ ہونے اور اینٹی باڈیز پیدا کرنے کی صلاحیت کو جانچا جاتا ہے۔دوسرے مرحلے میں کئی سو رضاکار شامل کیے جاتے ہیں اور یہ تعین کیا جاتا ہے کہ ویکسین کے مؤثر ہونے کے لیے اس کی کتنی مقدار اور  خوراکوں کی ضرورت ہو گی اور وہ کتنی مدت تک مؤثر رہے گی۔تیسرے مرحلے میں ہزاروں رضاکاروں کو ویکسین دے کر یہ دیکھا جاتا ہے کہ مختلف گروپس کے لوگوں پر اس کے مؤثر ہونے کی صلاحیت کیا ہے۔کورونا وائرس کو سامنے آئے ایک سال سے کچھ ہی زیادہ عرصہ ہوا ہے، جب کہ اس سے بچاؤ کی ویکسینز کا استعمال شروع ہو گیا ہے۔ یہ اقدام ہنگامی صورت حال کے پیش نظر کیا گیا ہے تاکہ اس کے تیز تر پھیلاؤ اور ہلاکتوں کو قابو میں لایا جا سکے۔ مختلف ملکوں میں کووڈ-19 کی کئی ویکسینز تیار کی گئی اگرچہ امریکہ میں سی ڈی سی جیسا ادارہ عندیہ دے رہا ہے کہ ویکسین لگوانے کے بعد کورونا وباء سے پہلے کی زندگی کی طرف لوٹا جا سکتا ہے لیکن عالمی ادارہ صحت ابھی خبردار کر رہا ہے کہ احتیاط روا رکھنا ابھی ضروری ہے۔ ریسرچر اس بات پر متفق ہیں کہ کسی بھی وباء کے خلاف کم ترین مدت میں جو ویکسین آئی ہے، وہ کورونا ویکسین ہی ہے لیکن ابھی کئی ممالک میں یہ ویکسین اپنے تجرباتی مراحل میں ہے۔ یوں اس کے بارے میں مکمل معلومات اور ڈیٹا مرتب ہونے میں مزید وقت لگے گا۔