آنے والے دن بتا دیں گے کہ کون سا مولوی ’’نکا‘‘ بن کر مذہبی طبقے میں توڑ کا سبب بننے کی کوشش کرے گا؟ اور پھر ہمارے کانوں نے  دینی مدارس کے نئے بورڈ بننے کی خبریں سنیں، نئے وفاق یا نئے تعلیمی بورڈ کے سرکاری اعلانات کے بعد … مذہبی حلقوں کی طرف سے ان کے خلاف منفی ردعمل کا آنا بھی ایک ’’نیا پن‘‘ ہی اپنے اندر لیئے ہوئے تھا ، 22 مئی کو جامعہ اشرفیہ لاہور   میں وفاق المدارس کے قائدین و دیگراکابر علماء کا ایک اجلاس ہوا، جس میں وفاق المدارس نے ان دینی مدارس کا الحاق ختم کرنے کا اعلان کر دیا جنہوں نے سرکار سے نئے تعلیمی بورڈ  منظور کروائے تھے۔
میری روز اول سے کوشش رہی کہ اس معاملے کو کالم میں نہ ہی زیر بحث لایا جائے …  لیکن نئے بورڈ منظور کروانے والوں کا الحاق ختم کرنے کے فیصلے کے بعد … وفاق المدارس کے جید اکابرین کے خلاف سوشل میڈیا پر جو طوفان بدتمیزی اٹھانے کی کوشش کی گئی، اس افسوسناک صورت حال نے مجھے مجبور کیا کہ کچھ باتیں ہمیں بھی کرہی لینی چاہیں … میں نے ایک دفعہ پھر اسی نامور علمی شخصیت سے رابطہ کیا کہ جنہیں ’’نامعلوموں‘‘ کی طرف سے ’’نکا‘‘ بنانے کی کوشش کی گئی تو وہ    اپنے انکار اور اللہ کے فضل سے ’’نکا‘‘ بننے سے بال بال بچ گئے تھے … مگر اس مرتبہ میرا رابطہ مواصلاتی تھا … ان کا کہنا تھا کہ ’’ابا‘‘ نے بڑی محنت کر رکھی ہے، ابھی مزید ’’نکے‘‘ بھی منظر عام پر آئیں گے ، وفاق المدارس کے بزرگ علماء نے نئے تعلیمی بورڈ بنانے والوں کا الحاق ختم کرکے ان کو یہ موقع فراہم کر دیا کہ اب وہ کھل کر کھیلیں … اپنے طلباء کو چاند کی سیر کروائیں، یا انہیں مریخ سیارے پر ریسرچ کے لئے بھیجیں، ان کا کہنا تھا کہ وہ اپنے طلباء کو کلرک بنائیں ، تھانیدار بنائیں، سپرنٹنڈنٹ بنائیں ، سیکرٹری بنائیں، کرنل ، جنرل بنائیں ڈی ایس پی بنائیں، پائلٹ بنائیں ، یا کسی دفتر کا چپڑاسی بنائیں اگر وفاق ان کے راستے میں رکاوٹ تھا … تو اب یہ رکاوٹ دور ہوگئی … انہیں چاہیے کہ وہ ’’رج‘‘ کے اپنے اداروں کے ذریعے یہ سارے ہنر مند تیار کریں … باقی رہ گے دینی مدارس تو ان کی فکر نہ کریں … دینی مدارس کی بنیاد  رضائے الٰہی کے حصول پر رکھی جاتی ہے۔
جن والدین نے اپنے بچوں کو کلرک، تھانیدار یا پائلٹ بنانا  ہوتا ہے  وہ انہیں سکولوں، کالجوں اور یونیورسٹیوں میں بھیجتے ہیں … دینی مدارس کا کام حافظ، قاری، عالم، مفتی تیار کرنا ہوتاہے، مخیر حضرات بھی د ینی مدارس کو اس لئے فنڈز نہیں دیتے کہ یہاں تھانیدار یا افسر بنیں گے بلکہ وہ بھی قوم کے بچوں کو حافظ ، قاری اور دینی عالم بنانے کے لئے چندہ فراہم کرتے ہیں ، ایف اے ٹی ایف اور سرکاری ایجنڈے پر چلنے کی کوشش کرنے والوں کو چاہیے کہ وہ سرکار سے فنڈز لے کر اس کے ایجنڈے کی تکمیل کریں … کم از کم مخیر حضرات کی طرف سے خالصتاً دینی مدارس کے لئے دی جانے  والی زکوٰۃ ، صد قات کو تو خراب کرنے کی کوشش نہیں کرنی چاہیے، انہوں نے کہا کہ دینی مدارس سے ’’آزادی‘‘ اور ’’حریت‘‘ کا مزاج مضبوط ہوتا ہے ، سرکاری ایجنڈے پر  چلنے والے ’’درباری‘‘ تو پیدا  کرسکتے ہیں … قیامت تک الٹے بھی لٹک جائیں … رومیؒ،  غزالیؒ تو بہت دو رکی بات کوئی مفتی رشید احمد لدھیانوی نور اللہ مرقدہ حتیٰ کہ مفتی محمد نعیمؒ کا ثانی بھی پیدا نہیں کرسکتے، کوئی ان سے پوچھے کہ حضرت اقدس مفتی رشید احمد لدھیانویؒ نے کس جدید یونیورسٹی سے پڑھ کر د نیا میں علم و تصوف اور جہاد کا پرچم لہرایا تھا … حضرت مفتی محمد نعیمؒ کس آکسفورڈ یونیورسٹی کے تعلیم یافتہ تھے؟ اللہ نے ان دونوں شخصیات کو دنیا بھر کے مسلمانوں میں جو مقبولیت عطا فرمائی، وہ کلرک یا تھانیدار تیار کرنے والی کسی جدید یونیورسٹی کی وجہ سے نہیں ، بلکہ دینی مدارس اور خانقاہیں قائم کرنے کی وجہ سے عطا فرمائی، یہ جو آج دینی مدارس کے معصوم طلباء کو ’’افسر‘‘ بنانے کے سہانے خواب دکھا کر انہیں دنیا داری میں فنا کرنا چاہتے ہیں … کوئی ان سے پوچھے کہ بھائی لوگو! تم نے خود سرکاری افسری کیوں نہ کی ؟ مدرے کامہتمم بننا کیوں گوارا کیا؟ تم نے اپنے بچوں میں کتنوں کو سرکاری افسر بنایا؟ ہم کسی مولوی کے سرکاری افسر بننے کی مخالفت نہیں کرتے … لیکن پورے کے پورے مدرسے اور خانقاہ کو صرف سرکاری افسر تیار کرنے پر لگا دینا،  زکوٰۃ و صدقات پر پلنے والے مولویوں اور طلباء کے چہروں پر مسنون داڑیوں کی بجائے جدید تراش خراش والی ٹیڈی داڑھیوں کارواج چل پڑنا … آخر یہ سب کیا ہے؟ علماء کا حکام سے روابط رکھنا بڑی بات نہیں ہے لیکن حکام کے احکامات جب دینی مدارس کے تعلیمی نصاب اور مدارس میں  رائج سسٹم پر اثر انداز ہونا شروع ہو جائیں تو پھر اس سے معاملات میں خرابی بڑھتی ہے، میں نے ان کی یہ طویل گفتگو بڑے صبر کے ساتھ سنی اورپھر آج کالم میں بھی بیان کر دی۔
’’نوٹ‘‘ ’’اگر دوسرا فریق  اپنا جواب دیناچاہے تو خاکسار کا کالم حاظر ہے۔‘‘