سابق آرمی چیف جنرل بیگ نے انکشاف کیا کہ جہاں تک  میرے علم میں ہے کہ پرویز مشرف اور اس کے بعد کے ادوار میں امریکہ کو یہ سہولت  تربیلا کے قریب حاصل رہی … اب جبکہ یہ موقع ہے کہ افغانستان میں ایک بار پھر طالبان کی حکومت قائم ہو جائے گی اور قابض امریکی اور دیگر افواج وہاں سے نکل جائیں گی ، تو امریکہ طالبان کی حکومت کو ناکام بنانے اور اپنی شکست کا انتقام لینے کے لئے افغانستان پر فضائی حملہ کرسکتاہے  اور اس کے لئے وہ پاکستان کی فضائی حدود کو استعمال کرسکتا ہے … چاہے اس کے اڈے خلیجی ممالک میں ہوں یا افغانستان کے کسی اور پڑوسی ملک میں ، پاکستان کو کسی بھی صورت میں ان معاہدوں کی توثیق نہیں کرنی چاہیے … انہوں نے کہا کہ  خطے میں امن اور اقتصادی ترقی کے لئے ضروری ہے کہ امریکہ کے خطے میں عسکری مداخلت کاخاتمہ کیا جائے اور امریکہ پر واضح کر دیا جائے کہ اب پاکستان کو اس معاہدے کی ضرورت نہیں، جنرل بیگ نے کہا کہ اگر امریکہ کو دی گئی سہولیات برقرار رہیں تو پاکستان میں نہ کبھی امن آئے گا اور نہ ہی پاکستان اقتصادی  ترقی کی راہ میں چل سکے گا، (ر) جنرل اسلم بیگ ، پاک فوج کے سربراہ رہ چکے ہیں انہوں نے پاک ،امریکہ معاہدوں کے حوالے سے اپنے انٹرویو میں جو گفتگو کی … جو انکشافات کئے وہ انتہائی پریشان کن ہیں اور قابل غور بھی، یعنی ’’پاکستان‘‘ اور اس کے 22 کروڑ عوام آج بھی رسوا کن ڈکٹیٹر کی قاتل پالیسیوں کے بندھن میں بندھے ہوئے ہیں، پرویز مشرف کے تاریک دور میں بنائی جانے والےیہی وہ قاتل معاہدے اور پالیسیاں تھیں کہ  جو ستر ہزار سے زائد پاکستانیوں کاخون پی گئیں … یہی وہ قاتل پالیسیاں اور معاہدے تھے کہ جن کی وجہ سے پاکستان کا سو ارب سے زائد کا نقصان ہوا ، نائن الیون کے بعد بھی ایک ڈکٹیٹر نے پاکستان کو امریکہ کی بھڑکائی ہوئی جنگ میں جھونک دیا تھا … مگر اب تو خیر سے عمران خان کہ جن کو کسی دور میں ’’طالبان خان‘‘ بھی کہا جاتا تھا …  کی حکومت ہے ، کیا وہ پرویز مشرف دور کی قاتل پالیسیوں اور معاہدوں کو پارلیمنٹ میں زیربحث لانے کی جرات کریں گے؟ کیا عمران خان ان خوفناک معاہدوں کے حوالے سے ’’ریاست مدینہ‘‘ کے عوام کو اعتمادمیں لیں گے؟
کیا وہ یہ جرات کریں گے کہ امریکہ کی آنکھ میں آنکھ ڈال کر انہیں یہ بتا دیں کہ اب نہ کوئی معاہدہ، نہ قاتل پالیسی، نہ افغانستان کی نگرانی، ہم ثانی ریاست مدینہ پاکستان کی ایک انچ زمین بھی کسی مسلمان ملک کے خلاف استعمال کرنے کی اجازت نہیں دے سکتے، پرویز مشرف کے تاریک دور کے قاتل معاہدوں اور خونی پالیسیوں کی موجودگی میں وزیر خارجہ  شاہ محمود قریشی کے اس بیان کہ ’’ہم امریکہ کو فوجی اڈے نہیں دیں گے ‘‘ کی  کیاحیثیت رہ جاتی ہے؟ قومی اسمبلی کے فلور پر انکار اور رسوا کن ڈکٹیٹر کی خونی پالیسیاں برقرار،  یہ کھلا تضاد نہیں تو پھر کیا ہے؟
عالمی ذرائع ابلاغ کے مطابق، افغان طالبان نے بھی اس حوالے سے ایک بیان جاری کیا ہے … جس میں کہا گیا ہے کہ ’’پہلے بھی امریکی اڈوں کی خطے میں موجودگی  کی سخت مخالفت کی ہے … اور اگر اب بھی فوجی اڈے قائم کئے جاتے ہیں … تو یہ تاریخی غلطی اوربدنامی ہوگی، افغان طالبان کاکہنا تھا کہ ہم نے بار بار یقین دہانی کرائی  ہے کہ ہماری سرزمین دوسروں کی سلامتی کے خلاف استعمال نہیں ہوگی ، جواب میں ہم بھی یہ چاہتے ہیں کہ کوئی دوسری سرزمین بھی ہمارے خلاف استعمال نہ ہو، طالبان نے امید ظاہر کی کہ ہمسایہ ممالک ہم پر حملے کے لئے اپنی سرزمین اور فضائی حدود استعمال نہیں ہونے دیں گے ، تاہم ایسا ہوا تو اس کی ذمہ داری انہی پر عائد ہوگی اور انہیں ہی مشکلات کا سامنا کرنا پڑے گا، جو ایسی غلطیاں کرتے ہیں۔
سوال یہ ہے کہ طالبان ایسا بیان  کرنے پر مجبور کیوں ہوئے کہ جس میں دھمکی آمیز لب و لہجہ اختیار کیا گیا؟ جاننے والے جانتے ہیں کہ وہ روسیاہ ڈکٹیٹر ہی تھا کہ جس کی انسانیت کش پالیسیوں کی وجہ سے پاکستان کو امریکی ڈرون حملوں سے لے کر خودکش حملوں اورخوفناک دہشت گردی کا سامنا کرنا پڑا تھا، اب جبکہ امریکہ افغانستان  سے ذلیل و خوار ہوکر نکلنا چاہتا ہے … وہ جاتے جاتے بھی پاکستان اور افغانستان کو جنگ کے شعلوں کے حوالے کرنا چاہتا ہے، اللہ کرے کہ وہ ناکام رہے۔ آمین