بات ہو رہی تھی پی ٹی آئی کی بڑی کامیابی کی خبر کے بارے یہ بھی عجیب سائیکی ہے ہم وطنوں کی کہ جب کوئی غلط کام کی نشاندہی کرے تو بجائے معذرت یا شرمندگی فوراٌ کہتے ہیں کیا میں اکیلا ایسا کر رہا ہوں فلاں فلاں بھی تو ایسا ہی کر رہا ہے ا سے کیوں نہیں پکڑا۔ اگر کبھی ریڈ سنگل کراس کرنے پر ٹریفک پولیس روک کر چالان کرے تو فوراٌ یہی کہا جاتا ہے کہ ارے بھائی میرے ساتھ تین اور گاڑیوں نے بھی تو خلاف ورزی کی ہے مجھے ہی کیوں روکاہے ۔ کچھ یہی حال ہماری سیاسی جماعتوں کا ہے کہ جنہوں نے حکومت کرنا ہوتی ہے ۔ اب حالیہ سرکار کو ہی دیکھیں جب بھی مہنگائی بے روزگاری کا رونا رویا جائے تو ہمیشہ یہی جواب ملتا ہے کہ سابقہ ادوار کی غلط پالیسیوں اور کرپشن کی وجہ سے ملک دیوالیہ پن کے قریب تھا۔ سابقہ حکومتوں کے ادوار میں مہنگائی کی شرح ہم سے کہیں زیادہ تھی ۔ سابقہ ادوار میں روزانہ 12 ارب روپے روزانہ کی کرپشن ہو رہی تھی اب اگر اس کرپشن کو روک لیا گیا ہے تو پھر اندرونی اور بیرونی قرضے اتنی بڑ ی تعداد میں کیوں لئے جا رہے ہیں۔
اب پی ٹی آئی کو دونوں جماعتوں کے اکائونٹس تک رسائی مل گئی ہے تو کچھ عرصے تک اس کا پوسٹ مارٹم ہوتا رہے گا اور نہ جانے کہاں کہاں سے فنڈز حاصل کرنے کی باتیں ہوں گی دوسری جانب سے دونوں جماعتیں پی ٹی آئی کی فنڈنگ کا پوسٹ مارٹم کرتی رہیں گی۔ اخبارات میں خبریں چھپیں گی ۔ اداریے اور کالم چھاپے جائیں گے۔ ٹی وی چینلز پر دانشور اس پر گفتگو کریں گے اور مارکیٹ میں بزنس مین اپنا کھیل کھیلتے رہیں گے۔ 
 حکومت نے عشرہ رحمت العالمین منانے کا اعلان کیا ہے اربوں روپے کے فنڈز مختص کئے گئے ہیں ۔ علماء اور مشائخ حکومت کو سراہیں گے خصوصی دعائیں ہوں گی سپیشل ایڈیشنز چھپیں گے مگر قیمتیں مزید تیز رفتاری سے آگے بڑھتی رہیں گی ۔ بجلی اور گیس کی ریگولیٹری اتھارٹیز اپنا کام کرنے کی بجائے بجلی اور گیس کی قیمتیں بڑھانے کی سفارشات مرتب کرکے چپکے سے قیمتیں بڑھا دیں گی بڑے بڑے سپر سٹورز پر چراغاں اور دیگیں تقسیم ہونگی اور اشیائے صرف کی قیمتیں خاموشی سے بڑھا دی جائینگی کوئی نہیں بولے گا کیونکہ قوم تو جشن منا رہی ہے ۔ کیا سائیکی ہے ۔ 
ایک ہنگامے پہ موقوف ہے گھر کی رونق
نغمہ شادی نہ سہی نوحہ غم ہی سہی
ادھر افغانستان میں طالبان آئے اور جشن ہمارے ہاں شروع ہو گئے ۔ اب وہاں فوڈ اور دیگر اشیاء کی قلت ہوئی تو یہاں سے دھڑا دھڑ شمع ملت کے پروانوں نے گندم ۔ آٹا۔ چینی ۔ گھی تیل بہت بڑی تعداد میں وہاں بھجوانا شروع کیا ۔ فرض بھی ادا ہوا اور فضل ربی بھی کثرت سے حاصل ہونے لگا ۔
بہرحال یہ امر باعث اطمینان ہے کہ حکمران اب بھی سوچ رہے ہیں کہ وطن عزیز کے لیے چینی نظام اچھا ہے ۔ امریکہ کا جمہوری نظام بہترہے یا پھر ریاست مدینہ والا نظام نافذ کیا جائے کیونکہ موجودہ نظام توفیل ہو چکا ہے۔ لیکن ایک نئے نظام کے مکمل نفاذ کے لیے تھوڑا لمبا عرصہ درکار ہے اس لئے قوم کو وقت تو دینا ہوگا حکومت کی نیت پر شک نہ کریں ۔ ہر اچھا کرنے میں وقت تو لگتا ہے ۔