گزشتہ دنوں امریکہ اور برطانیہ نے آسٹریلیا کو ایٹمی آبدوزیں فراہم کرنے کا معاہدہ کیا ہے اس معاہدہ کی وجہ سے یورپی یونین کے ایک اہم ترین ملک فرانس نے ناراضگی کا اظہار بھی کیا ہے۔دنیا میں چین کے خلاف ایک مخالفانہ ماحول پیدا کرنے کے لئے قصداً کوششیں کی جارہی ہیں، چین اپنی عالمی پالیسیوں پر عمل درآمد کرنے کے لئے پر عزم ہے۔چین  اپنے موقف پر ڈٹا ہوا ہے،لگتا ہے  چین نے اپنے مفادات کے تحفظ کے لئے تاجرانہ پالیسی کی بجائے اقدامی پالیسی اختیار  کر لی ہے۔چین پر امید ہے کہ مغرب کو  بالآخر چین کے ساتھ مفاہمت اور تعاون کی پالیسی  ہی اختیار کرنی پڑے گی۔امریکہ کی قیادت میں اہل مغرب کے پاس انسانی حقوق کی گردان کا از خود اختیار کردہ ہتھیار موجود ہے جس کو وقت بے وقت استعمال میں وہ کافی مہارت رکھتے ہیں۔ اہل مغرب اسی ہتھیار کو چین کے خلاف بے دریغ بلا ثبوت استعمال کر رہے ہیں۔ چین پر الزام ہے کہ اس نے ہانگ کانگ میں انسانی حقوق کے کارکنان پر سخت پابندیاں عائد کی ہوئی ہیں۔ ان الزامات کے سلسلے میں  چین لچک دکھانے کے لئے قطعی طور پر تیار نہیں ہے بلکہ چین نے سخت لب و لہجہ اختیار کیا ہے،چین کے سفارتکار بھی  نرم و ملائم لہجہ اختیار کرنے کے بجائے وولف وار یئرز  کا کردار ادا کر رہے ہیں۔
2020 ء چین کی وزارت خارجہ کے ترجمان نے ببانگ دہل کہا تھا کہ امریکی کھلاڑیوں کے ووہان شہر میں آنے کی وجہ سے کرونا  وائرس پھیلا تھا۔آسٹریلیا کے فوجیوں کا کردار بھی چین نے طشت از بام کردیا تھا جس میں ایک معصوم افغان بچے پر ایک آسٹریلین  سپاہی چاقو تانے ہوا تھا۔امریکہ سے مارچ میں مذاکرات کے دوران چینی سفارتکار نے امریکی پر الزام لگایا تھا کہ امریکہ سیاہ فام لوگوں کو تحفظ دینے میں ناکام ہوا ہے۔ دنیا بھر میں صدر چین کی ہلہ شیری کی بنیاد پر  چین کی نمائندگی کرتے ہوئے سفارتکار جارحانہ رویہ اختیار کئے ہوئے ہیں۔
(جاری ہے)