گلوبلائزیشن کا مطلب ہے پوری دنیا کو آپس میں جوڑنا۔ شمال جنوب کنیکٹویٹی ترقی کا ایک اہم حصہ ہے، جس کا مقصد سابقہ پسماندہ علاقوں پر تجارت اور صنعتی پیداوار کے لیے قدرتی وسائل کے راستے کھولنا ہے۔ یوریشیا، بطور براعظمی زمینی ٹکڑا، جو راہداریوں کے ذریعے آپس میں جڑا ہوا ہے،’’دوسری‘‘ اور’’تیسری‘‘ دنیا کے پرانے تصورات کو ختم کر دے گا جس نے قوموں کو اقتصادی، سیاسی اور ثقافتی طور پر کمتر بنایا، اور یہ اس پرانے نظام کی جگہ پر ایک کثیر قطبی سسٹم کے اندر مساوی ارکان کی حقیقت کو تشکیل دے گا۔ یہ کنیکشن یوریشین صدی کی بنیاد ہے۔ اور افریقہ شمال-جنوب رابطوں کو آگے بڑھانے میں اگلا مربوط براعظم ہوگا۔ افریقا کو منسلک کرکے ہی ہم ان قدرتی وسائل کو حاصل کرنے کے لیے دو طرفہ رسائی حاصل کر سکیں گے جو یہ دونوں براعظم فراہم کر سکتے ہیں،  غربت کے ساتھ کامیابی کی امید کے ساتھ لڑنے کا یہ واحد راستہ ہے۔ ان تنظیموں کے ذریعے اب تک اربوں خرچ کیے جا چکے ہیں جو غربت کو ختم کرنے کی کوشش کر رہی ہیں، وہ بھی بغیر کسی خاص کامیابی کے۔ افریقا اور دیگر دور دراز خطوں کو تجارتی راستوں میں اپنے ساتھ منسلک کرنا، اور انہیں اپنے محل وقوع کے فوائد سے مستفید ہونے کے قابل بنانا، اور یوں عالمی پیداواری دائرے میں انھیں شامل کر لینا ہی غربت کے خاتمے کا ایک پائیدار طریقہ ہوگا۔ ریل اور روڈ کے یہ نارتھ ساؤتھ کوریڈورز جو افریقہ سے جڑتے ہیں، مستقبل میں ایک نیا اور ریجنل افریقی حب بنائیں گے، جو یوریشیا اور امریکہ جیسے دوسرے حب سے جڑے گا۔
موجودہ عالمی ترقی میں دو اہم رجحانات پائے جاتے ہیں: ایک یکسانیت کا رجحان (عالمگیریت اور انضمام)، دوسرا لامرکزیت اور علاقائیت کا رجحان۔ ہم نے عالمگیریت اور علاقائیت دونوں دائروں میں تیزی سے ترقی ہوتے دیکھی ہے۔ دونوں نے بین الاقوامی طاقتوں کے تعلقات اور اکیسویں صدی کے عالمی جغرافیائی سیاسی منظر نامے کو یکسر تبدیل کر دیا ہے۔ ان دو بظاہر منفی رجحانات کا ایک دل چسپ پہلو ایک طرف سڑک، ریل اور پائپ لائنز کے ذریعے قومی سرحدوں کو آہستہ آہستہ مٹانا ہے اور دوسری طرف ''قومی'' علاقوں پر مضبوط گرفت حاصل کرنا ہے، جو علاقائی تنازعات کے خدشے کی صورت میں نتائج دے سکتی ہے، جیسا کہ چین اور بھارت، پاکستان اور بھارت، روس اور جاپان، روس اور یوکرین، آذربائیجان اور آرمینیا وغیرہ کے درمیان ہیں۔ علاقائیت میں قومی ریاست کی طاقت کو ایک علاقائی تنظیم کی صورت میں ازسرنو بانٹنے کا عمل شامل ہے، اور ان ذمہ داریوں کو سبھالنے کے لیے تیار نئی علاقائی تنظیموں کا ظہور بھی۔(جاری ہے)