اگرچہ امریکہ تائیوان کو چین کا حصہ تسلیم نہیں کرتاہے‘ بلکہ اس کو ایک آزاد ملک تسلیم کرتاہے‘ جیسا کہ میں نے بالائی سطور میں لکھاہے‘ لیکن امریکہ تائیوان کو فوجی اعتبار سے طاقتور بناناچاہ رہاہے تاکہ چین اپنی فوج کے ذریعہ یلغار کرکے اس پر قبضہ نہ کرسکے۔ لیکن امریکہ کو شاید اس حقیقت کاعلم نہیں ہے کہ چین آئندہ برسوں میں کسی بھی ملک کے خلاف جارحانہ عزائم نہیں رکھتاہے‘بشمول تائیوان کے لیکن امریکہ کواس بات کاخدشہ ہے کہ چین موقع پاتے ہی تائیوان کو اپنی سرحدوں کاحصہ بنالے گا۔ جیسا کہ چین نے ہانگ کانگ اورمیکائو کے سلسلے میں کیاتھا۔ لیکن ان دونوں علاقوں کو چین میں شامل کرنے کے لئے چین نے کسی قسم کی فوجی یلغار نہیں کی تھی بلکہ برطانیہ سے مکالمے کے بعد چین نے ہانگ کانگ اور میکائو کو حاصل کیاتھا۔ نیز یہ بھی ایک حقیقت ہے کہ ہانگ کانگ کا معاشی نظام خالصتاً سرمایہ دارانہ ہے یعنی ایک ملک اور دونظام(چین اور ہانگ کانگ) تاہم کبھی کبھی ہانگ کانگ میں آزادی اظہار کے سلسلے میں مظاہرے ہوتے رہتے ہیں جس میں نوجوانوں کی اکثریت شامل ہوتی ہے‘ چین کا اس سلسلے میں موقف ہے کہ ہانگ کانگ میں نام نہاد جمہوری تحریک بیرونی طاقتوں کے اشارے پر شروع کی جاتی ہے‘ (اشارہ سی آئی کی طرف ہے) لیکن چین نے ان مظاہروں کے خلاف طاقت یاتشدد کا راستہ اختیار نہیں کیا بلکہ ان سے مکالمے کے ذریعے قائل کرنے کی کوشش کی ہے تاکہ ان مظاہروں سے ہانگ کانگ کی علاقائی حیثیت متاثر نہ ہوسکے اور جو عناصر ایسا کرنے کی کوشش کررہے ہیں‘انہیں شکست اور مایوسی کاسامنا کرنا پڑے گا۔
 دوسرا مسئلہ جو امریکہ اور چین کے درمیان تلخی کا باعث بنا ہوا ہے وہ سائوتھ چائنا سی کامسئلہ ہے۔ اس سمندری راہداری پر بھی چین کا دعویٰ ہے بلکہ ناقابل تردیدحقیقت یہ ہے کہ چین کی سمندری تجارت کا انحصار سائوتھ چائنا سی پر ہے‘جبکہ علاقے کے دیگرممالک(امریکہ کے دوست فلپائن ‘ بھارت وغیرہ) بھی اس علاقے پر تجارت کے پس منظر میں اپنادعویٰ رکھتے ہیں‘ چنانچہ یہ دونوں مسائل تائیوان اور سائوتھ چائنا سی ان دونوں صدور کے درمیان بات چیت کاضرور ی حصہ ہیں۔ ظاہرہے کہ یہ دونوں مسائل انتہائی پیچیدہ ہیں‘ ان کے حل ہونے میں خاصی دیرلگ سکتی ہے‘ خصوصیت کے ساتھ تائیوان کے مسئلہ پر جس کو امریکہ ایک آزاد اور خودمختار ملک تصور کرتاہے جبکہ چین اس کو اپنا حصہ قرار دے رہاہے۔ بہرحال چین کے صدر  زی چن پنگ اور امریکی صدر جو بائیڈن کے درمیان ورچوئل ملاقات دنیا بھر کے لئے خوشی واظہار کاباعث بن رہی ہے۔ کیونکہ اگر دنیا کی ان دو بڑی اکانومی کے درمیان بات چیت کے ذریعے کوئی خوشگوار نتیجہ نکل سکتاہے تو اس کے اثرات پوری دنیا پر مرتب ہوں گے۔ خصوصیت کے ساتھ ترقی پذیر ممالک کے لئے اس بات چیت کے نتائج ان کی معاشی وسماجی ترقی کی راہ میں حوصلہ مند ثابت ہوسکتی ہے ۔مزید برآں پاکستان چین اور امریکہ کے مابین دوستی سے بہت زیادہ مستفید ہوسکتاہے۔ خصوصاً سی پیک کے حوالے سے پاکستان کی خواہش ہے کہ امریکہ سی پیک کے تحت قائم ہونے والے اکنامک زون میں سرمایہ کاری کرے تاکہ ان دونوں ممالک کے مابین معاشی وسیاسی ‘ دوستی کے حوالے سے استحکام پیدا ہوسکے اور ان کے درمیان  جنگ کرنے کاتاثر زائل ہوسکے۔ پاکستان امریکہ کے ساتھ اپنے تعلقات میں بھی بہتری چاہتاہے۔ خصوصیت کے ساتھ افغانستان میں طالبان کی حکومت قائم ہونے کے بعد اگرچہ امریکہ افغانستان کی نئی سیاسی حکومت سے زیادہ خوش نہیں ہے لیکن وہ پاکستان کے ذریعہ  افغانستان کی مالی مدد کرناچاہتاہے تاکہ اس وقت یہاں محرومی ‘بھوک وافلاس کے جوبادل منڈلارہے ہیں ان کاخاتمہ ہوسکے اور افغانستان عالمی سطح پر اپناکردار ادا کرسکے۔ چین اور امریکہ کے درمیان دوستی کی جانب نیاسفر  سیاسی ومعاشی ترقی کی راہ میں ہوا کے ایک خوشگوار جھونکے سے کم نہیں ہوگا۔