حرمین شریفین کا تقدس ہر مسلمان کی روح میں رچا بسا ہے۔ چنانچہ حیرت ہے کہ پاکستانی حکومتی وفد کے خلاف مسجد نبوی میں نعرے بازی کرنے والوں کو اُس مقام کی تقدیس کے منافی حرکات کی جسارت کیسے ہوئی؟ اس واقعے نے پاکستانی معاشرے کی سیاسی نفسیات پر کئی سوال کھڑے کردیئے ہیں۔ یہ باعث صد افسوس واقعہ ماضی کے بہت سے واقعات کی انتہائی صورت تھی۔ لندن میں ایک سیاسی رہنما کے گھر کے باہر جو طوفانِ بدتمیزی مچایا جاتا رہا اگر بروقت ایسا کرنے والوں کی مذمت کرتے ہوئے انہیں ان حرکات سے باز رکھنے کو شش کی جاتی تو ممکن ہے اس اندوہناک صورت حال کی نبوت نہ آتی۔ اس باعث افسوس صورت حال کی ذمہ داری سیاسی رہنمائوں کو لینی چاہیے۔ بے شک کسی رہنما کی جانب سے حرم مقدس میں ایسی گستاخی کی ہدایت نہیں دی گئی ہوگی اور یہ مانا جاسکتا ہے کہ یہ ان لوگوں کا ذاتی فعل ہی ہوگا مگر سیاسی رہنما اپنی جماعت کے کارکنوں اور حامیوں کی فکری رہنمائی کا فریضہ انجام دیتے تو مانا جاسکتا ہے کہ ایسا کبھی نہ ہوتا۔ اگر کوئی سیاسی رہنما اپنے پیروکاروں کی سیاسی اور اخلاقی تربیت ہی نہیں کرتا، انہیں اچھے برے کی تمیز نہیں سکھاتا اور سیاسی اور جمہوری اخلاقیات سے آگاہ نہیں کرتا تو آخر سیاسی رہنما کے کردار کا تعین کیسے کیا جاسکتا ہے؟ یہ مان لینے میں کوئی باک نہیں کہ ہماری سیاسی رہنما اس معاملے میں بری طرح ناکام ہیں۔ شخصیت اور قوم کی تعمیر رہنمائی کے بنیادی اجزا ہیں۔ مگر ہمارے رہنمائوں کی نظر اس جانب بالکل نہیں جاتی۔ عوام کے ساتھ ان کا تعلق صرف جلسوں، جلوسوں کی رونق بڑھانے والے ہجوم اور ووٹ دینے والے طرف داروں کی حد تک ہے۔ کوئی سیاسی رہنما نہیں جس نے اپنی سیاست کو اخلاقی اور قومی تعمیر کے مقاصد میں وسیلے کے طور پر اپنایا ہو۔ یہ اسی کا نتیجہ ہے کہ مخالف سیاستدان کو زچ کرنے کا کوئی موقع جانے نہیں دیا جاتا۔ نہ مقام دیکھا جاتا ہے، نہ موقع۔ پاکستانی قوم کی سیاسی تربیت سے محرومی کے نتائج پہلے ہی بہت تشویشناک ہوچکے ہیں مگر یہ سلسلہ یہیں تک محدو دنہیں رہے گا۔ غالب امکان ہے کہ بدقسمتی کا یہ سلسلہ آگے بھی جائے گا اور پاکستان کے اندر اور باہر اس کے مظاہر مزید افسوسناک واقعات کی صورت میں سامنے آسکتے ہیں۔ ملک کے اندر پولرائزیشن پہلے ہی انتہا کو چھو رہی ہے۔ سوشل میڈیاپر اس کی جھلکیاں واضح نظر آتی ہیں، جہاں کوئی کسی کی بات سننے کو تیار نہیں۔ مجذوب کا مکالمہ تو یوں لگتا ہے پرانی بات ہوچکی۔ یہ جذباتی پن پاکستانی سماج کو غیرمعمولی نقصان پہنچارہاہے۔ 65 فیصد نوجوان آبادی پر مشتمل ملک کے لیے سماجی اعتبار سے یہ صورت حال کسی الیے سے کم نہیں، جہاں سیاسی بات چیت میں ہوش کے بجائے صرف جوش سے کام لیا جاتا ہے۔سیاسی رہنمائوں کی پرفارمنس کی جانچ کے بجائے عوام دو دھڑوں میں تقسیم ہوچکے ہیں اور آنکھیں بند کرکے کسی کی تعریف اور کسی کی تکذیب کیے چلے جاتے  ہیں۔ اگر اس روش کو بہتر طرزِ عمل اور سیاسی اقدار کی تربیت کے ذریعے تبدیل نہ کیا گیا تو سماجی سطح پر تصادم اور سیاسی منافر کا عمل رک نہیں سکے گا۔ مسجد نبوی میں سیاسی مخالفین کے خلاف نعرے بازی اس امر کا واضح ثبوت ہے کہ پاکستانی سماج سیاسی بنیادوں پر تقسیم کی آخری حدوں پر کھڑا ہے جہاں عقل و شعور نے اپنا کام چھوڑ دیا ہے۔ اگر ایسا نہ ہوتا تو کون مسلمان اس پرلے درجے کی حماقت کا سوچ بھی کیسے سکتا ہے۔ جس آستان میں کوئی اونچی سانس بھی نہیں لیتا، تیز قدم بھی نہیں اُٹھاتا، کیا وہاں کسی کو غیر مہذب اور نعرہ بازی کی جرأت ہوسکتی ہے؟ اس افسوسناک واقعے پر صرف اظہارِ افسوس کافی نہیں ۔ اس بگڑتے ہوئے مرض کی علامت تصور کرتے ہوئے نفسیاتی مریض معاشرے کی چارہ گری کے لیے دوا اور دعا، دونوں ضروری ہیں۔