مگر ’’مقدر‘‘ کا لکھا یوں ہوا کہ 47ویں نمبر پر موجود ابن سلمان کو اللہ تعالیٰ نے اقتدار اور بادشاہت کے اختیارات دے رکھے ہیں۔ اس کی نادانیوں، دیوان الملکی کی احسان فراموشیوں، فیصلہ سازی کے اردگرد کے لوگوں کے خود پرستانہ، متکبرانہ رویوں نے مجھے ایسی خود غرضی سعودی فرعونیت کے مدمقابل لاکھڑا کیا۔ بالکل اسی طرح جمال عبدالناصر کے عہد سے حسنی مبارک عہد تک مصر ہمیشہ سعودیہ مخالف رہا ہے۔ جمال عبدالناصر سیکولر، کمیونسٹ کی یمن میں مداخلت اصل میں شاہ فیصل کی سعودی بادشاہت کے انہدام کی جنگ تھی۔ حسنی مبارک خود کو فاتح نہر سویز سمجھتا تھا لہٰذا وہ خود کو مشرق وسطیٰ کا غیر اعلانیہ رہنما بھی سمجھتا تھا۔ مگر خدا نے اس کے تکبر وغرور کو یوں خاک میں ملایا کہ ’’عرب بہار‘‘ اسے لے ڈوبی، یہ ’’عرب بہار‘‘ اصل میں امریکی و یورپی عرب دشمن سازش تھی جس کا اصل نشانہ سعودی و خلیجی بادشاہتیں رہی ہیں اور آج بھی یہی نشانہ ہیں امریکہ و یورپ کی جارحانہ روش کے سامنے۔ صدر مرسی کا اقتدار میں آنا، امریکہ و یورپ کا مصر سے مالی تعاون ختم ہو جانا، یہ وہ ’’کمزور لمحات‘‘ تھے جس نے مصری عسکری اشرافیہ کو شاہ عبداللہؒ آل سعود کی طرف ملتجی ہونے پر مجبور کیا، ان کمزور ترین لمحات میں ماضی بعید کے آل سعود دشمن مصر کی مددکرنا مدبر شاہ عبداللہ نے ضروری سمجھا، صدر مرسی کی نادانیاں کہ وہ صدر طیب اردوان کی طرح کے عقل مند، شاطر، دور اندیش، مخالفوں اور نظریاتی کشمکش میں دوسری طرف رہنے والوں کو ہمرکاب نہ کر سکے ، لہٰذا مصری عسکری اشرافیہ کے عوامی تدبیروں سے صدر مرسی اقتدار کو منہدم کرکے جنرل عبدالفتاح السیسی کے لئے اقتدار کا دروازہ کھول دیا اور صدر عبدالفتاح السیسی نے خود کو سعودی کا ہمرکاب کر دیا۔ جواب میں سعودی عرب نے مصر کے تمام مالی معاملات جو کبھی امریکہ و یورپی امداد پر انحصار کرتے تھے پر مصر کو سعودی دست تعاون پیش کر دیا، یوں ماضی بعید کا دشمن مصر آج سعودی عرب کا دوست ہے اور ساتھی ہے۔ ابن سلمان مصر میں ہیں۔ مصر میں سرمایہ کاری کے لئے 7.7ارب ڈالر کے 14معاہدے ہوچکے ہیں۔ ابن سلمان سے دو روز پہلے بحرینی شاہ قاہرہ میں تھے اور جنرل سیسی کے ساتھ مذاکرات اور تعاون کر رہے تھے، ابن سلمان اور خلیجی شیوخ، تیز رفتار ’’عالمی‘‘ تبدیلیوں کے جلو میں مشرق وسطیٰ میں عرب سیاست و کردار کی ’’تشکیل جدید کے مراحل طے کر رہے ہیں اور یہ دنیا اب نفسانفسی کی فضا ہے۔ ہر ملک میں، ہر خطے میں آندھیوں کی طرح کی تبدیلیاں آرہی ہیں۔ دیکھیں یوکرین روس جنگ نے روس کو یورپ سے کاٹ کر ایشیائی ممالک کا ساتھی بنا دیا ہے۔ اس کا پٹرول، توانائی جو یورپ میں جاتا تھا اس کا زیادہ حصہ چین لے رہا ہے اور وہ بھی اس قیمت سے نصف پر جو یورپ کو فروخت ہوتا تھا، انڈیا، سری لنکا یہ سب اور چین سب سے زیادہ روسی پٹرول، توانائی کا خریدار 21جون کو روسی صدر اور ایرانی صدر رئیسی میں ٹیلی فون پر رابطہ ہوا، روس، ایران اور بھارت نئی تزویرانی مفاہمت کر رہے ہیں۔ یہ وہ نئی فضا ہے جہاں ابن سلمان مصر میں موجود ہیں۔ چونکہ جنرل السیسی اور صدر طیب اردوان میں شدید اختلاف ’’اخوان‘‘ کے مسئلے پر موجود رہا ہے۔ لیبیاء میں بھی ترکی کی جارحانہ موجودگی سے جنرل عبدالفتاح کو پریشانی رہی ہے۔ لہٰذا ابن سلمان کا 23جون کو ترکیہ جانے سے پہلے جنرل السیسی سے ملنا عمدہ حکمت عملی ہے مگر دلچسپ امر یہ بھی ہے کہ توہین رسالت پر ظالم مودی حکومت کے عربوں کی طرح مدمقابل آنے والے ایران کا وزیر خارجہ بھارت میں خوشگوار تعلقات کا مظہر بنا ہوا ہے میں آیت اللہ حضرات کی قابل تعریف چابکدست سفارت کاری پر حیران رہتا ہوں۔ قارئین لکھتے ہوئے تاریخ انقلاب، فکر، وژن، ادب خود بخود، بقلم خود ہوتا جائے تو میں کیا کروں؟ یوں لکھتے ہوئے میں اپنے بہت سے اچھے دوستوں کو اکثر ناراض کرتا رہتا ہوں مگر یہی تو تقدیر ہے اور یہی تو مقدر ہے۔ حدیث نبویؐ ہے ’’انسان کو جس کام کے کرنے کے لئے اللہ تعالیٰ نے پیدا کیا، اس کی ادائیگی و تکمیل کے لئے اسے صلاحیتیں، فضاء، سامان اکثر میسر کیا جاتا رہتا ہے۔ میں بھی عشروں سے وہی کچھ فکری و قلمی طور پر کرتا رہا ہوں جو میری تقدیر اور مقدر ہے زندگی، رزق، اولاد، عزت، اقتدارکی عطا ہے۔ مگر انسان اس حوالے سے خالی ہاتھ ہے۔ ابن سلمان مصر میں قدیم ہو یا جدید مصر عظیم دانش، عظیم فکر، عظیم وژن کا نام رہا ہے میں ایم اے عربی میں مصر کی جامعۃ الازہر کے اساتذہ اور ایک شامی عرب کا شاگرد ہوں۔ اخوان فکر سے ہرگز متاثر نہیں ہوسکا بلکہ ڈاکٹر طہ حسین کو پسند کرتاہوں یا ادب عربی جدید جو امریکہ میں لکھا گیا اس میں عیسائی لبرل انسانیت نواز خلیل جبران اور اس کے ’’الرابطہ القلمیۃ‘‘ کے مسلمان اور عیسائی دانشوروں کو پسند کرتا ہوں تاریخ وژن، فکر میں مصری ذہن سعودیوں سے بہت آگے ہیں۔