اس طرح یہ بات بلاتردید کہی جاسکتی ہے کہ توشہ خانے سے متعلق جو حقائق عوام کو بتائے گئے تھے اس کا بنیادی مقصد عمران خان کی کردار کشی کرنامقصود تھی۔مزید برآں توشہ خانے میں جو لوٹ مار کی گئی ہے اس کاتعلق نیشنل سیکورٹی سے کسی طرح بھی نہیں بنتاہے۔ اگر چند بااثر افراد چاہے ان کا تعلق سیاست سے ہو‘ بیورو کریسی یاپھرعسکری اداروں سے یہ سب کچھ ان کا ذاتی فعل تھا۔ اس سے نہ تو ملک کی سیکورٹی متاثرہوتی ہے اور نہ ہی ملک بدنام ہوتاہے‘ بلکہ جو افراد یہ غلط کام انجام دیتے رہے ہیں ۔ وہی بدنام ہوتے ہیں۔ دوسری طرف انہیں معلوم نہیں تھاکہ یہ تحائف پاکستان کے نام پر آئے ہیں نہ کہ ان افراد کے نام جو اس وقت بڑی نمایاں حیثیت کے مالک تھے۔ اس ضمن میں یہاں یہ ذکر کرنا بھی ضروری ہے کہ پاکستان ان چند ممالک میں سے ایک ہے جہاں کے طاقتور افراد توشہ خانے کوبھی لوٹنے سے نہیں چوکتے ہیں۔ بلکہ ان میں حرص وطمع ان قیمتی تحائف کودیکھ کر بڑھ جاتی ہے۔ انہیں یہ بھی خیال نہیں ہوتاہے کہ اس طرح پاکستان کی بدنامی ہوگی۔ یاپھر خود ان کی۔ عمران خان کے متعلق توشہ خانے سے متعلق جو مہم چلائی گئی تھی‘ کیا اس سے پاکستان بدنام نہیںہوا؟ بلکہ بہت زیادہ ہوا۔ نیزگھڑی میں خانہ کعبہ کی تصویرکابھی ذکر اس انداز سے کیا گیا کہ گویا یہ ایک بہت بڑا کافرانہ جرم سرزد ہوا ہے۔ حالانکہ نہ تو ایسا ہوا ہے اور نہ ہوگا۔ خانہ کعبہ کی تصویریں ہرجگہ بہ آسانی بازارسے حاصل کی جاسکتی ہیں۔ لوگ اس کو اپنے گھر میں بڑی عقیدت سے سجاکررکھتے ہیں۔ دراصل امپورٹڈ حکومت کامسئلہ یہ ہے کہ ان کے اعصاب پر عمران خان سوار ہے۔ اس کو عوام کی نگاہوں میں بدنام اور ذلیل کرنے میں یہ عناصر کسی بھی حد تک جاسکتے ہیں۔ ان پرقاتلانہ حملہ بھی کیا۔ لیکن اللہ تعالیٰ نے خان صاحب کو بچالیا۔ چنانچہ اب 7فروری کو دیکھنا یہ ہے کہ کیبنٹ سیکرٹری اپنے ہیٹ سے کس کبوتر کو نکالیں گے؟ میرا مشورہ ہے کہ انہیں غیر جانبدار رہتے ہوئے توشہ خانے سے متعلق تمام حقائق 1947-2023ء تک جو تحائف غیر ممالک سے آئے ہیں۔ ان کی تفصیل دینا چاہیے۔ ورنہ بہت جلد بعض سیاسی پارٹیاں اپنے ذرائع سے توشہ خانے سے متعلق حقائق عوام کے سامنے لائیں گے۔ حیرت کی بات یہ ہے کہ موجودہ حکومت خود اور اس کے نمائندے توشہ خانے سے متعلق جس بھونڈے انداز میں اپنی چوریاں بچانے کی کوشش کررہے ہیں‘ اسے انہیں سوائے رسوائی کے اور کچھ حاصل نہیں ہوگا۔حکومت کی طرف سے توشہ خانے سے متعلق جو نئی پالیسی لائی جارہی ہے۔ اس سے قبل حکومت کو ان افراد کے نام شائع کرنے ہوں گے جنہوں نے توشہ خانے سے اپنے لئے اور اپنے دوستوں کے لئے قیمتی تحائف لوٹے ہیں۔ ان سے یہ تحائف یا اس کی مد میں رقم وصول کی جائے۔ ایسا کرنا بہت ضروری ہے تاکہ بااثر افراد کی کارستانیاں عوام پر آشکار ہوسکیں۔ ایسا کرنا اس لئے بھی ضروری ہے کہ آئندہ کوئی بااثر آدمی یاافراد توشہ خانے کو اپنے باپ کی ملکیت سمجھ کر لوٹ نہ سکیں۔یہاں یہ بھی لکھنا ضروری ہے کہ توشہ خانے سے جن افراد نے قیمتی تحائف چرائے ہیں ان کا شمار ملک کے امیر کبیر خاندانوں میں ہوتاہے لیکن لالچ کے پھندے میں پھنس کر یہ عناصر ایسے کام انجام دے دیتے ہیںجس سے خود بھی اپنی نگاہوں میں شرمسار ہوتے ہیں اور عوام کی نگاہوں میں بھی۔ ذراسوچیئے!