سابق امریکی صدرٹرمپ نے ستمبر2018ء میں السیسی سے ملاقات کے دوران کہاتھاکہ مصر اورامریکہ کے تعلقات آج جتنے مضبوط ہیں اتنے ماضی میں کبھی نہیں رہے۔ہم مصر کے ساتھ دفاعی اور تجارتی شعبوں کے علاوہ دیگر کئی شعبوں میں بھی تعاون کررہے ہیں،ہمیں دوبارمصر کے ساتھ کام کرنے پرفخر ہے۔ لیکن آج جوبائیڈن السیسی سے بیزارنظرآرہا ہے ۔ 10فروری2022ء کو السیسی افریقی یونین کے سربراہ بنے۔2002ء میں افریقی یونین کے قیام کے بعد مصرکوپہلی مرتبہ اس کی قیادت ملی ہے ۔ افریقی یونین کے سربراہ بننے کے بعد خطاب کرتے ہوئے السیسی کاکہناتھا کہ افریقہ کو دہشت گردی سے خطرہ لاحق ہے لیکن دوسری طرف اپنے ناجائز پانچ اقتدار کے باوجود بھی وہ اپنے مخالفین کو دولت اسلامیہ کانام دے کر جہاں ان کے خلاف بدترین کریک ڈائون کاجواز حاصل کررہے ہیں وہاں اقوام عالم کودھوکہ دینے میں کامیاب نظر آ رہے ہیں اوراپنے مخالفین کودولت اسلامیہ کااتحادی قراردے کر ظلم وستم کا بازار گرم کررکھاہے۔اس کے علاوہ وہ بارباردنیاکودھوکا دیتے ہوئے اپنے تمام مخالفین پراسلامی شدت پسند ہونے کا الزام لگاتے ہیں تاکہ ان کی گرفتاریوں کاجوازموجود رہے۔ حقیقت میں السیسی کے کئی مخالفین سیکولراور لبرل نظریے کے لوگ ہیں۔ اس کے علاوہ اخوان المسلمون کے کارکنان کوبھی دہشت گردقرارنہیں دیاجاسکتا۔ اخوان ہمیشہ پرامن سیاسی مخالفت کی بات کرتی آئی ہے۔2013ء کی فوجی بغاوت اوراس کے نتیجے میں اس کے سیکڑوں کارکنا ن کی گرفتاری کی وجہ سے اخوان اب حکومت کے لئے کسی قسم کاخطرہ نہیں ہے۔صرف اس کے نوجوان کارکنان کی بہت قلیل تعدادانتہا پسندی کی طرف مائل ہوئی ہے۔یہ اس بات کاثبوت ہے کہ ظلم اورناانصافی ناراضی کوجنم دیتی ہے، جو کہ بالآخرانتہاپسندی پرمنتج ہوتی ہے۔ قاہرہ حکومت کے ہزارہامخالفین کئی سالوں سے جیلوں میں ہیں۔اب بھی حکمرانوں سے مختلف رائے کے حامل شہریوں کاتعاقب کیاجاتااورانہیں بدترین تشددکانشانہ بنایا جاتاہے ۔ ملکی ذرئع ابلاغ کی آوازبھی تقریباایک سی ہی ہے لیکن تمام حکومتی جبرکے باوجودعوام کی بڑی تعداد کی ہمدردیاں آج بھی اخوان المسلمون کے ساتھ ہیں جس نے السیسی اوراس کے حواریوں کی نیندیں حرام کررکھی ہیں۔ اس وقت مصرمیں آمریت کی بدترین صورتحال کی وجہ سے السیسی حکومت اپنے مخالفین کوچن چن کراپنے بدترین ظلم کا نشانہ بنارہی ہے جس کے نتیجے میں مصری نوجوانوں کی کثیرتعداداس تلخ حقیقت کی وجہ سے اپنی ہمت کھوبیٹھے ہیں کہ ان کے ملک میں اسرائیل کے تحفظ کی وجہ سے مغرب اورامریکہ نے 1952ء کی فوجی افسروں کی بغاوت اوراقتدارپر قبضے کے بعدسے آج تک کے75برسوں میں مرسی شہیدکے دورحکومت کے ایک محدودسے وقت کو چھوڑ کر صرف خود پسند اورمطلق العنان حکمران ہی اقتدارپر قابض رہے ہیں۔ مصری ریاست کے لئے جبرکاوہ ڈھانچہ جواس کاحصہ ہے،ایک ایساکارآمدنظام ہے جس کے ذریعے وہ یہ طے کرتی ہے کہ ملک میں کب کیاہوگا۔ کسی دوسرے نظام کے لئے ریاست نے کوئی جگہ چھوڑی ہی نہیں۔ ناصر،سادات،مبارک اور السیسی،یہ خود پسنداور مطلق العنان حکمرانوں کاایک ایساسلسلہ ہے جنہوں نے اس امرکے لئے بنیادیں فراہم کیں،کہ مصری عوام ان تمام آمروں کوفراعین کے ناموں سے پکارتے ہیں۔ان حکمرانوں نے ہراس نئی امیدپسندی کاگلاگھونٹ دیاجس کے تحت عوام کسی تبدیلی کی امیدکر سکتے تھے۔نئی صدی کے آغاز پرشمالی افریقاکی اس عرب ریاست میں عوام نے ایک بارپھر تبدیلی کی خواہش کی تھی جو2011ء میں عرب اسپرنگ کی صورت میں اپنے عروج کوپہنچ گئی تھی پھراس کے بعد سابق صدرمحمدمرسی شہیدکی حکومت کااپنے بیرونی آقائوں کی مددسے تختہ الٹ کراقتدارمیں آنے والے فوجی سربراہ السیسی جس طرح صدرمنتخب ہوئے اورجو کچھ اس کے بعدسے اب تک مصرمیں ہورہاہے،وہ اس بات کاثبوت ہے کہ کسی انقلاب کاتوکوئی ذکرہی نہیں،اس ملک میں جواصلاحات مرسی شہیدنے متعارف کروائی تھیں،وہ بھی دوبارہ کسی جن کی طرح بوتل میں بند کردی گئی ہیں۔ آج کے مصرمیں اب جوکچھ ہورہاہے،وہ جہاں بذات خودایک بڑاتضاداورظلم ہے وہاں آئندہ مورخ جب بھی اس خطے کی تاریخ مرتب کریگاوہاں مرسی شہیدکی حکومت کوگرانے والے امریکہ اورمغرب کے علاوہ خطے کے ان اسلامی ممالک کے سربراہوں کانام بھی انسانیت کے بدترین مجرموں بھی لکھاجائے گااورلوگوں کی نفرت اورلعنت کے مستحق گردانیں جائیں گے جس طرح تاریخ فرعون ہلاکواورچنگیزخان کویادکرتی ہے۔ مصر کی موجودہ صورتحال2011 ء کے بعدکی صورتحال سے بہت مختلف ہے۔ مصر ی عوام کی حکومت سے ناراضی اورتلخی بڑھتی جارہی ہے۔ السیسی کی مخالفت کرنے والے اکثر افرادوہ ہیں جن کاکوئی خاص سیاسی تجربہ یانظریہ نہیں ہے۔ دیکھنایہ ہے کہ امریکااوریورپ کے حکمران مصری عوام کا ساتھ دیتے ہیں یا حکومت کا، اورکیامغربی قوتیں مصرمیں انصاف اورانسانی حقوق کے تحفظ کے لئے اقدامات کریں گی یاوہ اپنے اتحادی کوان اقدار کی پامالی کی اجازت دیں گی۔