قارئین کرام ‘مایوسی اور ناامید ی سے بھرے مذکورہ بالا الفاظ دراصل ہمارے موجودہ احوال کی تصویر ہیں‘ یہ کتنی بدقسمتی اور ستم ظریفی ہے کہ حالات نے آج ہمیں اس موڑ پر لاکھڑا کیا ہے کہ بین الاقوامی طور پر اب ہماری شناخت ایک بھکاری ملک کی ہوکر رہ گئی ہے۔ انتشار‘ بدامنی ‘ دہشت گردی اور سیاسی فتنہ پردازی ہماری قومی پہچان بن کر رہ گئی ہے ۔ ذرا تصور کیجئے کہ دنیا ہمیں کس نظر سے دیکھ رہی ہے؟ کس بات پر ہم بہت معزز اور ایک ایٹمی طاقت کے طور پر اپنے آپ کو ایک معتبر ملک کہلوانے کے قابل ہیں؟ سیاسی اختلافات دنیا کے ہر خطے اور ہر گوشے میں ہوتے ہیں۔ اختلاف رائے کو ذاتی دشمنی میں بدلنے کا ’’فن‘‘ اگر ہے تو بس وہ ہمارے پاس دلیل‘ نقطہ نظر‘ تعمیری اور علمی بحث‘ کتاب سے تعلق‘ علم دوستی‘ تہذیب تمدن‘ شائستگی‘ ادب و احترام‘ برداشت… قارئین یہ وہ الفاظ ہیں جو ہم سے روٹھ چکے ہیں اب ہمارا ان سے دور کا بھی کوئی تعلق دکھائی نہیں دے رہا۔ شائد مذکورہ الفاظ ہم سے یہ کہتے دکھائی دے رہے ہیں کہ تم لوگ اس قابل ہی نہیں کہ ہم تمہارے قریب بھی بھٹکیں‘ تنقید کرنا اور معاشرے کی اصل تصویر اسے د یکھنا اور خود بھی آئینہ کے سامنے کھڑے ہوکر خود احتسابی بہت ضروری ہے ‘ نقائص کی نشاندہی اور ان کی تشخیص بھی لازم ہے مگر اس کے ساتھ ساتھ مسائل و آلام کا حل تلاش کرکے اسے عملی جامہ پہنانے کا کام بھی اسی قدر اہمیت کا حامل ہے اور خاموشی جرم ہے ‘ یہ کہنا کہ آپ کے کالم لکھ دینے اور آواز بلند کرنے سے کچھ ہونے والا نہیں ہے اور کوئی فرق نہیں پڑے گا یہ ایک انتہائی جاہلانہ سوچ کی غماز فکر ہے جسے کسی صورت میں کبھی اپروف نہیں کیا جاسکتا۔ اگر ایسا ہو تو پھر دنیا کی تمام مساجد میں اذان کا سلسلہ منقطع ہو جائے گا کیونکہ موذن کا کام اذان دینا ہے وہ لوگوں کو پکڑ کر مسجد کے اندر نہیں لاسکتا‘ اس مرحلہ پر مجرمانہ خاموشی‘ خود غرضی اور جہالت کی ایک بدترین صورت ہوگی۔ سچ پوچھیئے تو آج ہماری اس زبوں حالی کی ایک وجہ یہ بھی ہے کہ ہمارے معاشرے کا کوئی بھی فرد بشمول راقم کے اپنے حصے کا کام کرنے کو تیار نہیں وہ ہمیشہ دوسروں کے کاموںپر نظر تنقید لگائے بیٹھا نظر آتا ہے۔ شکوہ ظلمت شب ہماری زبان پر ہے مگر اپنے حصے کا چراغ جلانے کی زحمت گوار ہ نہیں کی جاتی اور نہ ہی اس کی توفیق حاصل ہے۔ قارئین کرام‘ اب آئیے اپنے اصل مقصد کی طرف اور وہ ہے ’’حل‘‘ اس ساری صورت حال اور تاریک شب میں امید کا چراغ کیسے روشن کیا جائے۔ سب سے پہلا کام جو کرنے کا ہے وہ ہے اللہ سے اجتماعی توبہ اور اس کے بعد قوم سازی کے نقطہ نظر سے اپنے اپنے اختلافات کو پس پشت ڈال کر ذاتی اور ادارتی انا کو دور ‘ بہت دور کوڑے کی ٹوکری میں ڈال دیں ‘ خالی ذہن اور غیر جانبدارنہ سوچ کے ساتھ ٹھنڈے دل سے یہ سوچیں کہ ہم اپنی بداعمالیوں سے کس کا نقصان کررہے ہیں ‘ یقینا ہم اس نتیجے پر پہنچ جائیں گے کہ موجودہ رویہ سے ہم اسی درخت کی شاخ کو کاٹ رہے ہیں جس پر ہم بیٹھے ہیں۔ اسی مکان کی بنیادوں کو اپنے ہاتھ سے کھوکھلا کررہے ہیں جس میں ہم رہتے ہیں۔ نجانے کیوں ہم جو اپنے گھر ‘ اپنی اولاد کیلئے سوچتے ہیں وہ ملک کے بارے میں سوچتے ہوئے ہمیں کیا تکلیف ہوتی ہے۔ پلاٹ‘ مکان‘ گاڑی‘تنخواہوں میں اضافہ‘ مراعات ‘ لباس ‘ ذاتی جاہ و جلال اور کروفر اس سے آگے جب تک ہماری سوچ نہیں جائے گی ‘ ذلالت اور پسماندگی ہمارا مقدر بنی رہے گی۔ حل یہ ہے کہ ابھی اسی وقت اپنے سوچ کے زاویئے کو بدل ڈالیں۔ سیاسی اختلافات کو ذاتی دشمنی کے چنگل سے آزاد کر دیں۔ مکالمہ‘ دلیل اور علمی بحث کو اپنا شعار بناڈالیں۔ زندگی کے رنگوں کو غور سے دیکھنا شروع کر دیں انہیں محسوس کریں ۔ تہذیب‘ مزاح‘ ثقافت‘ علم دوستی‘ اللہ کی کتاب اور اس کے محبوبؐ سے رشتہ اپنی زندگی کا حصہ ابھی اور اسی وقت بنالیں۔ آپ محسوس کریں گے کہ حالات یکسر تبدیل ہوتے ہوئے نظر آئیں گے ‘ اپنے ارد گرد پائے جانے والے پریشان حال افراد کے ساتھ درد بانٹئے‘ ان کی مدد کیجئے… مسکرا کر بات کرنا اپنا شعار بنالیں۔ دوسروں کی عزت نفس کو ‘ ان کی جان اور مال کو اللہ کے کعبے کی طرح احترام دینا شروع کر دیں ‘ ذرا دیکھیں حالات کیسے تبدیل نہیں ہوتے۔آزمائش شرط ہے !! ہمیں خبر ہے کہ ہم ہیں چراغ آخر شب ہمارے بعد اندھیرا نہیں اُجالا ہے