بلوچستان سے کلبھوشن یادیو کی گرفتاری کی تاریخی کامیابی کی طرح پاکستان کےقابل فخرانٹیلی جنس اداروں نےیہ جونیا بڑا تاریخی معرکہ انجام دیا ہے ، دنیائے انٹیلی جنس میں اس کی دوردور تک گونج سنائی دے رہی ہے،میڈیا کے سامنے لائے جانے کے دوران گلزار امام شنبے نے اپنی 15 سالہ دہشت گرد سر گرمیوں کےحوالےسے انتہائی پشیمانی، ندامت اور افسوس کا اظہار کرتے ہوئے کہاہےکہ اس نے بلوچستان کےعوام کےحقوق کی جدوجہد کیلئے دہشت گردی و عسکریت پسندی کا جو راستہ اختیار کیا وہ درست نہیں تھا اور کسی بھی خطے کے عوام کی محرومیوں اور پسماندگی کا حل دہشت گردی و عسکریت پسندی میں نہیں بلکہ سیاسی وجمہوری جدوجہد میں ہے،غیرملکی سازشوں کےتحت بیرون ملک عیش وعشرت کی زندگی گزارنے والےبعض سرداروں نے اپنےعلاقوں کےکچھ نوجوانوں کودہشت گردی اور عسکریت پسندی کی جس دلدل میں دھکیل رکھا ہے اس کا انجام نہ ان ورغلائے گئے نوجوانوں کیلئے اچھا ہے نہ ان کے گھرانوں ،قبائل،بلوچستان اورپاکستان کیلئے اس میں خیرکا کوئی پہلو ہے،اس سعی لاحاصل سے الگ ہوناہی مسئلے کا حقیقی حل ہے کہ تمام ناراض بلوچ اپنے بھائی گلزار امام شنبے کی طرح پہاڑوں کو خیرباد کہہ کراپنے گھروں میں واپس آجائیں گےاوران تاریخی مواقع سےفائدہ اٹھائیں کہ جو ریاست پاکستان نے ناراض اور گمراہ نوجوانوں کو قومی دھارے میں واپس لانے کیلئے انتہائی خلوص اور دردمندی کے ساتھ ترتیب دیئے ہیں اور افواج پاکستان کے مختلف ادارے انتہائی تندہی کے ساتھ انہیں آگے بڑھا رہے ہیں ۔ گلزار امام شنبے کی گرفتاری کے بعد ایک اور افسوسناک حقیقت یہ سامنے آئی ہے کہ بظاہر دوستی کا راگ الاپنے والا ہمارا ہمسایہ ملک بھارت بلوچستان میں دہشت گردی اور عسکریت پسندی کی سرگرمیوں کو کس تواتر کے ساتھ بڑھاوا دیتا رہا ہے ، 2017 میں جعلی دستاویزات پرگلزار امام شنبےنے ہندوستان کا طویل دورہ کیاجہاں اسے مزید سادہ لوح اور جذباتی بلوچ نوجوانوں کو دہشت گردی و عسکریت پسندی کی آگ کا ایندھن بنانےکیلئے بھاری سرمایہ اورجدیدٹریننگ دی گئی، گرفتاری کے بعدگلزار امام شنبےسے برآمد ہونے والی دستاویزات سے ایسے کئی ثبوت مل گئے ہیں کہ وہ نام نہاد آزاد بلوچستان کی بین الاقوامی سازش کے سلسلے میں دشمن انٹیلی جنس ایجنسیز سے مسلسل رابطے میں رہا ۔ گلزار امام شنبے ضلع پنجگور کے گائوں پروم میں 1978 میں پیدا ہوا۔ اس نے 2009 میں دہشت گرد گروپ میں شامل ہونے سے پہلے ایک ٹھیکیدار اور مقامی اخبار کے نامہ نگار کے طور پر بھی کام کیا ۔2018 تک وہ بی آر اے میں براہمداغ بگٹی کا نائب رہا ، جس وقت اسے گرفتار کیا گیا وہ بلوچ راج آجوئی سانگر (BRAS)کے نام سے سرگرم دہشت گرد تنظیم کے آپریشنل سربراہ کے طور پرکام کررہاتھا ، اپنی 15 سالہ دہشت گرد سازشوں کے دوران اس نےبلوچ نیشنل آرمی (BNA) کے نام سے ایک نئی عسکری تنظیم بھی تشکیل دی،وہ پورے بلوچستان اورخاص طور پر جنوبی بلوچستان میں عسکریت پسندوں کی سرگرمیوں کو بڑھانے اور چلانے میں اہم کردار اداکرتا رہا ، وہ پچھلے کئی برسوں سے انتہائی مطلوب دہشت گردتھا ، اسے انتہائی اعلیٰ سطح کے حساس آپریشن کے ذریعے گرفتار کرنا آئی ایس آئی کی تاریخ کا ایک بڑا کارنامہ اور ادارہ جاتی پروفیشنل ازم کا ثبوت ہے، انٹیلی جنس کی دنیا میں اس آپریشن کو ایک نمایاں کارنامے کے طور پر تادیریاد رکھا جائے گا ، قومی سلامتی کمیٹی کے پچھلے اجلاس میں تمام شرکا نے آئی ایس آئی اوراس کے ڈائریکٹر جنرل لیفٹیننٹ جنرل ندیم انجم کو اس تاریخی کامیابی پر شاندار الفاظ میں خراج تحسین پیش کیا ۔ ہمارے میڈیاکو سیاست ، الزام تراشیوں اور جوابی الزام تراشیوں کا چورن بیچنے کا کچھ ایسا چسکا لگا ہوا ہے کہ بہت سے اہم اور تاریخی نوعیت کے واقعات مناسب توجہ پانے سے محروم رہ جاتے ہیں اور ستم بالائے ستم یہ ہے کہ ہماری سکیورٹی فورسز کے ایسے کارنامے جو دنیا بھرکی انٹیلی جنس ورلڈ میں مہینوں بلکہ برسوں تک زیربحث رہتے ہیں ہمارے ہاں انہیں چند روز کے اندر ہی طاق نسیاں میں رکھ دیاجاتا ہےاور اس سے بھی بڑا المیہ یہ ہے ایسے بہت سے قابل قدر کارنامے بھی ہیں کہ جو یہ چند روزہ توجہ بھی حاصل نہیں کر سکتے ۔ بلوچستان میں عسکریت پسندی و دہشت گردی نیٹ ورک کی کمرتوڑ ڈالنے والے موجودہ تاریخی کارنامے کے دوران ہمارے خاموش مجاہدوں نے کس قدر اعلیٰ ذہنی و فکری صلاحیتوں کا مظاہرہ کیا ہے ۔ ، دشمن انٹیلی جنس ایجنسیزکےپھیلائےہوئے انتہائی خفیہ نیٹ ورک میں کیسے نقب لگائی؟ اورمہینوں بلکہ سالوں کی انتہائی صبرآزما جدوجہد کےبعد کس طرح عین موقع پرسرپرائز سرجیکل آپریشن کرتے ہوئے اچانک اپنے دشمن کے سر پر جا پہنچے اور کس طرح 12 گھنٹے کے فائنل آپریشن کے دوران دہشت گردی نیٹ ورک کی سب سے بڑی مچھلی پکڑلی، ان تمام سوالات کے تفصیلی جوابات شاید کبھی منظرعام پر نہ آسکیں لیکن انٹیلی جنس کی دنیا ہمیشہ ان کے کھوج میں رہے گی کہ کلبھوشن یادیو کے پکڑے جانے کے بعد تو را نیٹ ورک اپنی عزت بچانے کیلئے غیر معمولی احتیاط سے کام لینے لگا تھا اور بہت زیادہ پھونک پھونک کرقدم رکھ رہاتھا اس کےباوجود مارخوروں کے پاس ایسی کون سی جادو کی چھڑی ہے کہ انہوں نے ایک بارپھر بلوچستان میں دہشت گردی نیٹ ورک کےکوبرا کاسر اچانک اپنے شکنجے میں لے کر پوری دنیا کو ورطہ حیرت میں ڈال دیا ہے۔