٭اور…اور…ایم کیوایم کےسربراہ مقبول صدیقی نے سندھ ہائی کورٹ کی طرف سے ’بھولا اورچریا‘ کی سزائےموت کے خلاف درخواستیں مستردکئےجانے کی سخت مذمت کی ہے۔ ایک بیان میں ہائی کورٹ کے اس فیصلےکو بالکل غلط اوربھولا اورچریاکوبالکل بےقصور اوربےگناہ قرار دیا ہے اور اُن کی باعزت رہائی کا مطالبہ کیا ہے۔ دونوں افراد11 برسوں سے جیل میں قید بھگت رہے ہیں۔ ایک اور قابل ذکر بات کہ چار دوسرے ملزموں کو عمرقید کی سزا سنائی گئی تھی، انہیں 11 سال قید بھگتنےکے بعد بےقصور قراردیاگیاہے۔ اس 11 سال کی قید کا کیا ازالہ ہو سکتا ہے؟ ٭ 29 برس پہلے 1995ء میں بے نظیر بھٹو کی حکومت الٹانےکی سازش میں ملوث دو فوجی افسروں کرنل آزادمنہاس کو1996ء میں دو سال اور کرنل عنائت اللہ کو 4 سال قید سخت کی سزا سنائی گئی۔ ان افسروں نےسزاکاٹی۔ کرنل عنائت اللہ نے سزا کاٹنے کے بعد 1999ء میں اور کرنل آزاد منہاس نے 13 سال بعد خودکو بے گناہ قراردینے کےلئےعدالتوں سےرجوع کیا۔ پہلے فیلڈ کورٹ مارشل پھر مختلف سول عدالتوں میں 29 برس تک مقدمےچلنے کے بعد گزشتہ روز سپریم کورٹ نے ملزموں کی سزائیں برقرار رکھنے کا فیصلہ سنایا جب کہ دونوں ملزم 1999ء تک قید کی مدت پوری کر کے جیل سے رہا بھی ہو چکےتھے! ٭اس خبر کامضحکہ خیز بلکہ الم ناک رُخ کہ فوج کے ایک افسر میجرجنرل ضیاءالحق نےایک فیلڈکورٹ مارشل کےچیئرمین کی حیثیت سےوزیراعظم (سابق صدر) ذوالفقارعلی بھٹو کی حکومت کاتختہ الٹنے کی سازش کےالزام میں بعض اعلیٰ افسروں کو سخت سزائیں سنائیں اورکچھ عرصہ بعد خود آرمی چیف کی حیثیت سےذوالفقارعلی بھٹو کی حکومت کا تختہ الٹ کر بھٹوکوقیدکیا اورپھرپھانسی دےدی۔ ضیاءالحق کے خلاف کبھی کوئی مقدمہ درج نہیں ہوا،بلکہ اسے امیرالمومنین اورشہید قراردیاگیا۔ اس کاطیارہ صرف 3 سیکنڈ میں زمین پر گرا اور آگ میں راکھ ہو گیا۔ ضیاء الحق کاراکھ میں صرف جبڑاملا اسےاور راکھ کو قومی اعزاز کے ساتھ اسلام آباد میں دفنایا گیا۔ بے نظیر بھٹو کی حکومت کا تختہ الٹنے کی سازش میں گرفتار دو فوجی افسروں کو قید کی سزائیں سنائی گئیں۔ 1999ء میں سزائوں کی مدت پوری ہو گئی، اسی سال جنرل پرویزمشرف نے نوازشریف کی حکومت کا تختہ الٹا، نوازشریف کوروشنی سےمحروم اندھیرے، کیڑے مکوڑوں والے تنگ کمرے میں قید کیا، پھر ملک سے نکال دیا…اور جنرل پرویز مشرف کو کئی سال کی ملک بدری کے بعد دیار غیر میں بےبسی کی موت نصیب ہوئی مگر اسے فوجی اعزاز کے ساتھ کراچی میں دفنایا گیا۔ بعض لوگ اسے بھی شہید قرار دیتے ہیں۔ ویسے یہ قومی اعزاز نئی بات نہیں، جمہوریت کا جنازہ نکالنے والے جنرل ایوب خان اوریحییٰ خان کےجنازوں کو یہ اعزاز دیا گیا۔ قارئین جانتےہیں، حقیقی قومی اعزازکیاہوتاہے؟عبدالستار ایدھی کاتابوت پاکستان کی تینوں مسلح افواج کے سربراہوں نے اٹھایا اورنماز جنازہ میں ملک کا صدر اور وزرائے اعلیٰ شریک ہوئے تھے۔!!! ٭بڑے التزام اور فخر کے ساتھ خبریں لگوائی جا رہی ہیں کہ نوازشریف21 اکتوبر کو لندن سے لاہور پہنچیں گے جہاں ان کا فقیدالمثال استقبال ہو گا۔ نوازشریف7 سال قید اور10 ارب روپے جرمانہ کے قیدی ملزم ہیں، عدالت نے بیرون ملک علاج کرانےکےلئےآٹھ ہفتے کی عبوری ضمانت منظور کی، وزیراعظم عمران خان نےباہرجانے پر پابندی ختم کرکےجانے کی اجازت دی (بعد میں دوسری بڑی غلطیوں کی طرح اسےبھی غلطی قراردیا) نوازشریف 20 نومبر2019ء کوسخت اور نازک حالت والی بیماری کےعالم میں لندن پہنچتےہی مکمل طورپر تندرست ہوگئے۔ اب تک ’چار سال‘واپس نہیں آئے۔ عدالت نے عدم حاضری پرموصوف کو ضمانت منسوخ کی اور انہیں مفرور اوراشتہاری قرار دیا۔ یہ ’اعزازات‘ اب بھی موجوداور برقرار ہیں۔ ان ’اعزازات‘ کے ساتھ ان کا لاہور میں فقیدالمثال جلوس اورجلسےسےخطاب کا اعلان کیا گیا ہے۔ ان کی اپنی پارٹی کے بعض ’’سیانے‘‘ اور قانون دان کہہ رہے ہیں (شاہد خاقان عباسی وغیرہ) کہ قانون کے مطابق نوازشریف کو پہلےجیل جاکرنئےسرےسے ضمانت کیلئےعدالت کے روبرو پیش ہوناضروری ہے۔ شہبازشریف اور دوسرے ن لیگی رہنمائوں کے مطابق کچھ بھی ایسا نہیں ہو گا۔ ان کی آمد سے پہلے ساری سزائیں اور مبینہ جرائم ختم کرانے کا ’انتظام‘ ہو چکا ہے! یہاں ہر چیز ممکن ہو سکتی ہے۔ پنجاب کے نگران اعلیٰ کابیان محض بیان رہ جائےگا کہ نوازشریف کے ساتھ قانون کے مطابق سلوک ہو گا! چودھری اعتزازاحسن کا بیان بھی چیختا چلاتا رہ جائے گا کہ قانون کے مطابق نوازشریف کی ہوائی اڈے پر گرفتاری ضروری ہے! ویسے 21 اکتوبر کو واپسی اشارہ دیتی ہے کہ اس کے بعد جلد انتخابات ہونے والے ہیں۔