لاہور: پنجاب مون سون سسٹم کے حوالے سے محکمہ موسمیات نے اہم پیشگوئی جاری کرتے ہوئے بتایا ہے کہ بارشیں برسانے والا نیا مون سون سسٹم 7 جولائی کو پاکستان میں داخل ہونے کا امکان ہے، جس کے بعد پنجاب کے مختلف علاقوں میں بارشوں کی شدت میں اضافہ متوقع ہے۔
محکمہ موسمیات کے مطابق اس وقت پنجاب میں مون سون کا ایک کمزور سسٹم موجود ہے، جس کے باعث لاہور سمیت چند علاقوں میں بادل چھائے رہنے اور کہیں کہیں ہلکی بارش ہونے کا امکان ہے۔ تاہم آئندہ چند روز میں موسم میں نمایاں تبدیلی متوقع ہے۔
محکمہ موسمیات کا کہنا ہے کہ پنجاب مون سون سسٹم کے 7 جولائی کو داخل ہونے کے بعد لاہور سمیت مختلف شہروں میں گرج چمک کے ساتھ بارشیں ہو سکتی ہیں، جس سے گرمی کی شدت میں کمی آنے کی توقع ہے۔
اعداد و شمار کے مطابق لاہور میں آج کم سے کم درجہ حرارت 30 ڈگری سینٹی گریڈ ریکارڈ کیا گیا، جبکہ زیادہ سے زیادہ درجہ حرارت 39 ڈگری سینٹی گریڈ تک پہنچنے کا امکان ظاہر کیا گیا ہے۔
ماہرین موسمیات کے مطابق آئندہ 24 گھنٹوں کے دوران لاہور اور گردونواح میں چند مقامات پر ہلکی بارش متوقع ہے، جبکہ شہریوں کو شدید گرمی اور حبس کے باعث احتیاطی تدابیر اختیار کرنے کا مشورہ بھی دیا گیا ہے۔
محکمہ موسمیات نے مزید کہا ہے کہ اگر نیا مون سون سسٹم اپنی متوقع شدت کے ساتھ پاکستان میں داخل ہوتا ہے تو پنجاب کے مختلف اضلاع میں بارشوں کا سلسلہ مزید وسیع ہو سکتا ہے، جس سے موسم خوشگوار ہونے کے ساتھ درجہ حرارت میں بھی نمایاں کمی آئے گی۔
