یو اے ای جنگی انتباہ کے بعد دبئی اور ابوظبی کی سلامتی پر سوالات اٹھ گئے ہیں۔ ایک معروف امریکی ماہر معاشیات نے متحدہ عرب امارات کو جاری علاقائی کشیدگی میں جنگ کا حصہ بننے سے خبردار کیا ہے۔
جیفری سیچس کے مطابق دبئی اور ابوظبی عالمی سیاحت اور تجارت کے مراکز ہیں۔ یہ شہر مضبوط فوجی دفاع یا میزائل تحفظ کے لیے تیار نہیں ہیں۔
انہوں نے کہا کہ جنگ میں شمولیت سے یو اے ای کی معیشت کو نقصان پہنچ سکتا ہے۔ اس سے عالمی سرمایہ کاروں کا اعتماد بھی متاثر ہو سکتا ہے۔
ماہر معاشیات نے مزید کہا کہ امریکا اور اسرائیل کے ساتھ قریبی تعلقات نے یو اے ای کو مشکل صورتحال میں ڈال دیا ہے۔ اگر پالیسیوں پر نظرثانی نہ کی گئی تو خطرات بڑھ سکتے ہیں۔
انہوں نے ابراہام معاہدوں کو بھی خطے کے لیے خطرناک قرار دیا۔ ان کے مطابق خلیجی ممالک نے اپنی سلامتی کے لیے امریکا پر زیادہ انحصار کیا ہے۔
دوسری جانب ایران نے خطے کے ممالک کو خبردار کیا ہے کہ وہ اپنی زمین امریکی فوجی کارروائیوں کے لیے استعمال نہ ہونے دیں۔
ایرانی وزارت خارجہ کا کہنا ہے کہ اگر کسی ملک کی سرزمین ایران کے خلاف استعمال ہوئی تو اسے جارحیت میں شامل سمجھا جائے گا۔
ادھر خلیجی ممالک نے توانائی تنصیبات پر حملوں کی مذمت کرتے ہوئے امریکا کی حمایت کا اشارہ دیا ہے۔ اس صورتحال سے خطے میں کشیدگی مزید بڑھنے کا خدشہ ہے۔
