امریکی صدر ڈونلڈ ٹرمپ کو ایران جنگ پر ملک میں بڑھتے ہوئے دباؤ کا سامنا ہے۔ ہفتے کو ملک بھر میں نو کنگز ریلیاں منعقد ہوئیں، جن میں لاکھوں امریکی سڑکوں پر نکلے۔
احتجاج کرنے والے ایران میں جاری فوجی کارروائیوں اور ملک میں بڑھتی مہنگائی کے خلاف آواز بلند کر رہے ہیں۔ یہ مظاہرے امریکی تاریخ کے سب سے بڑے احتجاجی مظاہروں میں شمار کیے جا رہے ہیں۔
صدر ٹرمپ کی بھتیجی، مریم ایل ٹرمپ، نے ایران جنگ کے حوالے سے حکومت کی پالیسی پر سخت تنقید کی۔ انہوں نے سوشل میڈیا پر ایک پروگرام کا کلپ شیئر کیا اور فروری میں شروع ہونے والی جنگ کے لیے دی گئی وجوہات کو مسترد کیا۔
مریم ایل ٹرمپ نے کہا کہ انتظامیہ بار بار اپنا موقف بدل رہی ہے اور صدر ٹرمپ کو ایرانی عوام سے کوئی حقیقی دلچسپی نہیں۔ ان کے پاس ایرانی عوام کو آزادی دلانے کا کوئی واضح منصوبہ بھی نہیں ہے۔
انہوں نے سوال اٹھایا کہ ایسا کب ہوتا ہے کہ بغیر فوری خطرے کے کسی ملک کے خلاف جنگ شروع کی جائے۔ یہ امریکی عوام کے مفاد میں کیسے ہو سکتا ہے؟
سوشل میڈیا پوسٹ میں مریم ایل ٹرمپ نے لکھا کہ ٹرمپ کو رجیم چینج ملے گا لیکن ایران میں نہیں، بلکہ امریکا میں۔
شدید عوامی ردعمل کے باوجود صدر ٹرمپ اپنے موقف پر قائم ہیں اور دعویٰ کرتے ہیں کہ ایران میں موجودہ قیادت ابتدائی قیادت سے مختلف ہو گئی ہے۔
