اسلام آباد (ویب ڈیسک) نیشنل ڈیٹا بیس اینڈ رجسٹریشن اتھارٹی (نادرا) نے شہریوں کو ایک اور بڑی سہولت فراہم کرتے ہوئے سندھ میں گاڑیوں کی خرید و فروخت کے لیے بائیو میٹرک تصدیق کے عمل کو آسان بنا دیا ہے۔
نادرا کی جانب سے جاری کردہ پبلک نوٹس کے مطابق اس سہولت کا مقصد شہریوں کو دفاتر کے غیر ضروری چکروں سے بچانا اور ڈیجیٹل بنیادوں پر سرکاری خدمات کو مزید موثر اور شفاف بنانا ہے۔ اس سے قبل شہریوں کو گاڑیوں کی خرید و فروخت کے لیے نادرا کے رجسٹریشن مراکز یا متعلقہ دفاتر کا رخ کرنا پڑتا تھا جہاں انہیں طویل انتظار اور رش کا سامنا کرنا پڑتا تھا۔ نئی سہولت کے بعد یہ تمام اقدامات موبائل فون کے ذریعے ممکن ہو گئے ہیں۔
نادرا کے مطابق پاک آئی ڈی موبائل ایپ کے ذریعے بائیو میٹرک تصدیق مکمل ہونے کے بعد ایکسائز اینڈ ٹیکسیشن کے متعلقہ محکموں میں گاڑی کی منتقلی کا عمل بغیر کسی رکاوٹ کے مکمل کیا جا سکے گا۔ اس قدم سے نہ صرف وقت کی بچت ہوگی بلکہ فراڈ اور غیر قانونی لین دین کے امکانات بھی کم ہوں گے۔
نادرا نے شہریوں کو ہدایت کی ہے کہ وہ اس سہولت سے فائدہ اٹھانے کے لیے گوگل پلے اسٹور یا ایپل ایپ اسٹور سے پاک آئی ڈی موبائل ایپ ڈاؤن لوڈ کریں اور درست معلومات کے ساتھ اپنا پروفائل مکمل کریں۔ بائیو میٹرک تصدیق کے دوران شہریوں کو کسی تکنیکی مسائل سے بچنے کے لیے صاف اور روشن جگہ پر بیٹھ کر عمل مکمل کرنے کی ہدایت کی گئی ہے۔
مزید رہنمائی کے لیے نادرا کی آفیشل ویب سائٹ پر تفصیلی معلومات فراہم کی گئی ہیں جب کہ کسی بھی قسم کی مدد یا شکایت کے لیے موبائل صارفین نادرا ہیلپ لائن 1777 پر رابطہ کر سکتے ہیں۔نادرا حکام کے مطابق مستقبل میں اس سہولت کو دیگر صوبوں تک بڑھانے پر غور کیا جا رہا ہے تاکہ ملک بھر کے شہری ڈیجیٹل سروسز سے مستفید ہو سکیں۔
حکام کا کہنا ہے کہ یہ اقدام ڈیجیٹل پاکستان کے وژن کی جانب ایک اہم قدم ہے جس سے شہریوں کی زندگیوں میں آسانی ہوگی اور حکومتی نظام میں شفافیت کو فروغ ملے گا۔
مزید پڑھیں:پاکستان میں پہلی فیری سروس کا آغاز
